शिवनगर : बारामती तालुक्यातील माळेगाव सहकारी साखर कारखान्याने गाळप हंगाम 2024-25 मध्ये तुटून आलेल्या उसाला 3450 रुपये प्रति टन अंतिम ऊसदर जाहीर केला. संचालक मंडळाच्या शुक्रवारी (दि. 10) झालेल्या बैठकीत उपमुख्यमंत्री व कारखान्याचे अध्यक्ष अजित पवार, उपाध्यक्षा संगीताताई कोकरे यांनी ऊसदर जाहीर केला. या वेळी सर्व संचालक तसेच कार्यकारी संचालक अशोक पाटील उपस्थित होते.(Latest Pune News)
माळेगाव साखर कारखान्याने सदर ऊस बिलापोटी या अगोदर 3332 रुपये प्रति टन ऊस उत्पादक सभासदांच्या खात्यावर जमा केले आहेत. आता उर्वरित 118 रुपये प्रतिटन दोन दिवसात सभासदांच्या बँक खात्यावर जमा होतील, अशी माहिती कार्यकारी संचालक अशोक पाटील यांनी दिली.
दरम्यान कारखाना प्रशासनाने गेटकेन धारकांना 3200 रुपये प्रति टन ऊस दर जाहीर केला असून गेटकन धारकांनादेखील याअगोदर ऊस बिलापोटी 3125 रुपये प्रति टन दिले आहेत. उर्वरित 75 रुपये प्रति टन रक्कम त्यांच्या खात्यावर दोन दिवसात जमा होतील. दुसरीकडे कारखाना कामगारांना 20 टक्के बोनस जाहीर झाला असून, यामधील 15 टक्के बोनस दिवाळीसाठी व उर्वरित 5 टक्के बोनस मकर संक्रांती दरम्यान दिला जाणार असल्याची माहिती कार्यकारी संचालक अशोक पाटील यांनी दिली.
खोडवा उत्पादकांना 150 रुपये प्रति टन
खोडवा ऊस उत्पादकांना 150 रुपये प्रति टन तर व्हरायटी उसासाठी 100 रुपये प्रति टन खत स्वरूपात अनुदान मिळणार आहे. एकूणच खोडवा ऊस उत्पादक सभासदांना 3600 रुपये प्रति टन तर व्हरायटी ऊस उत्पादकांना 3550 रुपये प्रति टन मिळतील.
9 कोटी 36 लाखांची तरतूद
माळेगाव कारखाना प्रशासनाने ऊस बिलापोटी 11 कोटी 97 लाख रुपये, कामगारांच्या 15 टक्के बोनस रकमेसाठी 3 कोटी 81 लाख तर नुकतीच दिलेली ठेवीवरील व्याजाची रक्कम 3 कोटी 58 लाख अशी एकूण 19 कोटी 36 लाख रुपयांची तरतूद केल्याचे प्रशासनाकडून सांगण्यात आले.