पुणे: ज्ञानेश कुमार यांच्या राजीनाम्याच्या मागणीसाठी देशभरात सुरू असलेल्या आंदोलनाला पाठिंबा देण्यासाठी पुण्यात सलग दुसऱ्या दिवशी कॉकरोच जनता पार्टीच्या वतीने फर्ग्युसन महाविद्यालय रस्त्यावरील गुडलक कॅफेजवळील कलाकार कट्ट्याच्या परिसरात आंदोलन करण्यात आले. या वेळी विद्यार्थी आंदोलकांनी जोरदार घोषणाबाजी केली.
'तानाशाही नहीं चलेगी', 'वंदे मातरम्', 'इन्कलाब जिंदाबाद', 'ज्ञानेश कुमार राजीनामा द्या' आणि 'जब जब मोदी डरता है, पुलिस को आगे करता है' अशा घोषणांनी परिसर दणाणून गेला. दरम्यान, आंदोलनादरम्यान पोलिसांनी विद्यार्थी आंदोलकांना ताब्यात घेतले.
पोलिस उपआयुक्त कृषिकेश रावले म्हणाले, सोशल मीडियावरून आवाहन केल्यामुळे कलाकार कट्ट्यावर मोठ्या संख्येने लोक जमले. त्यामुळे परिसरात सुमारे ५०० मीटरपर्यंत वाहतूक कोंडी झाली.
या गर्दीमुळे सामान्य नागरिक आणि कलाकारांची गैरसोय होत होती. पोलिसांनी वारंवार सूचना देऊनही गर्दी हटत नसल्याने आणि कायदा-सुव्यवस्थेचा प्रश्न निर्माण होण्याची शक्यता असल्याने कारवाई करण्यात आली.
वाहतूक कोंडीत गॅस सिलिंडरची गाडी अडकल्याने संभाव्य दुर्घटना टाळण्यासाठी संबंधितांना कायदेशीर प्रक्रिया पूर्ण करून सुरक्षित ठिकाणी हलविण्यात आले. रस्ता अडवून नागरिकांची गैरसोय करणे योग्य नसून, नियमांचे उल्लंघन करणाऱ्यांवर नियमानुसार कारवाई करणे पोलिसांचे कर्तव्य असल्याचेही त्यांनी स्पष्ट केले.