बारामती : ६४ व्या महाराष्ट्र राज्य हौशी मराठी नाट्य स्पर्धेत पुणे केंद्रातून प्रथम क्रमांक पटकावलेल्या 'कर्ण' या नाटकाचे दिल्ली येथे दोन विशेष नाट्यप्रयोग आयोजित करण्यात आले आहेत.
हे नाटक नटराज नाट्य कला मंडळ, बारामती यांनी सादर केले असून या नाटकाने पुणे केंद्रात नुकताच प्रथम क्रमांक मिळविला आहे. दिल्लीतील प्रयोग कारवा ग्रुप यांच्या सहकार्याने होणार आहे, अशी माहिती नटराज नाट्य कला मंदिर संस्थेकडून देण्यात आली.
महाभारतातील कर्णाच्या जीवनावर आधारित हे नाटक सामाजिक, मानवी व भावनिक संघर्ष प्रभावीपणे उलगडून दाखवते. नाटकाचे लेखक व दिग्दर्शक कुलविंदर बक्शीश सिंह असून त्यांच्या प्रभावी दिग्दर्शनामुळे नाटकाला विशेष उंची प्राप्त झाली आहे.
हे दोन नाट्यप्रयोग शनिवारी (दि. २०) दुपारी ४ वाजता व सायंकाळी ६.३० वाजता दिल्ली येथील कामिनी ऑडिटोरियम येथे होणार आहेत. दिल्ली व परिसरातील मराठी नाट्यरसिकांनी या दर्जेदार नाट्यकृतीचा लाभ घ्यावा, असे आवाहन आयोजकांच्या वतीने करण्यात आले आहे.