डोंबिवली; पुढारी वृत्तसेवा : तुमच्या घरावर करणी बाधा झाली असून मी तुम्हाला ही करणी बाधा दूर करण्यासाठी मदत करते असे सांगून वयोवृद्धाची लूट करणाऱ्या एका महिलेला मानपाडा पोलिसांनी अटक केली आहे. या महिलेकडून 15 लाख 87 हजार 700 रुपयाचे सोन्याचे दागिने, रोख रक्कम, तसेच वस्तू हस्तगत करण्यात आल्या आहेत. या गुन्ह्यात आणखी एक महिलेचा समावेश असून ती फरार आहे.
त्रिशा केळुसकर असे महिला आरोपीचे नाव असून तिला मदत करणाऱ्या महिलेचे नाव मारियम असे आहे. ज्येष्ठ नागरिकाच्या पत्नीचे निधन झाले असून मुलगा परदेशी राहत आहे. खोणी पलावा येथे घरात एकटेच राहत असल्याने त्यांनी जेवण बनवण्यासाठी आरोपी त्रिशाला सांगितले. मात्र तिने वयोवृद्धांच्या एकटेपणाचा फायदा घेत तुमच्या घरावर कोणीतरी करणी केली असून एक आत्मा घरात फिरत असल्याचे सांगितले. तुमच्या जीवाला धोका असून तुमच्यावरील संकट मंत्र- तंत्राच्या सहाय्याने दूर करेन, असे सांगून त्यांच्याकडून सोने चांदीचे दागिने मागून घेतले. त्यांनतर त्यांना भुरळ घालून दोन दिवस तुमच्या दुसऱ्या घरी जाऊन राहा, मी या घराची शांती करून घेते असे सांगितले. त्यानुसार ज्येष्ठ नागरिक त्यांच्या दुसऱ्या घरी राहण्यासाठी गेले. याचवेळी त्रिशाने सर्व घर लुटून नेले. घरी परतल्यानंतर आपली फसवणूक झाल्याचे लक्षात येताच त्यांनी मानपाडा पोलीस ठाण्यात धाव घेतली. पोलिसांनी तातडीने पाऊले उचलत त्रिशाला अटक केली व तिच्याकडून सर्व मुद्देमाल हस्तगत केला.
अप्पर पोलीस आयुक्त दत्तात्रय कराळे, पोलीस उपायुक्त सचिन गुंजाळ, सहाय्यक पोलीस आयुक्त सुनील कुराडे, मानपाडा पोलीस ठाण्याचे वरिष्ठ पोलीस निरीक्षक शेखर बागडे यांच्या मार्गदर्शनाखाली मानपाडा पोलीस ठाण्याच्या कर्मचाऱ्यांनी ही कामगिरी केली आहे. अधिक तपास मानपाडा पोलीस करत असून मारियाम महिलेला शोधण्याचे काम सुरू असल्याचे पोलिसांनी सांगितले.
