वर्धा; पुढारी वृत्तसेवा : वर्ध्यातील नवीन (आष्टी) येथे राहात असलेल्या व्यक्तीची हत्या केलेला मृतदेह मृतकाच्या घरापासून शंभर फुट अंतरावर नालाच्याकडेला पोत्यात बांधलेला आढळून आल्याने एकच खळबळ उडाली. काल ४ फेब्रुवारी रोजी सकाळच्या सुमारास ही घटना उघडकीस आली. याप्रकरणी मृतकाच्या पत्नीसह एकास अटक केल्याचे पोलिसांनी सांगितले. (Wardha crime)
जगदीश भानुदास देशमुख (वर्ष ३५) असे मृतकाचे नाव आहे. पोत्यात बांधून त्यांच्या घराच्या शंभर फुट अंतरावर नालाच्या कडेला सकाळच्या सुमारास त्यांचा मृतदेह आढळला. याबाबत माहिती मिळताच पोलिसांनी घटनास्थळ गाठून पंचनामा केला. प्रथमदर्शनी घातपात असल्याचे निदर्शनास येताच पोलिसांनी सदर प्रकरणाची चौकशी केली.
पोलिसांनी जगदीश यांच्या घराची पाहणी केली. त्यामधील लाकडी पाट्या, राफ्टर आढळले. पोलिसांनी जगदीशच्या पत्नीला ताब्यात घेतले. पोलिस ठाण्यात नेत चौकशी केली असता पत्नीने एकाच्या मदतीने हत्या केल्याचे उघडकीस आले. मृतक जगदीश भानुदास देशमुख हा घर बांधकाम करण्याचे काम करायचा. जगदीश, त्याची आई, पत्नी व मुले असे एकत्र राहायचे.
घटनेच्या दिवशी जगदीश यांची आई गावात नव्हती. रात्रीच्या सुमारास जगदीशची पत्नी आणि शुभम भीमराव जाधव (वय २२) या दोघांनी संगनमताने जगदीशला लाकडी दांड्याने ठार केले. जगदीशचा मृतदेह त्याच्या घराच्या शंभर मीटर अंतरावर नालीच्या कडेला फेकून दिला. पोलिसांनी जगदीशच्या पत्नीसह शुभम भीमराव जाधव रा. आष्टी या दोघांवर गुन्हा दाखल करत अटक केली. पुढील तपास सुरू आहे.
