ठाणे : पुढारी वृत्तसेवा: संजय राऊत यांना आम्ही महत्त्व देत नाही. ते केवळ फिल्मी डायलॉग मारत आहेत. सुप्रीम कोर्टावर आमचा पूर्ण विश्वास असून आमचाच विजय होईल. संपूर्ण ठाणे जिल्हा आमच्या पाठीशी आहे, असा विश्वास कल्याण लोकसभा मतदारसंघाचे खासदार डॉ. श्रीकांत शिंदे यांनी व्यक्त केला. ठाण्यात खासदार श्रीकांत शिंदे यांच्यासह माजी महापौर नरेश म्हस्के आणि मोठ्या प्रमाणात शिंदे समर्थकांनी टेभी नाका आणि शक्तिस्थळावर शक्ती प्रदर्शन केले.
सोमवारी (दि.२७) रोजी सकाळी शिंदे समर्थकांनी पुन्हा एकदा ठाण्यात शक्तिप्रदर्शन केले. सुरुवातीला टेभी नाका परिसरात शिंदे समर्थकांनी मोठी गर्दी केली. यावेळी संजय राऊत यांच्याविरोधात घोषणाबाजी केली. त्यानंतर सर्व शिंदे समर्थक आनंद दिघे यांच्या शक्तिस्थळावर पोहोचले. या ठिकाणीही शिंदे यांच्या समर्थनार्थ जोरदार घोषणाबाजी करण्यात आली.
यावेळी प्रतिक्रिया देताना खासदार श्रीकांत शिंदे म्हणाले की, आम्ही कोणत्याही प्रकारचे शक्तिप्रदर्शन करत नाही. केवळ आनंद दिघे यांचे आशीर्वाद घेण्यासाठी आलो आहोत. शिवसेना ही वेगळी नसून, बाळासाहेबांच्या विचारांवर आणि हिंदुत्वावर चालणाऱ्या शिवसेनेत आहोत, असे त्यांनी सांगितले. याच दरम्यान त्यांनी संजय राऊत यांच्यावर सडकून टीका केली. '४० आमदारांचा आत्मा मेला असून, त्यांचे मृतदेह केवळ येतील' या राऊत यांच्या टीकेनंतर त्यांनी बोलताना विचार करायला हवा अशी म्हटले आहे. संजय राऊत यांच्या बोलण्याला आम्ही महत्त्व देत नसून, सुप्रीम कोर्टात विजय आमचाच होणार असल्याचे श्रीकांत शिंदे यांनी यावेळी स्पष्ट केले.
हेही वाचलंत का?