पळसदेव : लडाख, नेपाळ, अफगाणिस्तान, मंगोलिया या ठिकाणी वास्तव्याला असणार्‍या आणखी काही मनमोहक स्थलांतरित चक्रवाक बदकांचे उजनी परिसरात आगमन झाले आहे.
उजनी धरणातील विशेष आकर्षण असलेल्या रोहित व पट्टकदंब हंसांच्या आगमनानंतर चक्रवाक बदकांच्या आगमनामुळे उजनीच्या पक्षिवैभवात भर पडली आहे. टाडोर्ना पेरुगिनिया असे शास्त्रीय नाव असलेल्या हंस गणातील या बदकाला इंग्रजीत ब्रह्मणी डक तसेच रूढी शेल्डक या नावाने ओळखतात.
ब्राह्मणी बदक, चकवा चकवी व सोनेरी बदक, अशी मराठीतील नावे या विदेशी बदकाला आहेत. संपूर्ण अंगावर बदामी किंवा भगव्या रंगाचा सोनेरी पिसे असलेल्या या बदकाचे डोके व मान केतकी रंगाचे आहे. शेपटी काळ्या रंगाची असते. ही बदके नेहमीच्या बदकांपेक्षा आकाराने मोठी असतात. जोडी करून वावरणार्‍या नर व मादी बदकांमध्ये फारसा फरक आढळत नाही. मात्र, बारकाईने निरीक्षण केल्यास नराच्या गळ्यातील काळ्या पट्टीमुळे नर ओळखता येतो.
हेही वाचा