Ram Mandir Trust: IIT बॉम्बेपासून ते राम मंदिर ट्रस्टपर्यंत! सचिवपदाची धुरा संभाळणारे पुण्याचे जगदीश आफळे कोण आहेत?

Ram Mandir Trust Secretary: अयोध्येतील श्री राम जन्मभूमी तीर्थ क्षेत्र ट्रस्टने मंदिराच्या वाढत्या प्रशासकीय कामकाजासाठी महत्त्वाचा निर्णय घेतला आहे. IIT बॉम्बेचे माजी विद्यार्थी आणि मंदिर प्रकल्पाचे प्रमुख समन्वयक जगदीश आफळे यांची सचिवपदासाठी निवड केली आहे. ट्रस्टच्या कार्यकारी मंडळाच्या 2 सप्टेंबर रोजी होणाऱ्या बैठकीत या नियुक्तीला अधिकृत मंजुरी दिली जाणार आहे.

प्रशासकीय पुनर्रचनेचा भाग म्हणून नवीन पद

राम मंदिरातील वाढत्या कामकाजाचे प्रभावी व्यवस्थापन करण्यासाठी ट्रस्टने सचिव हे नवीन पद निर्माण केले आहे. जगदीश आफळे हे दैनंदिन प्रशासनाची जबाबदारी सांभाळतील आणि ते कार्यवाहक महासचिव कृष्ण मोहन यांना अहवाल देतील. मात्र, ते ट्रस्टचे सदस्य नसून केवळ पदाधिकारी म्हणून काम पाहतील. याच धर्तीवर भविष्यात नियुक्त होणारे मुख्य कार्यकारी अधिकारी (CEO) देखील ट्रस्टचे सदस्य नसतील, तर पदाधिकारी म्हणूनच जबाबदारी सांभाळतील.

पुण्याचे जगदीश आफळे कोण आहेत?

मूळचे पुण्याचे असलेले जगदीश आफळे हे राष्ट्रीय स्वयंसेवक संघाशी (RSS) संबंधित आहेत. त्यांनी IIT बॉम्बेमधून इलेक्ट्रिकल इंजिनिअरिंगमध्ये बीटेक आणि एमटेक पदवी घेतली आहे.

निवृत्तीपूर्वी त्यांनी अनेक बहुराष्ट्रीय कंपन्यांमध्ये काम केले असून युरोप आणि अमेरिकेतही विविध जबाबदाऱ्या सांभाळल्या आहेत. सर्वोच्च न्यायालयाच्या राम मंदिरावरील ऐतिहासिक निकालानंतर मंदिर बांधकामाला सुरुवात झाल्यावर त्यांची मानद प्रकल्प व्यवस्थापक म्हणून नियुक्ती करण्यात आली होती. तेव्हापासून ते अयोध्येतील तीर्थ क्षेत्र भवन येथे वास्तव्यास आहेत.

CEOचे पद अजूनही रिकामे

22 जुलै रोजी झालेल्या ट्रस्टच्या बैठकीत सचिवपदाची निर्मिती जाहीर करण्यात आली होती. त्याच बैठकीत ट्रस्टच्या पहिल्या CEO पदासाठीचा निर्णयही एक महिन्याने पुढे ढकलण्यात आला. या पदासाठी तब्बल 5,200 अर्ज प्राप्त झाले असून त्यापैकी अंतिम तीन उमेदवारांची छाननी सुरू असल्याची माहिती ट्रस्टने दिली आहे.

देणगी अपहार प्रकरणानंतर मोठे बदल

मंदिरातील देणगी अपहाराच्या आरोपांमुळे ट्रस्टवर टीका झाली होती. या प्रकरणाच्या चौकशीसाठी विशेष तपास पथक (SIT) स्थापन करण्यात आले होते. प्राथमिक अहवालानंतर पोलिसांनी गुन्हा दाखल करून आठ आरोपींना अटक केली होती.

या वादानंतर ट्रस्टचे तत्कालीन महासचिव चंपत राय आणि विश्वस्त अनिल मिश्रा यांनी आपल्या पदांचा राजीनामा दिला होता. त्यानंतर ट्रस्टने संपूर्ण प्रशासकीय रचनेत बदल करण्याचा निर्णय घेतला असून त्याचाच एक भाग म्हणून सचिवपदाची निर्मिती आणि जगदीश आफळे यांची नियुक्ती करण्यात आली आहे.