लाहोर : पाकिस्तानचा फलंदाज हसन नवाज सध्या त्याच्या एका वादग्रस्त विधानामुळे चर्चेचा विषय ठरला आहे. भारतीय गोलंदाजांविषयी त्याने केलेल्या टिपणीचा व्हिडिओ सोशल मीडियावर प्रचंड व्हायरल होत आहे. ज्यामुळे नव्या वादाला तोंड फुटले आहे. आपल्या आक्रमक फलंदाजीसाठी ओळखल्या जाणाऱ्या नवाजने भारतीय गोलंदाजांचा सामना करताना त्यांना "जोरात प्रहार करण्याची" तीव्र इच्छा होत असल्याचे म्हटले आहे. त्याच्या या विधानातून त्याची स्पर्धात्मक वृत्ती दिसून येत असली, तरी चाहत्यांमध्ये मात्र संतापाची लाट आहे.
हसन नवाज हा पाकिस्तान क्रिकेटमधील एक उदयोन्मुख खेळाडू असून तो त्याच्या आक्रमक फलंदाजीच्या शैलीसाठी प्रसिद्ध आहे. उजव्या हाताने फलंदाजी करणा-या या टॉप-ऑर्डरमधील फलंदाजाचा गोलंदाजांवर वर्चस्व गाजवण्यासाठी सुरुवातीपासून आक्रमक खेळीवर भर असतो. टेप-बॉल क्रिकेटमधून आपल्या प्रवासाला सुरुवात करणाऱ्या नवाजने अत्यंत कमी कालावधीत आंतरराष्ट्रीय स्तरावर छाप पाडली आहे.
एप्रिल २०२६ मध्ये एका स्थानिक वृत्तवाहिनीला दिलेल्या मुलाखतीत हसन नवाजने भारतीय संघाविरुद्धच्या सामन्यांबाबत भाष्य केले. तो म्हणाला की, ‘भारताविरुद्ध खेळताना माझ्या अंगात एक वेगळाच उत्साह संचारतो. भारतीय गोलंदाजांना लक्ष्य करणे आणि त्यांच्या चेंडूवर जोरदार प्रहार करणे मला अधिक आवडते. खरे सांगायचे तर, एक प्रतिस्पर्धी म्हणून मला भारतीय गोलंदाज अजिबात आवडत नाहीत. मैदानावर संधी मिळाल्यास मी त्यांच्यावर वर्चस्व गाजवण्याचा प्रयत्न करत राहीन.’ त्याच्या या विधानावर क्रिकेट तज्ज्ञ आणि चाहत्यांकडून संमिश्र प्रतिक्रिया उमटत आहेत.
या विधानानंतर हसन नवाजला विशेषतः भारतीय क्रिकेट चाहत्यांच्या रोषाला सामोरे जावे लागत आहे. सोशल मीडियावर त्याला मोठ्या प्रमाणावर ट्रोल केले जात असून, अनेकांनी ही अनावश्यक आक्रमकता असल्याचे म्हटले आहे. क्रिकेट तज्ज्ञांच्या मते, खेळाडूंमध्ये स्पर्धात्मक भावना असणे आवश्यक आहे, परंतु भारत-पाकिस्तान यांच्यातील संबंधांची संवेदनशीलता पाहता अशा प्रकारची विधाने करताना खेळाडूंनी संयम बाळगणे गरजेचे आहे.
२१ ऑगस्ट २००२ रोजी पाकिस्तानच्या पंजाब प्रांतातील लैया येथे जन्मलेल्या हसनने १६ मार्च २०२५ रोजी न्यूझीलंडविरुद्ध आंतरराष्ट्रीय टी-२० क्रिकेटमध्ये पदार्पण केले. आपल्या तिसऱ्याच टी-२० सामन्यात त्याने केवळ ४४ चेंडूत शतक ठोकून सर्वांचे लक्ष वेधले होते. याद्वारे तो टी-२० आंतरराष्ट्रीय क्रिकेटमध्ये सर्वात वेगवान शतक झळकावणारा पाकिस्तानी फलंदाज ठरला.
२८ एप्रिल २०२६ पर्यंतच्या आकडेवारीनुसार, हसन नवाजने २५ टी-२० आंतरराष्ट्रीय सामन्यांमध्ये १५४ च्या स्ट्राईक रेटने ४५७ धावा केल्या आहेत, ज्यात १०५* ही त्याची सर्वोच्च धावसंख्या आहे. एकदिवसीय क्रिकेटमध्ये ४ सामन्यात त्याने ५६.५ च्या सरासरीने ११३ धावा केल्या आहेत. पाकिस्तान सुपर लीगमध्ये (PSL) तो 'क्विट्टा ग्लॅडिएटर्स' संघाकडून खेळतो.
