नागपूर: पुढारी वृत्तसेवा : गेल्या काही दिवसात प्रशासकीय यंत्रणा, पोलिस विविध कार्यक्रमात गुंतले असताना गुन्हेगारीचा ग्राफ उंचावत आहे. अनैतिक संबंधातून एकाच दिवशी दोन महिलांच्या खुनाच्या घटना उघडकीस आल्याने उपराजधानी हादरली आहे. पहिली घटना वाठोडा पोलिस स्टेशन हद्दीत उघडकीस आली. अनैतिक संबंधातून ४२ वर्षीय महिलेला हिंगणा परिसरातील रुई शिवारात प्रियकराने नेऊन तिचा दगडाने ठेचून खून केल्याचे समोर आले आहे. तीन दिवस बेपत्ता असलेल्या या महिलेचा मृतदेह सापडला. या प्रकरणात दीपक इंगळे (वय ४०, रा. साईबाबानगर) याला अटक करण्यात आली आहे. तो शहर बस सेवेत चालक आहे. तर, दुसऱ्या घटनेत हुडकेश्वर येथे मामेभावासोबत 'लिव्ह इन'मध्ये राहणाऱ्या ३० वर्षीय विवाहितेची उशीने तोंड दाबून हत्या करण्यात आली.
दीपक इंगळेची काही वर्षांपूर्वी मैत्रिणीच्या माध्यमातून या महिलेशी ओळख झाली. पुढे त्यांचे प्रेमसंबंध जुळले. ते नेहमीच एकमेकांना भेटायचे. दरम्यान, दीपक नेहमीच तिला आपल्या दुचाकीने हिंगण्यातील रुई परिसरात घेऊन जायचा. गेल्या काही महिन्यांपासून तो तिच्यावर दुसऱ्याशी प्रेमसंबंध असल्याची शंका घेत होता. नेहमीप्रमाणे गुरुवारी तो या महिलेला घेऊन गेला. यावेळी मात्र त्याच्या डोक्यात सैतान संचारला होता. दुसऱ्यासोबत प्रेमसंबंध असल्याच्या कारणाने त्याने तिच्याशी वाद घातला. ती घरी परतण्यासाठी मागे वळताच, मोठा दगड उचलून त्याने तिच्या डोक्यात हाणला. गंभीर जखमी झाल्याने ती खाली कोसळली. यानंतर त्याने दगडाने वार करून तिचा खून केला आणि पसार झाला.
दरम्यान उशीर झाल्यानंतरही पत्नी घरी न परतल्याने पतीने वाठोडा ठाण्यात ती बेपत्ता असल्याची सूचना केली. शुक्रवारी पोलिसांनी तक्रार दाखल केली. दरम्यान तपासात त्यांनी तिच्यासोबत संबंधित असलेल्यांची चौकशी केली असता त्यात दीपकला ताब्यात घेतले. त्याने चौकशीदरम्यान या महिलेचा खून केल्याची माहिती दिली. आरोपीने सांगितल्यानुसार पोलिसांनी हिंगण्यातील रुई परिसर गाठला. मृतदेह ताब्यात घेत उत्तरीय तपासणीसाठी पाठविण्यात आला.
'लिव्ह इन'मध्ये राहणाऱ्या मामेभावाने ३० वर्षीय आतेबहिणीचा क्षुल्लक वादातून खून केला. ही घटना शनिवारी घडली. राजू शंभुजी पानतावणे (वय ४०) असे आरोपीचे नाव आहे. महिलेचे तीन वर्षांपूर्वी लग्न झाले. मात्र, पतीसोबत पटत नसल्याने ती नागपुरात राहायला आली. यावेळी तिचे मामेभाऊ राजू पानतावणे याच्याशी प्रेमसंबंध जुळले. दोघेही एक वर्षापासून 'लिव्ह इन'मध्ये राहायचे. दरम्यान, काही दिवसांपासून त्यांच्यात वाद सुरू होता. शनिवारी देखील दोघांत वाद झाला. रागाच्या भरात राजूने उशीने तोंड दाबून तिची हत्या केली. हुडकेश्वर पोलिसानी संशयाच्या आधारे राजूला अटक केली. चौकशीत त्याने खुनाची कबुली दिली.
हेही वाचा
