पुणे: महानगरपालिकेच्या शहर सुधारणा समितीच्या बैठकीत शहराच्या भविष्यातील विकास आणि नियोजनाच्या दृष्टीने महत्त्वपूर्ण प्रस्तावाला एकमताने मंजुरी देण्यात आली. या निर्णयामुळे महापालिका हद्दीत नव्याने समाविष्ट झालेल्या २३ गावांसाठी विकास आराखडा (डीपी) तयार करण्याच्या प्रक्रियेला अधिकृत सुरुवात होणार आहे.
महाराष्ट्र प्रादेशिक व नगररचना अधिनियम, १९६६ मधील तरतुदींनुसार विकास आराखडा तयार करण्याचा इरादा जाहीर करण्यास समितीने मान्यता दिली. त्याचबरोबर या प्रक्रियेसाठी आवश्यक असलेल्या नगररचना अधिकाऱ्याच्या नियुक्तीलाही हिरवा कंदील देण्यात आला आहे.
त्यानुसार शहर अभियंता अनिरुद्ध पावसकर यांची नगररचना अधिकारी म्हणून नियुक्ती करण्यात येणार आहे. या निर्णयामुळे नव्याने समाविष्ट गावांचा संतुलित, शाश्वत आणि नियोजनबद्ध विकास करण्यासाठी आवश्यक प्रक्रिया अधिक वेगाने राबविणे शक्य होणार आहे.
भविष्यातील लोकसंख्यावाढ, नागरिकांच्या गरजा, रस्ते, सार्वजनिक सुविधा, पायाभूत सेवा आणि हरित क्षेत्रांचा विचार करून विकास आराखडा तयार केला जाणार आहे. त्यामुळे या भागांच्या सर्वांगीण विकासासाठी भक्कम पाया निर्माण होणार आहे.
शहर सुधारणा समितीच्या अध्यक्षा स्मिता वस्ते म्हणाल्या, “पुण्याच्या सर्वांगीण आणि नियोजनबद्ध विकासासाठी हा अत्यंत महत्त्वाचा निर्णय आहे. नव्याने समाविष्ट झालेल्या २३ गावांचा विकास शास्त्रोक्त, नागरिकाभिमुख आणि दूरदृष्टी ठेवून व्हावा, यासाठी विकास आराखडा आवश्यक होता.