FIFA World Cup 2026 : फिफा फुटबॉल वर्ल्ड कप २०२६ च्या सुरुवातीपूर्वी आपल्या शेवटच्या सराव (वॉर्म-अप) सामन्यात अर्जेंटिनाने आइसलँडचा ३-० अशा फरकाने पराभव केला. दुखापतीतून पुनरागमन करणाऱ्या लिओनेल मेस्सीने या सामन्यात मैदानात उतरताच अवघ्या काही सेकंदांत गोल डागला. त्याने संघाच्या विजयात महत्त्वाची भूमिका बजावली, तसेच या वर्ल्ड कपपूर्वी आपल्या फिटनेसबाबत ( Messi Fitness Update) असलेल्या सर्व शंका दूर केल्या आहेत.
अर्जेंटिना सध्याचा डिफेंडिंग चॅम्पियन (विजेता) संघ आहे. आइसलँडविरुद्धच्या सामन्यापूर्वी संघाचे प्रशिक्षक लिओनेल स्कालोनी यांनी 'प्लेइंग इलेव्हन'मध्ये काही प्रयोग केले होते. याच कारणामुळे मेस्सीसह अनेक दिग्गज खेळाडूंना सुरुवातीला बेंचवर (राखीव खेळाडू म्हणून) ठेवण्यात आले होते. मेस्सी हा २४ मे रोजी एका क्लब सामन्यानंतर स्नायूंच्या थकव्यामुळे आणि हॅमस्ट्रिंगच्या किरकोळ दुखापतीमुळे एकही सामना खेळला नव्हता. त्यामुळे आगामी स्पर्धेतील त्याच्या तयारीवर प्रश्नचिन्ह उपस्थित केले जात होते.
सराव सामन्याच्या सुरुवातीच्या मिनिटांत आइसलँडच्या मिकेल एगिल एलर्टसनने गोल करण्याची एक सुवर्णसंधी गमावली. आइसलँडच्या पेनाल्टी एरियामध्ये झालेल्या गोंधळाचा फायदा घेत डिफेंडर व्हॅलेंटिन बार्कोने गोल करून अर्जेंटिनाला आघाडी मिळवून दिली. बॉलवर जास्त वेळ ताबा असूनही अर्जेंटिनाला हाफ-टाइमपूर्वी आपली आघाडी वाढवता आली नाही. या दरम्यान निको पाजने एक चांगली संधी गमावली, तर आइसलँडचा गोलकीपर एलियास ओलाफसनने एक महत्त्वाचा बचाव करून आपल्या संघाला सामन्यात टिकवून ठेवले.
हाफ-टाइमच्या ब्रेकनंतर प्रशिक्षक स्कालोनी यांनी एन्झो फर्नांडिस, अलेक्सिस मॅक अलिस्टर आणि लाऊतारो मार्टिनेझ अशा महत्त्वाच्या खेळाडूंना मैदानात उतरवले. लाऊतारो दोनदा गोल करण्याच्या जवळ पोहोचला होता; पण दोन्ही वेळा बॉल गोलपोस्टला धडकला.
सामन्याच्या ७०व्या मिनिटाला जेव्हा लिओनेल मेस्सी मैदानात उतरला, तेव्हा प्रेक्षकांचा उत्साह शिगेला पोहोचला होता. या ३९ वर्षीय खेळाडूने लगेचच खेळावर आपला प्रभाव पाडला आणि आपल्या अचूक पासेसच्या जोरावर आइसलँडचा बचाव भेदण्यास मदत केली. मेस्सीने मैदानात येताच पेनाल्टी घेतली आणि गोल डागला. अर्जेंटिनासाठीचा हा त्याचा ११७वा गोल होता आणि दुखापतीतून परतल्यानंतरचा हा त्याचा पहिलाच गोल ठरला. मेस्सीने संघाची आघाडी २-० अशी केली आणि त्यानंतर तिसऱ्या गोलमध्येही महत्त्वाची भूमिका बजावली.
