पुणे: बालेवाडीतील गोविंदनगर परिसरात बालविवाह झाल्याचा प्रकार समोर आला आहे. दरम्यान, या विवाहाची माहिती मिळताच बाणेर पोलिस तेथे पोहोचले. पोलिसांनी विवाहात मिळालेले फोटोग््रााफस् आणि इतर पुरावे पाहून नवरा मुलगा शिवम नारायण पवार (वय 22, रा. गोविंदनगर, बालेवाडी) यांच्यासह त्याचे आई, वडील, मुलीची आई, नातेवाईक, पुरोहित, फोटोग््रााफरसह उपस्थित असणाऱ्या 30 ते 35 जणांवर बालविवाह प्रतिबंधक कायदा 2006 नुसार गुन्हा दाखल केला आहे.
याप्रकरणी पोलिस कर्मचारी अभिजित रामदास घाटोळे (वय 35) यांनी बाणेर पोलिस ठाण्यात फिर्याद दिली आहे. हा प्रकार रविवारी (दि.10) दुपारी सव्वाएक वाजण्याच्या सुमारास घडला आहे.
पोलिसांनी दिलेल्या माहितीनुसार, बालेवाडीतील गोंविदनगर शिवकृपा डेअरी जवळ बालविवाह होत असल्याची माहिती रविवारी दुपारी दीडच्या सुमारास पोलिसांच्या नियंत्रण कक्षाला मिळाली होती. त्यानुसार बाणेर पोलिस विवाहस्थळी पोहोचले.
त्यांनी मुलीच्या वयाची चौकशी केली. तिचे वय 14 वर्षे 8 महिने असल्याचे समोर आले. आरोपींनी मुलगी अल्पवयीन असल्याचे माहीत असताना सुद्धा तिचा विवाह लावून दिला. मुलगी अल्पवयीन असल्याचे माहिती असताना देखील आरोपींनी पोलिस किंवा इतर कोणत्याही शासकीय कार्यालयास बालविवाह होण्यापूर्वी माहिती दिली नसल्याचे फिर्यादित नमूद केले आहे.
अल्पवयीन मुलीला महिला आधार गृहात पाठविण्यात आले आहे. तर, नवऱ्या मुलासह उपस्थितांना नोटीस बजावण्यात आली आहे. याप्रकरणाचा पुढील तपास सहायक पोलिस निरीक्षक केकान करीत आहेत.
