वैजापूर; पुढारी वृत्तसेवा : दोन आयशर ट्रकच्या झालेल्या भीषण अपघातात 4 जणांचा जागीच मृत्यू झाला तर अन्य 35 जण गंभीर जखमी झाल्याची घटना 30 जानेवारी रोजी मध्यरात्रीच्या सुमारास घडली. ही घटना नागपूर-मुंबई महामार्गावरील तालुक्यातील शिवराई गावाजवळ घडली. मृतांमध्ये दोन महिलांसह 17 वर्षीय युवती व एका 8 वर्षीय मुलीचा समावेश आहे. मृत व जखमी हे नाशिक येथील अंबड परिसरातील रहिवासी आहेत.
कविता आबासाहेब वडमोर(45), प्रज्ञा गौतम गायकवाड (17), मोनू दीपक वाव्हळे (8) व ललिता पुंडलिक पवार (45) सर्व रा. अंबड, गौतमनगर, नाशिक अशी अपघातात ठार झालेल्यांची नावे आहेत.
याबाबत मिळालेली माहिती अशी की, नाशिकमधील अंबड इथले नागरिक आयशर ट्रकमधून लग्नासाठी जालना जिल्ह्यातील मंठा येथे गेले होते. लग्नसमारंभ झाल्यावर पुन्हा नाशिककडे ते परतत होते. त्यावेळी वैजापूरहून औरंगाबादच्या दिशेने जाणाऱ्या मालवाहू आयशर ट्रकला समोरासमोर धडक होऊन झालेल्या भीषण अपघातात चौघेजण ठार तर जवळपास 35 जण गंभीर जखमी झाले. यातील तिघेजण कविता वडमोर, प्रज्ञा गायकवाड व मोनू वाव्हळे या तिघी जागीच ठार तर ललिता पवार ही महिला नाशिकला उपचारासाठी नेत असताना गतप्राण झाली.
ही घटना 30 जानेवारी रोजी रात्री 2.30 वाजेच्या सुमारास नागपूर-मुंबई महामार्गावरील शिवराई गावाजवळ घडली. आयशरमध्ये जवळपास 40 वऱ्हाडी होते. यातील काही जखमींना औरंगाबाद व नाशिक येथे हलविण्यात आले आहे. घटनेची माहिती मिळताच वैजापूर पोलिसांनी घटनास्थळी धाव घेऊन स्थानिक ग्रामस्थांच्या मदतीने जखमी वऱ्हाडींना रुग्णवाहिकेव्दारे वैजापूर येथील उपजिल्हा रुग्णालयात उपचारासाठी दाखल केले.
यातील तिघांना तपासून डॉक्टरांनी मृत घोषित केले. दरम्यान घटनेनंतर दोन्हीही वाहनांचा चक्काचूर झाला आहे. वैजापूर पोलिस ठाण्याचे पोलिस निरीक्षक सम्राटसिंह राजपूत व त्यांचे सहकारी घटनास्थळी जाऊन अपघातग्रस्त वाहनांची पाहणी करून पंचनामा केला.
हेही वाचा
