पुणे: शहरात मोठ्या प्रमाणात पसरलेल्या अनधिकृत ऑप्टिकल फायबर केबलच्या जाळ्यावर अखेर महापालिकेने कारवाईचा बडगा उगारत एक एप्रिलपासून धडक मोहीम सुरू केली आहे. सातारा रस्त्यावर गुरुवारी सकाळी महापालिकेच्या विद्युत विभागासह विविध विभागांच्या संयुक्त पथकाने पोलिस बंदोबस्तात कारवाई करीत अनधिकृत केबल हटवण्यास सुरुवात केली. या कारवाईत पहिल्याच दिवशी दोन ट्रकभर केबल काढण्यात आल्याने प्रशासनाच्या भूमिकेची तीवता स्पष्ट झाली.
शहरातील उड्डाणपूल, रस्त्यांच्या कडेला असलेले वृक्ष, पथदिवे, सिग्नल, बसथांबे, तसेच खासगी व सरकारी इमारतींवरून अनधिकृत केबलचे जाळे मोठ्या प्रमाणात पसरलेले आहे. या केबलमुळे अपघातांचा धोका वाढत असून, महापालिकेचा महसूलही बुडत असल्याचे चित्र समोर आले आहे. मागील वर्षी या विरोधात कारवाई सुरू करण्यात आली होती; मात्र काही काळानंतर ती थंडावली होती. अलीकडेच स्थायी समितीच्या बैठकीनंतर या प्रश्नावर पुन्हा लक्ष केंद्रित करीत कारवाईला वेग देण्याचा निर्णय घेण्यात आला.
त्या अनुषंगाने एक एप्रिलपासून नियमित कारवाई सुरू करण्याची घोषणा करण्यात आली होती. त्यानुसार बुधवारी सकाळी साडेदहा वाजल्यापासून सातारा रस्त्यावरील आदिनाथ सोसायटीसमोर कारवाईला सुरुवात करण्यात आली. या मोहिमेत स्थायी समितीचे अध्यक्ष श्रीनाथ भिमाले, विद्युत विभागाच्या प्रमुख मनीषा शेकटकर, अतिक्रमण विभागाचे प्रमुख सोमनाथ बनकर, अग्निशामक दलाचे प्रमुख देवेंद्र पोटफोडे, तसेच कार्यकारी अभियंता नीलेश कालेकर आदी उपस्थित होते.
आदिनाथ सोसायटी, पुष्प मंगल कार्यालय परिसर, उत्सव इमारत, राजर्षी शाहू महाराज सोसायटी, पुण्याई नगर आणि धनकवडी परिसरात ही कारवाई राबविण्यात आली. अनधिकृत केबलमुळे नागरिकांच्या जीवितास धोका निर्माण होतो आणि महापालिकेचा महसूलही बुडतो, याकडे लक्ष वेधत संपूर्ण शहरात ही मोहीम अधिक वेगाने राबवली जाईल, असे स्थायी समितीचे अध्यक्ष श्रीनाथ भिमाले यांनी सांगितले.
अनधिकृत केबल हटवण्याची कारवाई सुरू असली, तरी यासाठी ठोस धोरण आवश्यक असून, पुढील बैठकीत ते सादर केले जाईल. विद्युत विभागाच्या प्रमुख मनीषा शेकटकर यांनीही मागील वर्षापासून सुरू असलेली कारवाई आता नियमितपणे राबवली जाणार असल्याचे स्पष्ट करीत पहिल्याच दिवशी मोठ्या प्रमाणात केबल काढण्यात आल्या.नवल किशोर राम, आयुक्त, महापालिका