पुणे: राज्य सामाईक प्रवेश परीक्षा कक्षातर्फे 2026 मध्ये घेतल्या जाणाऱ्या शैक्षणिक वर्ष 2026-27 साठी एमपीएड व एमएड या पदव्युत्तर अभ्यासक्रमाच्या सीईटीच्या प्रवेश नोंदणीस 5 जानेवारीपासून सुरुवात झाली आहे. या दोन अभ्यासक्रमाच्या सीईटीपासून 2026 च्या सीईटी नोंदणीस प्रारंभ झाला आहे. ही नोंदणी 20 जानेवारीपर्यंत ऑनलाइन होणार आहे. इतर अभ्यासक्रमाच्या सीईटी नोंदणीसही लवकरच सुरुवात होणार आहे.
या परीक्षेसाठी ऑनलाइन अर्ज, नोंदणी वेळापत्रक आणि माहिती पुस्तिका राज्य सामाईक प्रवेश परीक्षा कक्षाच्या http://mahacahet.org/ या अधिकृत संकेतस्थळावर उपलब्ध करून दिली आहे.
ही सीईटी राज्यातील विविध परीक्षा केंद्रांवर ऑनलाइन घेतली जाईल. मागील वर्षी या दोन प्रवेश परीक्षेत 6 हजार 193 विद्यार्थ्यांनी नोंदणी केली होती. एमपीएडची सीईटी 24 मार्चला, एमपीएड फिल्ड टेस्ट 25 मार्चला एमएडची सीईटी 25 मार्चला घेण्यात येणार असल्याचे सीईटी सेलने यापूर्वीच स्पष्ट केले आहे.
नोंदणीसाठी अपार आयडी व यूडीआयडी बंधनकारक
विद्यार्थ्यांची अचूक माहिती उपलब्ध व्हावी, तसेच त्यांची पडताळणी करणे सहज शक्य व्हावे. यासाठी सीईटी सेलने प्रवेश परीक्षा नोंदणीसाठी ऑटोमेटेड पर्मनंट ॲकॅडेमिक अकाउंट रजिस्ट्री (अपार) आयडी व दिव्यांग विद्यार्थ्यांना युनिक डिसॲबिलिटी आयडी (यूडीआयडी ) बंधनकारक केला आहे. विद्यार्थ्यांनी सीईटीमध्ये नोंदणी करताना अपार आयडी व यूडीआयडीची नोंदणी करावी.
यावरून विद्यार्थ्यांची पडताळणी केली जाणार आहे. ज्या उमेदवारांनी अद्याप त्यांचा अपार आयडी तयार केलेला नाही त्यांनी तो डिजीलॉकरद्वारे तयार करावा. उमेदवारांनी पुढील अद्ययावत माहिती, तपशीलवार वेळापत्रक आणि परीक्षेशी संबंधित सूचनांसाठी नियमितपणे राज्य सामाईक प्रवेश परीक्षा कक्षाच्या अधिकृत संकेतस्थळाला भेट द्यावी, असे आवाहन सीईटी कक्षाचे आयुक्त दिलीप सरदेसाई यांनी स्पष्ट केले आहे.