मुलुंड : मुलुंड परिसरातील एका 70 वर्षीय निवृत्त व्यक्तीला सायबर ठगांच्या एका टोळीने बनावट ड्रग्ज पार्सल प्रकरणात डिजिटल अरेस्टची धमकी देत सुमारे 40 लाख रुपयांची फसवणूक केली. पूर्व विभाग सायबर सेलने फसवणूक व माहिती तंत्रज्ञान कायद्याच्या तरतुदींनुसार चार आरोपींविरुद्ध गुन्हा दाखल केला आहे.
पोलीस सूत्रांकडून मिळालेल्या माहितीनुसार, मुलुंडमधील सर्वोदयनगरमध्ये एकटे राहणाऱ्या तक्रारदाराचे दोन्ही मुलगे अमेरिकेत स्थायिक आहेत. गतवर्षी डिसेंबरमध्ये त्याला कुरिअर कंपनीचा अधिकारी असल्याचा दावा करणाऱ्या एका अज्ञाताचा फोन आला. कॉलरने त्यांना सांगितले की, ज्येष्ठ नागरिकाच्या आधार तपशीलांचा वापर करून बँकॉकला पाठवलेले पार्सल कस्टम अधिकाऱ्यांनी रोखले आहे आणि त्यात आक्षेपार्ह साहित्य आहे.
त्यानंतर तो कॉल सायबर सेल अधिकारी असल्याचे भासवून दुसऱ्या व्यक्तीकडे पाठवण्यात आला. अमित म्हणून ओळख सांगणाऱ्या त्या व्यक्तीने पार्सलमध्ये ड्रग्ज सापडल्याचा दावा केला आणि हे प्रकरण एका प्रमुख आमदाराशी जोडले. त्याने तक्रारदाराला त्याच्या सुरक्षेला धोका असल्याचे सांगून या प्रकरणाबद्दल कोणाशीही बोलू नये अशी ताकीद दिली आणि तपासात सहकार्य करण्यासाठी दबाव आणला.
वृद्ध व्यक्तीने कोणताही सहभाग नाकारला व परदेशात कोणतेही पार्सल पाठवले नसल्याचे सांगूनही फसवणूक करणारा त्याला अटक आणि तुरुंगवासाच्या धमक्या देत राहिला. त्याने तक्रारदाराला त्याच्या आर्थिक परिस्थितीबद्दल विचारपूस केली, त्याच्याकडे मोठ्या प्रमाणात पैसे असल्याचा आरोप केला आणि त्याला डिजिटल अटकची धमकी दिली. त्याला त्याच्या घरातच बंदिस्त केले जाईल, कोणाशीही संपर्क साधण्यास मनाई केली जाईल व सतत पोलिसांच्या देखरेखीखाली ठेवले जाईल, असेही त्याला धमकावले.
यावेळी तक्रारदाराने भीतीपोटी सुमारे 40 लाख रुपये अनेक बँक खात्यांमध्ये ट्रान्सफर केले.यावेळी पडताळणी पूर्ण झाल्यानंतर पैसे परत केले जातील, असे आश्वासन तक्रारदाराला देण्यात आले. काही दिवसांनंतर आरोपीने पुन्हा त्यांच्याशी संपर्क साधत आता चौकशी संपली आहे आणि कोणालाही अटक केली जाणार नाही. तसेच दोन टक्के रक्कम वजा केल्यानंतर रक्कम परत केली जाईल, असे आश्वासन दिले. तथापि, पैसे तर परत केले नाहीच शिवाय त्यानंतर आरोपीने कॉलला उत्तर देणे बंद केले.
फसवणूक झाल्याचे लक्षात येताच, ज्येष्ठ नागरिकाने स्थानिक पोलीस आणि पूर्व सायबर सेलकडे तक्रार दाखल केली. पडताळणीनंतर, पोलिसांनी भारतीय न्याय संहिता आणि आयटी कायद्याच्या संबंधित कलमांखाली चार अज्ञात सायबर गुन्हेगारांविरुद्ध एफआयआर दाखल केला. फसवणुकीत वापरल्या जाणाऱ्या बँक खात्यांचा शोध घेण्यासाठी आणि खातेधारकांची ओळख पटवण्यासाठी सध्या प्रयत्न सुरू आहेत, असे पोलिसांकडून सांगण्यात आले.