पुणे: बोगस भरती प्रकरणी महापालिकेने मोठी कारवाई केली आहे. महापालिकेचे लेटरहेड आणि बनावट शिक्क्यांचा वापर करून अनेकांकडून पैसे घेऊन नियुक्ती पत्र दिल्याने प्राथमिक शिक्षण विभागातील शिपाई शिवानंद पाटील याला निलंबित करण्यात आले आहे. या प्रकरणी विश्रामबागवाडा पोलिस ठाण्यात गुन्हा दाखल करण्यात आला आहे.
अतिरिक्त आयुक्त प्रजीत नायर यांनी दिलेल्या आदेशानुसार सामान्य प्रशासन विभागाने ही कारवाई केली आहे. महापालिकेत नोकरी लावून देतो, असे आश्वासन देऊन अनेकांकडून मोठी रक्कम लाटून त्यांना नियुक्ती पत्र देण्यात आले होते. या बोगस भरती प्रकरणाचा पर्दाफाश माहिती अधिकार कार्यकर्ते विजय कुंभार यांनी केला होता.
दरम्यान, या गंभीर प्रकाराची महापालिकेने दखल घेत या प्रकरणाचा तपास सुरू केला होता. या तपासात शिक्षण विभागातील शिपाई शिवानंद पाटील याने महापालिकेचे बनावट लेटरहेड आणि बनावट शिक्क्यांचा वापर करून वरिष्ठ अधिकाऱ्यांच्या खोट्या स्वाक्षऱ्या तयार केल्या. त्याद्वारे विविध विभागांमध्ये कामाला लावण्यासाठी बनावट नियुक्ती आदेश त्याने दिल्याचे निष्पन्न झाले आहे.
या प्रकारामुळे पुणे महापालिकेची प्रतिमा मलिन झाली असून, संबंधित कर्मचाऱ्याने कर्तव्यात निष्काळजीपणा आणि गैरवर्तन केल्याचे प्रथमदर्शनी आढळून आले आहे. दरम्यान, या कारवाईनंतर पाटील याला पूर्वपरवानगी घेतल्याशिवाय त्यांना महापालिकेचे कार्यक्षेत्र सोडता येणार नाही, असे आदेशात स्पष्ट करण्यात आले आहे.
ही कारवाई गेल्या काही आठवड्यांपासून प्रलंबित होती. या प्रकरणी अनेक तक्रारी प्राप्त झाल्याने ही कारवाई करण्यात आली. संबंधित पीडित व्यक्तीशी संपर्क साधण्यात आला, पुरावे गोळा करून त्यांचे विश्लेषण करण्यात आले आणि त्यानंतर पीडित व्यक्तीचे समुपदेशन करून त्यांना या प्रकरणी मदत देण्याचे आश्वासन देण्यात आले. तसेच गुन्हा दाखल करण्यासाठी सहकार्य देण्यात आले. या प्रकरणी गुन्हा दाखल करण्यात आला असून, शिपायाला निलंबित करण्यात आले आहे.प्रजीत नायर, अतिरिक्त आयुक्त महापालिका