वाघोली: वाघोली-लोहगाव रस्त्यावरील दादाची वस्ती परिसरात भटक्या कुत्र्यांच्या हल्ल्यांमुळे लहान मुले आणि नागरिकांच्या सुरक्षेचा प्रश्न ऐरणीवर आला आहे. गेल्या तीन ते चार दिवसांत पाचवर्षीय चिमुरडीसह पाच ते सहा नागरिकांना भटक्या कुत्र्यांनी चावा घेतल्याच्या घटना घडल्याने परिसरात भीतीचे वातावरण निर्माण झाले आहे.
दोन दिवसांपूर्वी घडलेल्या घटनेत परिसरात खेळत असलेल्या पाच वर्षांच्या चिमुरडीवर भटक्या कुत्र्याने अचानक हल्ला करून तिच्या मांडीला चावा घेतला. या हल्ल्यात ती गंभीर जखमी झाली असून, तिच्यावर उपचार सुरू आहेत.
महापालिका शहरातील इतर भागांतून पकडलेली भटकी कुत्रे लोहगाव परिसरात आणून सोडत असल्याचा दावा परिसरातील रहिवाशांनी केला आहे. त्यामुळे या भागात भटक्या कुत्र्यांची संख्या वाढली असून, लहान मुले, महिला, ज्येष्ठ नागरिक आणि शाळकरी विद्यार्थ्यांच्या सुरक्षेचा प्रश्न निर्माण झाला आहे.
घराबाहेर पडतानाही भीती वाटत असल्याची भावना नागरिकांनी व्यक्त केली. महापालिकेने दादाची वस्तीसह संपूर्ण लोहगाव परिसरात विशेष मोहीम राबवून भटक्या कुत्र्यांचा बंदोबस्त करावा, अशी मागणी नागरिकांनी केली आहे.
दादाची वस्तीसह परिसरात अवघ्या तीन-चार दिवसांत एका निष्पाप चिमुरडीसह पाच ते सहा नागरिकांवर भटक्या कुत्र्यांनी हल्ला करणे ही गंभीर बाब आहे. महापालिकेने तातडीने ठोस उपाययोजना कराव्यात; अन्यथा नागरिकांकडून तीव्र आंदोलन करण्यात येईल.सागर खांदवे, रहिवासी, लोहगाव