Pakistan ICC penalty slow over rate : इंग्लंडविरुद्धच्या बर्मिंगहॅम येथील अंतिम कसोटी सामन्यात संथ षटकांच्या गतीमुळे (स्लो ओव्हर-रेट) पाकिस्तान संघाला मॅच फीच्या ५० टक्के दंड ठोठावण्यात आला असून जागतिक कसोटी अजिंक्यपद स्पर्धेतील (WTC) तब्बल ११ गुण कापण्यात आले आहेत.
सोमवारी आयसीसीने (ICC) जारी केलेल्या माहितीनुसार, यजमान इंग्लंडविरुद्धची कसोटी मालिका ०-३ अशी गमावणाऱ्या पाकिस्तान संघाला दिलेल्या वेळेच्या मर्यादेत तब्बल ११ षटके कमी टाकल्याचे आढळले. पाकिस्तानने लीड्स येथील पहिली कसोटी एक डाव आणि १०३ धावांनी, लॉर्ड्सवरील दुसरी कसोटी १९४ धावांनी आणि एजबॅस्टन येथील तिसरी कसोटी ८ विकेट्सने गमावली होती.
"इंग्लंडविरुद्ध बर्मिंगहॅम येथे झालेल्या आयसीसी जागतिक कसोटी अजिंक्यपद स्पर्धेच्या तिसऱ्या आणि अंतिम सामन्यादरम्यान संथ षटकांची गती राखल्याबद्दल पाकिस्तानवर दुहेरी कारवाई करण्यात आली आहे," असे आयसीसीने स्पष्ट केले. आयसीसीचे सामनाधिकारी (मॅच रेफरी) रंजन मदुगले, मैदानी पंच पॉल रायफेल आणि ख्रिस गॅफनी, तिसरे पंच अल्लाउद्दीन पालेकर आणि चौथे पंच रसेल वॉरेन यांनी ही कारवाई केली.
"या कारवाईमुळे पाकिस्तानचे जागतिक कसोटी अजिंक्यपद स्पर्धेच्या गुणतालिकेतील स्थान आणखी घसरले असून, संघ आता ४.६३ टक्के गुणांसह नवव्या स्थानावर फेकला गेला आहे," असे आयसीसीने म्हटले आहे.
"खेळाडू आणि खेळाडूंच्या सहाय्यक कर्मचाऱ्यांसाठी असणाऱ्या आयसीसी आचारसंहितेच्या कलम २.२२ नुसार (जे किमान षटकांच्या गतीशी संबंधित आहे), ठराविक वेळेत प्रत्येक कमी टाकलेल्या षटकासाठी खेळाडूंना त्यांच्या मॅच फीच्या ५ टक्के दंड ठोठावला जातो, ज्याची कमाल मर्यादा ५० टक्के आहे."आयसीसी जागतिक कसोटी अजिंक्यपद स्पर्धेच्या कलम १६.११.२ नुसार, प्रत्येक कमी षटकासाठी संघाचा एक गुण कापला जातो. परिणामी, पाकिस्तानच्या एकूण गुणांमधून ११ गुण वजा करण्यात आले आहेत," अशी माहिती आयसीसीने दिली आहे.
डब्ल्युटीसी (WTC) गुणतालिकेत सर्वात तळाला म्हणजेच नवव्या स्थानावर असलेल्या पाकिस्तानने आतापर्यंत खेळलेल्या ९ कसोटी सामन्यांपैकी केवळ २ सामने जिंकले असून ७ सामन्यांत पराभव पत्करला आहे. पाकिस्तानचा पुढील डब्ल्युटीसी सामना नोव्हेंबरमध्ये होणार असून, ते रावळपिंडी आणि लाहोर येथे श्रीलंकेविरुद्ध दोन कसोटी सामन्यांची मालिका खेळणार आहेत.
