Mumbai Local Ladies Compartment Viral Video: मुंबई लोकलमध्ये प्रवास करताना घाईगडबडीत डबा चुकण्याच्या घटना घडत असतात. मात्र, एका तरुणाची चूक त्याच्या जीवावर बेतण्याची शक्यता निर्माण झाली होती. महिलांच्या डब्यात चुकून चढलेल्या या तरुणाला आपली चूक लक्षात आल्यानंतर त्याने चालत्या लोकलमधून उतरण्याचा प्रयत्न केला.
मात्र, प्रसंगावधान राखत डब्यातील महिलांनी त्याला पकडून मागे खेचलं आणि संभाव्य दुर्घटना टळली. या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत आहे.
व्हायरल व्हिडिओमध्ये एक तरुण मुंबई लोकलच्या महिलांच्या डब्यात उभा असल्याचं दिसत आहे. काही वेळाने त्याला आपण चुकीच्या डब्यात चढल्याचं लक्षात येतं. महिलांनीही त्याला याबाबत सांगितल्यानंतर तो घाबरल्याचं व्हिडिओत दिसतं.
आपली चूक लक्षात आल्यानंतर तरुणाने ट्रेन थांबण्याची वाट न पाहता चालत्या ट्रेनमधून उतरण्याचा प्रयत्न केला. मात्र, हा प्रयत्न अत्यंत धोकादायक असल्याचं लक्षात येताच डब्यातील महिलांनी त्याला अडवलं.
तरुण दरवाजाजवळ जाण्याचा प्रयत्न करत असताना काही महिलांनी त्याला पकडून आत खेचलं. चालत्या ट्रेनमधून उडी मारल्यास गंभीर दुखापत होऊ शकते किंवा जीवाला धोका निर्माण होऊ शकतो, त्यामुळे महिलांनी त्याला बाहेर पडू दिलं नाही.
यानंतर तरुण महिलांसमोर हात जोडून माफी मागताना दिसतो. तो वारंवार आपली चूक झाल्याचं सांगत असल्याचं व्हिडिओमध्ये दिसत आहे. अखेर लोकल पुढच्या स्थानकावर पोहोचल्यानंतर त्याने ट्रेनमधून उतरण्याचा निर्णय घेतला.
या घटनेचा व्हिडिओ समोर आल्यानंतर सोशल मीडियावर मोठ्या प्रमाणात प्रतिक्रिया येत आहेत. काही नेटकऱ्यांनी घाईगडबडीत प्रवास करताना डबा चुकण्याची शक्यता असल्याचं म्हटलं आहे. मात्र, चालत्या ट्रेनमधून उतरण्याचा प्रयत्न करणे अत्यंत धोकादायक असल्याने महिलांनी दाखवलेली प्रसंगावधानता महत्त्वाची ठरली, असंही अनेकांनी नमूद केलं.