पुढारी ऑनलाईन डेस्क : आयसीसी चॅम्पियन्स ट्रॉफी २०२५ मधील भारतीय संघाचा शेवटचा गट सामना आज (दि.२) न्यूझीलंड विरुद्ध आहे. हा सामना दुबई आंतरराष्ट्रीय क्रिकेट स्टेडियमवर भारतीय वेळेनुसार दुपारी २.३० वाजता खेळला जाईल. दोन्ही संघ आधीच उपांत्य फेरीत पोहोचले आहेत. या सामन्यातील विजेता संघ उपांत्य फेरीत ऑस्ट्रेलियाशी सामना करेल. पराभूत संघाचा सामना सेमीफायनलमध्ये दक्षिण आफ्रिकेशी होईल.
टीम इंडियाचा माजी कर्णधार विराट कोहलीसाठी हा सामना खूप खास आहे. कोहलीच्या कारकिर्दीतील हा ३०० वा एकदिवसीय सामना असणार आहे. किंग कोहली हा भारतासाठी ३०० एकदिवसीय सामने खेळणारा केवळ सातवा क्रिकेटपटू बनणार आहे. या खास क्लबमध्ये मोहम्मद अझरुद्दीन, सचिन तेंडुलकर, एमएस धोनी, राहुल द्रविड, सौरव गांगुली आणि युवराज सिंग आधीच उपस्थित आहेत.
विराट कोहली किमान ३०० एकदिवसीय, १०० टी२० आणि १०० कसोटी सामने खेळणारा जगातील पहिला खेळाडू बनणार आहे. कोहलीने २००८ मध्ये श्रीलंकेविरुद्ध एकदिवसीय क्रिकेटमध्ये पदार्पण केले. तेव्हापासून त्याने २९९ एकदिवसीय सामने खेळले आहेत, ज्यामध्ये त्याने ५८.२० च्या सरासरीने १४ हजार ८५ धावा केल्या आहेत. कोहलीच्या नावावर एकदिवसीय सामन्यात ५१ शतके आणि ७३ अर्धशतके आहेत.
न्यूझीलंडविरुद्धच्या सामन्यात भारतीय कर्णधार रोहित शर्मा आणि यष्टीरक्षक फलंदाज केएल राहुल यांच्यावरही लक्ष असेल. जर रोहित शर्माने या सामन्यात १८ धावा केल्या तर तो न्यूझीलंडविरुद्ध एकदिवसीय आंतरराष्ट्रीय सामन्यात १००० धावा पूर्ण करेल. रोहितने किवी संघाविरुद्ध २९ एकदिवसीय सामन्यांमध्ये ३७.७६ च्या सरासरीने ९८२ धावा केल्या आहेत. दुसरीकडे, जर केएल राहुलने या सामन्यात ५६ धावा केल्या तर तो एकदिवसीय आंतरराष्ट्रीय क्रिकेटमध्ये ३००० धावा पूर्ण करेल. राहुलने आतापर्यंत ८२ एकदिवसीय सामन्यांमध्ये ४८.२६ च्या सरासरीने २९४४ धावा केल्या आहेत.
सचिन तेंडुलकर - ४६३ सामने
एमएस धोनी – ३४७ सामने
राहुल द्रविड – ३४० सामने
मोहम्मद अझरुद्दीन - ३३४ सामने
सौरव गांगुली - ३०८ सामने
युवराज सिंग – ३०१ सामने
विराट कोहली - २९९* सामने
भारतीय संघ: रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल (यष्टीरक्षक), ऋषभ पंत (यष्टीरक्षक), हार्दिक पंड्या, रवींद्र जडेजा, अक्षर पटेल, कुलदीप यादव, वरुण चक्रवर्ती, हर्षित राणा, मोहम्मद शमी, अर्शदीप सिंग, वॉशिंग्टन सुंदर.
न्यूझीलंड संघ: मिचेल सँटनर (कर्णधार), मायकेल ब्रेसवेल, मार्क चॅपमन, डेव्हॉन कॉनवे, काइल जेमिसन, मॅट हेन्री, टॉम लॅथम, डॅरिल मिचेल, विल ओ'रोर्क, ग्लेन फिलिप्स, रचिन रवींद्र, जेकब डफी, नॅथन स्मिथ, केन विल्यमसन, विल यंग.
