नागपूर; पुढारी वृत्तसेवा: राज्यातील महिलांसाठी “मुख्यमंत्री–माझी लाडकी बहीण” योजना सुरु करण्यात आली आहे. योजनेसाठी पात्र महिलांना आपले अर्ज सहज भरता यावेत, या दृष्टीने तीन स्तरीय सुविधा व ऑनलाईन सुविधा उपलब्ध करून देण्यात आली असल्याची माहिती जिल्हाधिकारी डॉ. विपिन इटनकर यांनी दिली.
पोर्टल, मोबाईल ॲपव्दारे, सेतू सुविधा केंद्राव्दारे ऑनलाईन सुविधा
ग्रामपंचायत, नगर पंचायत, परिषद व महा पालिका कार्यालय
आपले सरकार सेवा केंद्र, कॉमन सर्विस सेंटर्स मध्ये अर्ज ऑफलाईन पद्धतीने
ग्रामपंचायत, नगर पंचायत/परिषद व महानगर पालिका क्षेत्रात विभाग कार्यालय येथे पात्र महिलांना अर्ज देता येतील. याच बरोबर पोर्टल, मोबाईल ॲपव्दारे, सेतू सुविधा केंद्राव्दारे ऑनलाईन सुविधा उपलब्ध करुन दिल्याचे त्यांनी सांगितले.
ज्या महिलांना ऑनलाईन अर्ज करता येणे शक्य नसेल त्यांना ग्रामीण भागात महिला व बाल विकास प्रकल्प अधिकारी कार्यालय, अंगणवाडी सेविका, पर्यवेक्षिका, सेतू सुविधा केंद्र, आपले सरकार सेवा केंद्र, कॉमन सर्विस सेंटर, ग्रामपंचायत कार्यालय, ग्रामसेवक यांच्याकडे तसेच नागरी भागात अंगणवाडी सेविका, मुख्य सेविका, वार्ड अधिकारी, सेतू सुविधा केंद्र, आपले सरकार सेवा केंद्र, कॉमन सर्विस सेंटर्स मध्ये अर्ज ऑफलाईन पद्धतीने करता येतील, असे त्यांनी स्पष्ट केले.
31 ऑगस्ट 2024 पर्यंत अर्ज सादर करावयाचे आहेत. अर्ज भरण्याची संपूर्ण प्रक्रिया ही विनामूल्य असल्याने महिलांनी कोणत्याही मध्यस्थामार्फत अर्ज भरण्याची आवश्यकता नाही. अथवा कोणत्याही ठिकाणी अर्ज भरताना कोणतेही शुल्क देण्याची आवश्यकता नाही, असे जिल्हाधिकारी विपीन इटनकर यांनी स्पष्ट केले.