पुणे: निवडणुका जवळ आल्या की राजकीय पक्ष एकमेकांवर आरोप करतात, टीका करतात. सध्या हेच चित्र भाजप आणि राष्ट्रवादी काँग्रेसमध्ये पाहायला मिळत आहे. पुणे आणि पिंपरी-चिंचवड महापालिकेवर मागील काही वर्षांपासून भाजपची सत्ता आहे. शहरातील खराब रस्ते, वाढती वाहतूक कोंडी, कचऱ्याचा प्रश्न, पाणीटंचाई आणि भ्रष्टाचार हे मुद्दे नेहमी चर्चेत असतात. राष्ट्रवादी काँग्रेसचे नेते म्हणतात की, भाजपच्या काळात शहरांचा विकास अपेक्षेप्रमाणे झाला नाही.
याच मुद्द्यांवरून उपमुख्यमंत्री अजित पवार यांनी काही दिवसांपूर्वी पुणे आणि पिंपरी-चिंचवडमधील कामकाजावर टीका केली. त्यांनी थेट भाजपच्या स्थानिक नेत्यांना जबाबदार धरले. अजित पवारांच्या या वक्तव्यामुळे भाजपचे नेते आक्रमक झाले.
यानंतर भाजपचे आमदार महेश लांडगे यांनी अजित पवारांवर जोरदार टीका केली. अजित पवार हे पुण्याचे आणि महाराष्ट्राचे ‘आका’ असल्याचं त्यांनी म्हटलं. यामुळे मोठा वाद निर्माण झाला. लांडगे यांनी अजित पवार स्वतःवरील आरोप झाकण्यासाठी भाजपमध्ये आले, असा आरोपही केला. त्यामुळे हा विषय केवळ राजकीय टीकेपुरता मर्यादित राहिला नाही.
या सगळ्यावर अजित पवारांनी प्रतिक्रिया दिली नाही. “मी कोण आहे, हे जनता ठरवेल,” असे त्यांनी सांगितले. योग्य वेळी उत्तर देईन, असे म्हणत त्यांनी विषय संपवला. त्यांनी केवळ शहरातील प्रश्न मांडले असून कुणावर वैयक्तिक हल्ला केलेला नाही, अशी त्यांची भूमिका होती.
यानंतर राष्ट्रवादी काँग्रेसचे आमदार अमोल मिटकरी पुढे आले. त्यांनी महेश लांडगे यांच्या वक्तव्यावर टीका केली. आम्ही लांडग्यांकडे लक्ष देत नाही, राष्ट्रवादी काँग्रेसचा वारसा हा शरद पवार आणि अजित पवारांचा आहे ते सिंह आणि वाघ आहेत, असं म्हणत अमोल मिटकरी यांनी महेश लांडगेंचा समाचार घेतला.
अशा आरोपांवर अजित पवार लक्ष देत नसल्याचा टोला त्यांनी लगावला. यावेळी त्यांनी संत तुकारामांच्या अभंगाचा दाखलाही दिला. "भुंकणाऱ्या कुत्र्यांना भुंकू द्या, त्यांच्याकडे लक्ष देऊ नका'' असा टोलाही त्यांनी लगावला. महापालिका निवडणुका जवळ येत असताना भाजप आणि राष्ट्रवादी काँग्रेसमधील आरोप-प्रत्यारोप वाढताना दिसत आहेत.