मुंबई : 7 फेब्रुवारीपासून सुरू होणाऱ्या आयसीसी पुरुष टी-20 विश्वचषक 2026 मध्ये यजमान आणि गतविजेता भारत जेतेपद राखण्यासाठी प्रबळ दावेदार मानला जात आहे. ‘आयसीसी’ने (आंतरराष्ट्रीय क्रिकेट परिषद) मंगळवारी प्रसिद्ध केलेल्या गट ‘अ’ (गु्रप ए) च्या विशेष आढाव्यात भारताच्या होम अडव्हांटेजवर शिक्कामोर्तब केले आहे.
या विश्वचषकाचे यजमानपद भारत आणि श्रीलंका यांच्याकडे असून, भारताचे साखळी फेरीतील 4 पैकी 3 सामने मायदेशात होणार आहेत. या सामन्यांचा भारताला फायदा होणार आहे.
2024 च्या विजयानंतर रोहित शर्मा आणि विराट कोहली यांच्या निवृत्तीमुळे भारतीय संघात नव्या पिढीचे वर्चस्व दिसत आहे. अभिषेक शर्मा भारताचे नवीन अस्त्र ठरत आहे. त्याने केवळ 37 सामन्यांत 194.92 च्या तुफानी स्ट्राईक रेटने 1,267 धावा कुटल्या आहेत. शुभमन गिलची निवड न झाल्याने इशान किशन आणि संजू सॅमसन यांच्यात यष्टिरक्षकासाठी चुरस असेल, तर सॅमसन सलामीला अभिषेक शर्माची साथ देण्याची शक्यता आहे. गोलंदाजीत जसप्रीत बुमराहचा वेग आणि वरुण चक्रवर्तीची मिस्ट्री स्पिन भारतासाठी हुकमी एक्का ठरेल.
2024 च्या विश्वचषकात अमेरिका आणि भारताकडून पराभूत होऊन स्पर्धेतून बाहेर पडलेला पाकिस्तान संघ आता नवीन जोमाने उतरेल. भारताविरुद्ध खेळणार नाही, असा पवित्रा जरी पाकिस्तानने घेतला असला, तरी ‘आयसीसी’ने त्यांना इशारा दिला आहे. त्यानुसार या संघाचे या स्पर्धेतील भवितव्य ठरले. पाकिस्तान संघाचे कर्णधारपद सलमान अली आगा याच्याकडे असून, आशिया चषकातून वगळल्यानंतर बाबर आझम पुन्हा संघात परतला आहे. केवळ 21 वर्षांचा नसीम शाह पुन्हा आपल्या जुन्या फॉर्ममध्ये परतण्यासाठी उत्सुक आहे.
गेल्या विश्वचषकात पाकिस्तानला हरवून खळबळ माजवणारा अमेरिकेचा संघ यंदा परदेशी खेळपट्ट्यांवर आपली ताकद दाखवण्यास सज्ज आहे. मोनक पटेल अमेरिकेच्या फलंदाजीची धुरा सांभाळेल. सातेजा मुक्कामल्ला 21 वर्षांचा हा खेळाडू जागतिक क्रमवारीत 25 व्या स्थानी असून, त्याने हॅरी ब्रूक आणि कॅमेरून ग्रीनसारख्या खेळाडूंनाही मागे टाकले आहे.
नेदरलँडस् : स्कॉट एडवर्ड्सच्या नेतृत्वाखालील या संघात रोलॉफ वॅन डर मर्व हा 40 वर्षांचा अनुभवी खेळाडू आकर्षणाचे केंद्र आहे. बास डी लिडे आणि मॅक्स ओडॉड हे भारतासाठी धोकादायक ठरू शकतात.
या संघाचा माजी दिग्गज खेळाडू क्रेग विल्यम्स आता मुख्य प्रशिक्षकाच्या भूमिकेत आहे. रुबेन ट्रम्पलमॅनच्या गोलंदाजीवर नामिबियाची मदार असेल.
तारीख सामना ठिकाण वेळ
7 फेब्रु भारत वि. अमेरिका वानखेडे स्टेडियम, मुंबई संध्या. 7.00
12 फेब्रु भारत वि. नामिबिया अरुण जेटली स्टेडियम, दिल्ली संध्या. 7.00
15 फेब्रु भारत वि. पाकिस्तान आर. प्रेमदासा स्टेडियम, कोलंबो संध्या. 7.00
18 फेब्रु भारत वि. नेदरलँडस् नरेंद्र मोदी स्टेडियम, अहमदाबाद संध्या. 7.00
