नाशिक (पंचवटी) : पुढारी वृत्तसेवा
पंचवटी परिसरात दोन दिवसांपूर्वी राहत्या घरात पिता-पुत्राचे मृतदेह आढळले होते. यात पित्याने गळफास घेतल्याचे निष्पन्न झाले होते. मात्र, मुलाच्या मृत्यूबाबत गूढ होते. या प्रकरणी पंचवटी पोलिसांनी केलेल्या चौकशीत मुलाच्या हट्टी स्वभावाला कंटाळून वैफल्यग्रस्त झालेल्या पित्यानेच त्याचा झोपेत गळा आवळून खून केल्याचा उलगडा झाला आहे.
सीतागुंफा येथील रेवास्वामी सोसायटीत गुरुवारी (दि. 19) सकाळी सातच्या सुमारास जगदीश पुंडलिक जाधव (48) यांनी गळफास घेत आत्महत्या केल्याची घटना उघडकीस आली होती. तसेच त्यांचा मुलगा प्रणव जगदीश जाधव (17) यांचाही मृत्यू झालेला होता. या घटनेचा तपास सहायक पोलिस निरीक्षक प्रतीक पाटील यांच्याकडे होता.
दोन्ही मृतदेहांवर गुरुवारी जिल्हा शासकीय रुग्णालयात शवविच्छेदन करण्यात आले असून, शुक्रवारी त्याचा अहवाल प्राप्त झाला. त्यामध्ये जगदीश जाधव यांचा गळफासाने मृत्यू झाल्याचे, तर प्रणव जाधव याचा गळा आवळून मृत्यू झाल्याचे अहवालातून निष्पन्न झाले. या अहवालाच्या अनुषंगाने आणि जगदीश यांच्या पत्नीने दिलेल्या माहितीनुसार पोलिसांनी मृत जगदीश जाधव यांच्या विरोधात मुलाच्या खुनाचा गुन्हा दाखल केला आहे. वरिष्ठ पोलिस निरीक्षक डॉ. सीताराम कोल्हे यांच्या मार्गदर्शनाखाली पोलिस निरीक्षक (प्रशासन) रणजित नलवडे हे या गुन्ह्याचा अधिक तपास करीत आहेत.
स्वतःही घेतला गळफास…
पंचवटी पोलिसांनी जगदीश जाधव यांच्या पत्नी शोभा जाधव (44) यांच्याकडे चौकशी केली. यात त्यांनी दिलेल्या तक्रारीनुसार पती जगदीश जाधव यांनी त्यांचा मुलगा प्रणव याचा हट्टी स्वभाव, उलटून बोलणे, हात उगारणे, वाईट शिवीगाळ करणे यास कंटाळून नैराश्यातून त्याचा झोपेतच गळा आवळून जिवे ठार मारले व स्वतःही गळफास घेऊन आत्महत्या केली.