संगमनेर: डॉ. काकोडकर समितीला दिलेली साठ दिवसांची मुदत पुर्ण झाली असून नाशिक-पुणे सेमी हायस्पीड रेल्वे मार्ग अकोले-संगमनेर मार्गेच व्हावा, यासाठी काल शनिवारी (दि. ३) बस स्थानक परिसरात नागरिकांच्या वतीने जागरण गोंधळ आंदोलन करण्यात आले.
नाशिक-पुणे रेल्वे मार्ग सुरुवातीला संगमनेर-अकोले मार्गेच मंजूर झाला होता. सर्वेक्षण होवून जमीन अधिगृहीत करण्यात आली होती. मात्र नंतर नारायणगाव येथील दुर्बिणीचे कारण देत मार्गात बदल करण्यात आला. या विरोधात सिन्नर, संगमनेर, अकोले, नारायणगाव, मंचर, चाकण परिसरातील नागरिकांनी तीव्र नाराजी व्यक्त केली. विविध राजकीय पक्षांचे पदाधिकारी, कार्यकर्ते, संघटनांनी आक्रमक भूमिका घेत दोन महिन्यापूर्वी रास्ता रोको आंदोलन केले होते.
याची दखल घेत राज्य शासनाने या रेल्वे मार्गाबाबत अभ्यास करण्यासाठी डॉ. काकोडकर याचे अध्यक्षतेखाली समिती स्थापन करण्यात आली. याला साठ दिवसांची मुदत देण्यात आली होती. मात्र मुदत संपूनही काहीच हालचाल न झाल्याने शासनाचे लक्ष वेधण्यासाठी संगमनेर बसस्थानकावर काल शनिवारी दुपारी जागरण गोंधळ आंदोलन करण्यात आले.
यावेळी आंदोलन करणाऱ्या नागरिकांनी शासनाच्या दुटप्पी भुमिकेचा निषेध केला. जुन्या मार्गे नाशिक, सिन्नर, संगमनेर, नारायणगाव, मंचर, चाकण मार्गेच रेल्वे झाली पाहिजे, अशी मागणी केली. या मागणीसाठी देवगाव ग्रामस्थ रेल्वे कृती समितीच्या वतीने संगमनेर बसस्थानकाच्या मुख्य प्रवेशद्वाराजवळ जागरण गोंधळ आंदोलन करण्यात आले.
या आंदोलनात देवगाव ग्रामस्थ, रेल्वे समर्थक आणि नागरिक सहभागी झाले होते. मधुसूदन शिंदे, रविंद्र लामखडे, कोमल म्हस्के, शंकर पावसे, शिबा गायकवाड, दत्ता ढगे, सागर कोल्हाळ, संजय देशमुख, संतोष शिंदे, मुकुंद शिंदे, तुषार पानसरे आणि किरण देशमुख, भाऊसाहेब वाकचौरे, विनय सावंत, राजाभाऊ अवसक, गणपत लामखडे आदी कार्यकर्ते उपस्थित होते. यावेळी मुख्यमंत्री देवेंद्र फडणवीस यांना नायब तहसीलदार माळवे यांच्याकडे निवेदन देण्यात आले.