Jantar Mantar Protest CEC Resignation: गांधी जयंतीचे औचित्य साधून विरोधी पक्षांनी आणि कॉक्रोज जनता पार्टीने भारताचे मुख्य निवडणूक आयुक्त ज्ञानेश कुमार यांच्या राजीनाम्याची मागणी करत जंतर मंतरवर आंदोलन सुरू केलं होतं. जमाव बंदीचा आदेश असतानाही शेकडो लोक आणि अनेक विरोधी पक्षाचे नेते आंदोलनासाठी पोहचले होते.
पोलिसांनी या आंदोलकांना ताब्यात घेण्यास सुरूवात केली असून आतापर्यंत जवळपास ५०० आंदोलकांना ताब्यात घेतलं असून त्यात आम आदमी पक्षाचे नेते सौरभ भारद्वाज, आतिशी आणि संजय सिंह यांचा देखील समावेश आहे. याचबरोबर दिल्ली पोलिसांनी या भागातील इंटरनेट १२ तासासाठी सस्पेंड देखील केलं आहे. दिल्ली पोलिसांनी बळाचा वापर करत आंदोलकांना उचलून जंतर मंतरवरून हटवण्याचा प्रयत्न केला.
दिल्ली पोलिसांनी आज जंतर मंतरवरील आंदोलनाच्या आवाहनानंतर या भागात बॅरिटेक लावले होते. तसेच जंतर मंतर रस्त्याचे ट्रॅफिक देखील बंद केले होते. या ठिकाणी कलम १६३ लागू करण्यात आले आहे. पोलिसांनी सांगितलं की २ ऑक्टोबर गांधी जयंतीच्या दिवशी होत असलेल्या या आंदोलनाला परवानगी नाकारण्यात आली आहे.
त्यामुळेच दिल्ली पोलिसांनी या भागातील सुरक्षा वाढवली आहे. तसेच गर्दी वाढण्याची शक्यता पाहून केंद्रीय सशस्त्र पोलीस दलाचे जवान देखील तैनात करण्यात आले आहेत. जंतर मंतरवरून आतापर्यंत जवळपास ५०० लोकांना ताब्यात घेण्यात आलं आहे.