कुरुंदवाड : पुढारी वृत्तसेवा
पंचगंगा नदीच्या पाणी पातळीत मोठ्या प्रमाणात वाढ झाली आहे. कुरुंदवाड येथील शिवतीर्थ रस्ता ओलांडून 1 फुटाने रस्त्यावरून पाणी वाहू लागले आहे. तसेच हेरवाड-तेरवाड मार्गावर पाणी खेळू लागले आहे. कुरुंदवाड-मजरेवाडी रस्त्यावर पाणी आल्याने मार्ग बंद झाला आहे. रात्रीच पंचगंगेचे पाणी शिवतीर्थ रस्त्यावर पडल्याने शहरातील 70 टक्के नागरिक स्थलांतरीत झाले आहेत. तर पालिका प्रशासनातर्फे नृसिहवाडीपर्यंत ट्रॅक्टरने स्थलांतर केले जात आहे.
पंचगंगा नदीच्या पाणी पातळीत रात्रीत वाढ झाली आहे. पंचगंगा नदीचा प्रवास शिवतीर्थ जवळून रस्ता ओलांडून शहरातून बस्तवाड मार्गे कृष्णा नदीच्या दिशेने प्रवास सुरू झाला आहे. आणखीन पाणी पातळी वाढणार या भीतीने 70 टक्के गावातील नागरिक स्थलांतरीत झाले आहेत, तर काही नागरिक स्थलांतर होत आहेत. सकाळपासून उर्वरित नागरिक ही स्थलांतर होत आहेत.
हेरवाड तेरवाड दरम्यानच्या सलगर सदलगा राज्य मार्गावर ही पाणी खेळू लागले आहे. अशीच पाणी पातळी वाढली तर दुपारपर्यंत हा मार्ग देखील बंद होण्याची शक्यता आहे. तसेच कृष्णा नदीचे पाणी कुरुंदवाड दरम्यानच्या मजरेवाडी रस्त्यावरील बीपीएड कॉलेज समोरून रस्त्यावर आल्याने हा रस्ता देखील वाहतुकीसाठी बंद झाला आहे.
शिवतीर्थ येथे वजीर रेस्क्यू फोर्स, इंडियन रेड क्रॉस सोसायटी रेस्क्यू फोर्स, व्हाईट आर्मी रेस्क्यू फोर्सचे जवान शिवतीर्थावर नागरिकांना नृसिंहवाडीपर्यंत स्थलांतर करण्यासाठी कार्यरत आहेत.