राजकोट : भारतीय क्रिकेट संघाचा माजी कर्णधार विराट कोहली सध्या त्याच्या कारकिर्दीतील सुवर्णकाळातून जात आहे. मैदानावर पाऊल ठेवताच नवनवीन विक्रम प्रस्थापित करण्याचा जणू विराटचा पायंडाच पडला आहे. आता न्यूझीलंडविरुद्धच्या दुसऱ्या एकदिवसीय सामन्यात विराटने 'क्रिकेटचा देव' मानल्या जाणाऱ्या सचिन तेंडुलकरला मागे टाकत एक मोठा पराक्रम केला आहे. तब्बल १७ वर्षांनंतर एका भारतीय फलंदाजाला हे यश मिळाले आहे.
या मालिकेतील पहिल्या सामन्यात विराटचे शतक अवघ्या ७ धावांनी हुकले होते, परंतु ९३ धावांच्या त्या झंझावाती खेळीने त्याने विक्रमाची पायाभरणी केली होती. राजकोटमधील दुसऱ्या सामन्यात विराटने सचिन तेंडुलकरला पछाडून न्यूझीलंडविरुद्ध एकदिवसीय क्रिकेटमध्ये सर्वाधिक धावा करणारा भारतीय फलंदाज होण्याचा मान मिळवला. विशेष म्हणजे, सचिन तेंडुलकरचा हा विक्रम गेली अनेक वर्षे अजेय होता, जो अखेर विराटने आपल्या नावावर केला.
न्यूझीलंडविरुद्ध जगभरातून सर्वाधिक धावा करणाऱ्या फलंदाजांच्या यादीत ऑस्ट्रेलियाचा माजी कर्णधार रिकी पाँटिंग आजही अव्वल स्थानी आहे. पाँटिंगने ५१ सामन्यांत १९७१ धावा केल्या आहेत. विराटने आतापर्यंत न्यूझीलंडविरुद्ध ३५ सामन्यांत १७६० हून अधिक धावा केल्या असून, यामध्ये ६ शतके आणि १० अर्धशतकांचा समावेश आहे. दुसरीकडे, सचिन तेंडुलकरने न्यूझीलंडविरुद्ध ४२ सामन्यांत १७५० धावा केल्या होत्या.
रिकी पाँटिंग: ५१ सामने, १९७१ धावा
विराट कोहली: ३५ सामने, १७६०+ धावा
सचिन तेंडुलकर: ४२ सामने, १७५० धावा
सचिन तेंडुलकरने २००९ मध्ये न्यूझीलंडविरुद्ध आपला शेवटचा एकदिवसीय सामना खेळला होता. त्यानंतर तब्बल १७ वर्षांनी त्याचा हा विक्रम मोडण्यात एका भारतीयाला यश आले आहे. रिकी पाँटिंगला मागे सारून जागतिक क्रमवारीत पहिल्या स्थानावर पोहोचण्याची सुवर्णसंधी विराट कोहलीकडे आहे. यासाठी त्याला आणखी काही धावांची गरज असून, आगामी सामन्यांमध्ये तो हा टप्पाही गाठेल, अशी चाहत्यांना खात्री आहे.
