Ahilyanagar DJ Noise Pollution Case: मोठ्या आवाजातील डीजेप्रकरणी नगरात पहिल्यांदाच न्यायालयात खटले

नगर: सर्वोच्च न्यायालयाच्या निर्देशानुसार जास्तीच्या आवाजात डीजे वाजविणे मंडळाच्या अध्यक्षांसह चालक-मालकाला चांगलेच महागात पडले आहे. शहरातील चार गुन्ह्यात संबंधितविरोधात न्यायालयात खटला दाखल करण्यात आला आहे. डीजेच्या गुन्ह्यात पहिल्यांदाचा न्यायालयात खटला दाखल झाला आहे.

सार्वजनिक उत्सव व मिरवणुकांमध्ये आता पारंपरिक वाद्यांऐवजी डीजेचा दणदणाट होत आहे. पर्यावरण, ध्वनी प्रदूषण काद्यानुसार 55 डेसिबलच्या पुढे डीजेचा आवाज वाढविणे जीवितास हानीकारक आहे. त्यामुळे सर्वेाच्च न्यायालयाच्या निर्देशानुसार 55 डेसिबलच्या आत आवाज असणे आवश्यक आहे. परंतु, सार्वजनिक मिरवणुकांमध्ये नियमांची पायमल्ली करून मोठ्या आवाजात डीजे वाजविला जातो. यापूर्वी 55 डेसिबलच्या पुढे आवाज गेल्यानंतर मंडळ अध्यक्ष व चालक मालकाविरोधात गुन्हे दाखल झाले होते. त्यांच्यावर केवळ दंडात्मक कारवाई केली जात होती.

पहिल्यांदाच नगर शहराचे पोलिस उपअधीक्षक डॉ. दिलीप टिपरसे यांनी ध्वनी प्रदूषण कायद्यातील कलम 15 नुसार गेल्या काही दिवसांत शहरात घडलेल्या गुन्ह्याचे दोषारोपपत्र न्यायालयात सादर केले आहे. त्यात झेंडा मिरवणुकीत आणि छत्रपती शिवाजी महाराज जयंती मिरवणुकीत डीजे वाजविणारी मंडळे व चालक मालकाचा समावेश आहे. डीजेच्या गुन्ह्यात न्यायालयात खटला सुरू होणार आहे. त्यामुळे आरोपींना कडक शासन होण्याची शक्यता नाकारता येत नाही.

यांच्यावर सुरू होणार खटला

झेंडा मिरवणूक: जलूस गरीब नवाज कमिटी तख्ती दरवाजा अध्यक्ष महमंद हुसेन हाफीज शेख, डीजे चालक-मालक जावेद आयुब शेख, शिवजयंती उत्सव: श्री शंभूराजे प्रतिष्ठाण, जनता गॅरेज मंडळ टी पाईंट सावेडी अध्यक्ष प्रतीक नवनाथ तागड (रा. सावेडी), डीजे चालक मालक महेश चर्तभुज कर्डिले (रा. कर्डिलवाडी, ता. शिरूर, जि. पुणे). श्री छत्रपती शिवाजी महाराज जन्मोत्सव समिती नालेगाव, अध्यक्ष मयूर शुभम साठे (रा. नालेगाव), डीजे चालक मालक सचिन वामन आयटे (रा. यरोडा, पुणे), पहिलवान प्रतिष्ठान मंडळ अहिल्यानगर, दर्शन अभय बोरा (रा. माळीवाडा), डीजे चालक-मालक अनिल गणेश पोकळे (रा. वडगाव बुद्रुक, पुणे) अशी खटला दाखल झालेल्यांची नावे आहेत.