Umarkhed Police Online Fraud Refund
उमरखेड : ऑनलाइन फसवणुकीत गमावलेली रक्कम परत मिळवून देण्यात उमरखेड पोलिसांना यश आले आहे. पाच नागरिकांची ऑनलाइन माध्यमातून फसवणूक करून लाटलेली एकूण १ लाख ८ हजार रुपयांहून अधिक रक्कम पोलिसांनी सायबर यंत्रणेच्या मदतीने परत मिळवून दिली. या कामगिरीबद्दल फसवणूकग्रस्त नागरिकांनी पोलीस अधिकारी व कर्मचाऱ्यांचा सन्मानपत्र आणि पुष्पगुच्छ देऊन गौरव केला.
राज्यात आणि देशात सायबर गुन्ह्यांचे प्रमाण वाढत असताना, पोलीस अधीक्षक कुमार चिंता, अपर पोलीस अधीक्षक अशोक थोरात आणि सायबर क्राईमच्या पोलीस निरीक्षक यशोधरा मुनेश्वर यांच्या मार्गदर्शनाखाली, तसेच उमरखेडचे पोलीस निरीक्षक शंकर पांचाळ यांच्या देखरेखीखाली या प्रकरणांचा तपास करण्यात आला. तक्रारींची नोंद घेऊन सायबर यंत्रणेच्या माध्यमातून चौकशी करत फसवणूकग्रस्तांना त्यांची रक्कम परत मिळवून देण्यात आली.
यामध्ये असोली येथील संतोष माधवराव कदम यांची ४६ हजार रुपयांची ऑनलाइन फसवणूक झाली होती. त्यांनी तक्रार दाखल केल्यानंतर राष्ट्रीय सायबर गुन्हे तक्रार पोर्टलवर (एनसीसीआर) नोंद घेऊन तपास करण्यात आला. त्यानंतर त्यांची संपूर्ण रक्कम परत मिळवून देण्यात आली.
मरसुळ येथील प्रकाश वाघु सुरोशे यांची २६ हजार १०१ रुपये, उमरखेड येथील राहुल दिपकराव बानसकर यांची १६ हजार रुपये, तर साईनगर येथील मोहम्मद रफीक मोहम्मद अहमद यांची १० हजार रुपयांची फसवणूक झाली होती. या प्रकरणांतही पोलिसांनी ऑनलाइन पद्धतीने पाठपुरावा करून संबंधितांना त्यांची रक्कम परत मिळवून दिली. या चार प्रकरणांतील परत मिळालेली रक्कम ९८ हजार १०१ रुपये असल्याचे नमूद करण्यात आले आहे. पाचव्या प्रकरणासह एकूण १ लाख ८ हजार रुपयांहून अधिक रक्कम परत मिळवून दिल्याची माहिती पोलिसांनी दिली.
या उल्लेखनीय कामगिरीबद्दल पोलीस निरीक्षक शंकर पांचाळ, सहायक पोलीस निरीक्षक अमोल गुंडे, पोलीस उपनिरीक्षक शरद लोहकरे, पोलीस हवालदार चंदन जाधव, पोलीस अंमलदार विष्णू राठोड, संघशील टेंभरे आणि दिगंबर गिते यांचा सन्मान करण्यात आला. ऑनलाइन फसवणुकीत गमावलेली रक्कम परत मिळाल्याने संबंधित नागरिकांनी पोलिसांचे आभार मानले.
ऑनलाइन व्यवहार करताना नागरिकांनी विशेष खबरदारी घ्यावी, असे आवाहन पोलीस निरीक्षक शंकर पांचाळ यांनी केले आहे. मोबाइलवर आलेला ओटीपी कोणालाही सांगू नये. अनोळखी एपीके फाइल डाउनलोड करणे, संशयास्पद एसएमएस लिंक उघडणे, यूपीआयद्वारे होणारी फसवणूक, डिजिटल अरेस्टच्या नावाखाली केली जाणारी लूट, ई-चलनाच्या बनावट लिंक, शेतीविषयक बनावट ॲप, आगाऊ पैसे घेऊन केली जाणारी फसवणूक आणि ऑनलाइन मार्केटप्लेसवरील व्यवहार यांबाबत नागरिकांनी सतर्क राहावे.
ऑनलाइन फसवणूक झाल्यास वेळ न घालवता १९३० या सायबर हेल्पलाइन क्रमांकावर संपर्क साधावा. तसेच सायबर गुन्ह्याची तक्रार नोंदवून जवळच्या पोलीस ठाण्याशी संपर्क साधावा, असे आवाहन पोलिसांनी केले आहे. नागरिकांच्या सुरक्षिततेसाठी उमरखेड पोलीस सदैव तत्पर असल्याचेही पोलीस निरीक्षक पांचाळ यांनी स्पष्ट केले.