पुणे: शहरातील उच्चभ्रू आणि वर्दळीच्या लॉ कॉलेज रस्त्यावर मध्यरात्री मद्यधुंद तरुणांनी कारमधून जीवघेणा स्टंट करून धिंगाणा घातला. भरधाव कारच्या मागील खिडक्यांमधून शरीर बाहेर काढत हातात बीअरच्या बाटल्या उंचावत आरडाओरडा करणाऱ्या पाच तरुणांना डेक्कन पोलिसांनी ताब्यात घेतले. या प्रकारामुळे स्वतःसह रस्त्यावरील इतर वाहन चालकांच्या जिवाला धोका निर्माण केल्या प्रकरणी गुन्हा दाखल केला आहे.
याप्रकरणी कारचालक वेदांशू रणजितकुमार मंडल (२३ रा. कोरबा, छत्तीसगड), मनीष संजू परिहार (२४ रा. स्वारगेट, पुणे), रोहन भरत औजी (२३ रा. कॅम्प, पुणे), सिद्धांत रामलू कंदूर (२२, रा. कोंढवा बुद्रुक) आणि रुपेश मनोहर पिल्ले (२३ रा. पद्मावती, पुणे) अशी ताब्यात घेण्यात आलेल्यांची नावे आहेत.
या पाच जणांविरुद्ध भारतीय न्याय संहिता, मोटार वाहन कायदा आणि महाराष्ट्र दारुबंदी अधिनियमान्वये गुन्हा दाखल केला आहे. यावेळी वापरलेली कार जप्त केली आहे. दि. १० ऑगस्ट रोजी मध्यरात्री दोन ते अडीचच्या सुमारास डेक्कन पोलिस ठाण्याचे पोलिस शिपाई तुळशीराम भानुदास शेंडगे आणि पोलिस शिपाई महेर हे लॉ कॉलेज रोड परिसरात गस्तीवर होते.
त्यावेळी लॉ कॉलेजकडून नळस्टॉपच्या दिशेने एक सिल्व्हर रंगाची एलेंट्रा कार भरधाव वेगाने जाताना त्यांच्या निदर्शनास आली. कारच्या मागील दोन्ही खिडक्यांमधून तरुणांनी शरीर बाहेर काढले होते. हातात बीअरच्या बाटल्या उंचावत ते मोठमोठ्याने आरडाओरडा करत असल्याचे दिसू आले. त्यांच्या या हुल्लडबाजीनंतर पोलिसांनी कारचा पाठलाग सुरू केला. पोलिसांची चाहूल लागताच कारचालकाने नळस्टॉपच्या दिशेने कार आणखी वेगाने पळवली.
मात्र, पोलिसांनी प्रसंगावधान राखत कारचा क्रमांक टिपून घेतला. त्यानंतर तांत्रिक तपासाच्या आधारे कारचा आणि त्यातील तरुणांचा शोध घेण्यात आला. अखेर पाचही जणांना पोलिस ठाण्यात हजर करण्यात आले. पोलिसांनी चौकशी केल्यानंतर पाचही तरुणांनी मद्यप्राशन केल्याचे समोर आले. गुन्ह्याचा पुढील तपास पोलिस उपनिरीक्षक नवनाथ कुलाळ करीत आहेत.