Mumbra Ganesh Idol Trolley Viral Video: गणेशोत्सवाच्या पार्श्वभूमीवर मुंबई आणि ठाणे परिसरात गणेशमूर्तींच्या आगमन सोहळ्यांना सुरुवात झाली आहे. ढोल-ताशांच्या गजरात आणि मोठ्या उत्साहात गणरायाचं स्वागत केलं जात असताना ठाण्यातील मुंब्रा परिसरात मात्र मोठी दुर्घटना थोडक्यात टळली.
गणेशमूर्ती घेऊन जाणाऱ्या ट्रॉलीचं चाक अचानक घसरल्याने ट्रॉली एका बाजूला सरकू लागली. मात्र, मंडळाच्या कार्यकर्त्यांनी वेळीच प्रसंगावधान राखत ट्रॉली थांबवल्याने गणेशमूर्ती खाली पडण्यापासून वाचली. या घटनेचा व्हिडिओ सध्या सोशल मीडियावर व्हायरल होत आहे.
मिळालेल्या माहितीनुसार, ही घटना २९ ऑगस्ट रोजी मध्यरात्री सुमारे १ वाजण्याच्या सुमारास घडली. भिवंडीच्या श्री गणेश मंडळाची गणेशमूर्ती ट्रॉलीमधून नेली जात होती. ही ट्रॉली कार्यशाळेपासून अवघ्या ५०० मीटर अंतरावर असताना अचानक तिचं चाक घसरलं.
चाक घसरल्याने ट्रॉली एका बाजूला सरकू लागली आणि गणेशमूर्तीही धोक्यात आली. परिस्थिती लक्षात येताच मंडळाच्या कार्यकर्त्यांनी तातडीने ट्रॉली थांबवली. त्यामुळे मूर्ती खाली कोसळली नाही.
घटना घडल्यानंतर मंडळाच्या सदस्यांनी तातडीने मुंब्रा पोलीस ठाण्याशी संपर्क साधला. पोलिसांच्या मदतीने घटनास्थळी JCB आणि हायड्रॉलिक ट्रॉली आणण्यात आली.
मूर्ती सुरक्षितपणे उचलण्यासाठी जवळपास तीन तास प्रयत्न करण्यात आले. अखेर JCB आणि हायड्रॉलिक ट्रॉलीच्या मदतीने गणेशमूर्ती सुरक्षितपणे खाली उतरवण्यात आणि पुन्हा व्यवस्थित ठेवण्यात यश आलं. यानंतर खराब झालेली ट्रॉली बदलण्यात आली आणि गणरायाच्या आगमनाचा प्रवास पुन्हा सुरू करण्यात आला.
या घटनेत कोणतीही जीवितहानी झाल्याची माहिती नाही. मात्र, ट्रॉलीचं चाक नेमकं कशामुळे घसरलं, हे अद्याप स्पष्ट झालेलं नाही. रस्त्यावरील खड्डा, गणेशमूर्तीचं वजन किंवा अन्य कोणतं तांत्रिक कारण यामागे असण्याची शक्यता व्यक्त केली जात आहे.
गणेशोत्सवात मोठ्या आणि वजनदार गणेशमूर्तींची वाहतूक मोठ्या ट्रॉली, क्रेन किंवा इतर साधनांच्या मदतीने केली जाते. त्यामुळे अशा वेळी वाहनाची स्थिती, चाकांची तपासणी, रस्त्याची परिस्थिती आणि मूर्तीची सुरक्षितता याकडे विशेष लक्ष देण्याची गरज या घटनेतून अधोरेखित झाली आहे.
दरम्यान, मुंबईच्या भुलेश्वर परिसरात गणेशमूर्तीच्या आगमन सोहळ्यादरम्यान घडलेल्या एका दुर्घटनेने गणेशोत्सवावर शोककळा पसरली. २२ फूट उंच गणेशमूर्ती अंगावर कोसळल्याने दोन जणांचा मृत्यू झाला, तर पाच जण जखमी झाले.
ही दुर्घटना दक्षिण मुंबईतील भुलेश्वर परिसरातील बलराम मर्चंट रोडवर घडली. ‘भुलेश्वरचा राजा’च्या आगमन सोहळ्यासाठी ही मूर्ती नेली जात असताना हा अपघात झाला.
पोलिसांच्या तपासानुसार, एवढ्या मोठ्या मूर्तीला आधार देणाऱ्या सपोर्ट सिस्टीममध्ये तांत्रिक बिघाड झाल्याने मूर्ती कोसळली असण्याची शक्यता आहे. ही मूर्ती भायखळा येथील गणेशमूर्ती कार्यशाळेतून भुलेश्वरच्या दिशेने नेली जात होती.
घटनेची माहिती मिळताच मुंबई अग्निशमन दल, मुंबई पोलीस, वाहतूक पोलीस, १०८ रुग्णवाहिका सेवा आणि महापालिकेच्या कर्मचाऱ्यांनी तातडीने घटनास्थळी धाव घेतली. बचावकार्य सुरू करण्यात आलं.
एकीकडे मुंब्र्यात मंडळाच्या कार्यकर्त्यांच्या प्रसंगावधानामुळे मोठी दुर्घटना टळली, तर दुसरीकडे भुलेश्वरमध्ये गणेशमूर्ती कोसळून दोन जणांचा मृत्यू झाल्याने गणेशमूर्तींच्या वाहतुकीतील सुरक्षेचा प्रश्न पुन्हा ऐरणीवर आला आहे.
मोठ्या गणेशमूर्तींच्या आगमनावेळी ट्रॉली, चाकं, सपोर्ट सिस्टीम, क्रेन आणि इतर उपकरणांची काटेकोर तपासणी करणे अत्यंत महत्त्वाचं असल्याचं या दोन्ही घटनांमधून स्पष्ट होतं.