पुणे: दिल्लीमध्ये काँग्रेस नेते राहुल गांधी यांच्या नेतृत्वाखाली सुरू असलेल्या नीट पेपरफुटीविरोधी आंदोलनाला पाठिंबा दर्शवण्यासाठी पुण्यात मंगळवारी युवक काँग्रेसच्या वतीने आक्रमक आंदोलन करण्यात आले. केंद्रीय राज्यमंत्री आणि पुण्याचे खासदार मुरलीधर मोहोळ यांच्या मुख्य कार्यालयाबाहेर भरपावसात मोठ्या संख्येने कार्यकर्ते एकत्र येत केंद्र सरकारविरोधात जोरदार घोषणाबाजी करण्यात आली. आंदोलकांच्या घोषणांनी संपूर्ण परिसर दणाणून गेला. पोलिसांनी आंदोलकांची धरपकड केल्याने वातावरण तणावपूर्ण झाले होते.
नीट पेपरफुटी प्रकरणावरून देशभरातील तरुणाईमध्ये तीव्र संताप व्यक्त होत आहे. सोनम वांगचूक यांच्या समर्थनार्थ सरकारविरोधात मोठे आंदोलन सुरू आहे. आज कॉंग्रेसनेते राहुल गांधी यांनी देखील पंतप्रधान कार्यालयासमोर आंदोलन सुरू केले आहे. त्यांच्या या आंदोलनाला देशभरातून मोठा प्रतिसाद मिळत आहे. त्याच पार्श्वभूमीवर पुण्यात युवक काँग्रेसने केंद्र सरकारवर थेट निशाणा साधत मोहोळ यांच्या कार्यालयाबाहेर निदर्शने केली.
मुसळधार पावसाची तमा न बाळगता युवक काँग्रेसचे कार्यकर्ते कार्यालयाबाहेर ठिय्या मांडून बसले होते. कार्यकर्त्यांनी 'नीट घोटाळ्याची चौकशी करा', 'विद्यार्थ्यांना न्याय द्या', 'धर्मेंद्र प्रधानांनी राजीनामा द्यावा' अशा घोषणा देत परिसर दणाणून सोडला. केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत केंद्र सरकारच्या धोरणांचा तीव्र निषेध नोंदवण्यात आला.
घोषणाबाजीमुळे मोहोळ यांच्या कार्यालय परिसरात काही काळ तणावाचे वातावरण निर्माण झाले होते. आंदोलनाची माहिती मिळताच पुणे पोलिसांनी घटनास्थळी धाव घेतली. परिस्थिती चिघळू नये यासाठी पोलिसांनी आंदोलनकर्त्यांशी चर्चा करून मध्यस्थी करण्याचा प्रयत्न केला. मात्र, आंदोलन कायम राहिल्याने पोलिसांनी प्रमुख कार्यकर्त्यांची धरपकड सुरू केली.
पोलिसांनी आंदोलनाचे नेतृत्व करणाऱ्या अनेक कार्यकर्त्यांना ताब्यात घेतले असून, त्यानंतर परिसरातील परिस्थिती नियंत्रणात आणण्यात आली. या कारवाईदरम्यान कार्यालय परिसरात मोठा पोलिस बंदोबस्त तैनात करण्यात आला होता. युवक काँग्रेसने मात्र नीट प्रकरणातील दोषींवर कठोर कारवाई होईपर्यंत आंदोलन सुरू ठेवण्याचा इशारा दिला आहे.