पुणे: कोंढवा परिसरातील एका बांधकाम प्रकरणात खंडणी, दमदाटी आणि महानगरपालिकेकडे खोट्या तक्रारी करून बांधकामावर कारवाई घडवून आणल्याचा प्रकार उघडकीस आला आहे.
दरम्यान, तक्रारी न करण्यासाठी तसेच बांधकाम नियमित करून देण्यासाठी बांधकाम व्यावसायिकाकडे 25 लाख रुपये, तसेच एका सदनिकेची मागणी करून बांधकाम बंद पाडण्याचा धाक दाखवून 15 लाख रुपये खंडणी उकळल्याचा प्रकार समोर आला आहे.
या प्रकरणी कोंढवा पोलिसांनी शफी गुलजारखान पठाण, समीर शफी पठाण, साजिद हसन शेख आणि कमल नितीन खैरनार या चौघांच्या विरुद्ध गुन्हा दाखल केला आहे. याबाबत 36 वर्षीय व्यावसायिकाने फिर्याद दिली आहे.
फिर्यादी हे लेबर कॉन्ट्रॅक्टर असून, त्यांनी 2024 मध्ये मौजे कोंढवा खुर्द येथे जागा आणि जुनी इमारत सुमारे 60 लाख रुपयांत खरेदी केली आहे. त्यानंतर त्यांनी तेथे नवीन बांधकाम सुरू केले होते. बांधकाम सुरू झाल्यानंतर आरोपी शफी पठाण यांनी “मला विचारल्याशिवाय या भागात कोणी बांधकाम करत नाही,” असे म्हणत दमदाटी केली.
तसेच, पुणे महानगरपालिकेत तक्रार करून कारवाई करण्याची धमकी दिली. काही दिवसांनी महापालिकेने बांधकामावर कारवाई करून मोडतोड केल्याचे फिर्यादित म्हटले आहे. यानंतर आरोपींनी 25 लाख रुपये आणि एक 2 बीएचके फ्लॅट देण्याची मागणी केल्याचा आरोप आहे. फिर्यादीने भीतीपोटी वेगवेगळ्या टप्प्यांत एकूण 15 लाख रुपये रोख आणि बँक व्यवहाराद्वारे दिल्याचा दावा केला आहे.