पुणे: पुणे रेल्वे स्थानकावरून प्रवास करणाऱ्या प्रवाशांच्या सुरक्षेसाठी तब्बल 160 नवीन आर्टिफिशियल इंटेलिजन्स (एआय) आधारित सीसीटीव्ही कॅमेरे बसवण्यात आले आहेत. ही नवी यंत्रणा याच महिनाअखेरपर्यंत कार्यान्वित होणार असून, यामुळे स्थानक परिसराच्या सुरक्षेत आणखी वाढ होणार आहे.
दिल्ली बॉम्ब स्फोटाच्या पार्श्वभुमीवर पुणे रेल्वे स्थानकाची सुरक्षा करण्यासाठी हे कॅमेरे महत्वाची कामगिरी बजावणार आहेत. सध्या रेल्वे स्थानकावर असलेले जुने 75 सीसीटीव्ही कॅमेरे आहेत, ते नवीन 160 उच्च दर्जाचे कॅमेरे कार्यान्वित झाल्यावर काढण्यात येणार आहेत. या नव्या प्रणालीच्या सीसीटीव्ही कॅमेऱ्यांचे सर्वात मोठे वैशिष्ट्य म्हणजे त्यांची फेस रेकग्निशन (चेहरा ओळखण्याची) क्षमता. हे कॅमेरे केवळ रेकॉर्डिंग करणार नाहीत, तर पोलिसांच्या यादीत असलेल्या गुन्हेगारांचे चेहरे ओळखण्यास देखील सक्षम असणार आहेत.
जर एखादा रेकॉर्डवरील गुन्हेगार किंवा संशयित व्यक्ती स्थानक परिसरात दाखल झाली, तर ही यंत्रणा तात्काळ सक्रिय होईल. क्षणाचाही विलंब न लावता, संबंधित व्यक्तीची माहिती आणि तिचे नेमके ठिकाण याचा संदेश थेट रेल्वे पोलिसांच्या नियंत्रण कक्षाला पाठवला जाईल. यामुळे पोलिसांना वेळेत कारवाई करणे शक्य होणार असून, गुन्हेगारी घटनांना मोठा आळा बसणार आहे.
नव्या कॅमेऱ्यांची वैशिष्ट्ये
रात्रीच्या अंधारातील दृश्य स्पष्ट दिसणार (नाईट व्हिजन)
फोर के क्वालिटी कॅमेरे
एआय तंत्रज्ञान असणार
फेस रेकग्निशन (चेहरा ओळखण्याची यंत्रणा)
पुणे रेल्वे स्थानक परिसरात हे सर्व 160 अत्याधुनिक कॅमेरे बसवण्याचे काम पूर्ण झाले आहे. सध्या फक्त ते सक्रिय करण्याचे काम अंतिम टप्प्यात आहे. चालू महिनाअखेरपर्यंत आम्ही ही एआय आधारित आणि चेहरा ओळखणारी यंत्रणा प्रवाशांच्या सेवेत सुरू करू. या उच्च दर्जाच्या कॅमेऱ्यांमुळे पुणे रेल्वे स्थानकाची आणि प्रवाशांची सुरक्षा अधिक बळकट होईल, हा आम्हाला विश्वास आहे.राजेशकुमार वर्मा, विभागीय रेल्वे व्यवस्थापक (डीआरएम), मध्य रेल्वे, पुणे विभाग