नवी दिल्ली ; पुढारी वृत्तसेवा
इंधनाचे दर गेल्या काही दिवसांपासून स्थिर असताना, सीएजनीच्या वाढत्या दरांच्या झळा सर्वसामान्यांना बसत आहेत. राजधानी दिल्लीत शनिवारी (दि.२१) सकाळी ६ वाजल्यापासून सीएनजी दरात २ रुपयांची वाढ करण्यात आली आहे. गेल्या सहा दिवसांमध्ये सीएनजीमध्ये दुसऱ्यांदा दरवाढ झाली आहे. १५ मे रोजीच दिल्लीतील सीएनजी दरात २ रुपयांची वाढ करण्यात आली होती.
नवीन दरवाढीनंतर राजधानी दिल्लीत सीएनजीचे दर प्रतिकिलो ७५.६१ रुपयांपर्यंत पोहचले आहेत. तर, राष्ट्रीय राजधानी क्षेत्रातील नोएडा, ग्रेटर नोएडा, गाझियाबादमध्ये देखील २ रुपयांच्या दरवाढीनंतर सीएनजीचे दर ७८.१७ रुपयांवर पोहचले आहेत. एनसीआर मधील गुरूग्राम मध्ये सीएनजीचे दर सर्वाधिक नोंदवण्यात आले आहे. येथे ८३.९४ रुपये प्रतिकिलो सीएनजीचे दर पोहचले आहेत.
दरम्यान देशातील पेट्रोल-डिझेलचे दर गेल्या महिन्याभरापासून स्थिर आहेत. मात्र शनिवारी (दि.२१) दिल्लीत पेट्रोलचा दर १०५.४१ रुपये तर, डिझेलचे दर ९६.६७ रुपये नोंदवण्यात आला. दिल्ली शेजारील नोएडात पेट्रोल १०५.४७ आणि डिझेल ९७.०३ रुपयांपर्यंत पोहचले आहे.