France Team FIFA World Cup 2026 analysis
फुटबॉल विश्वात फ्रान्सचा संघ पुन्हा चर्चेत आला आहे. आगामी फिफा (FIFA) विश्वचषकासाठी निवडण्यात आलेल्या फ्रेंच संघ हा कागदावरच नाही तर मैदानावरही प्रचंड मजबूत मानला जात आहे. त्यामुळे हा संघ स्पर्धेतील विजेतेपदाचा सर्वात मोठा दावेदार आहे. मागील दोन विश्वचषकांमध्ये फ्रान्सने दमदार कामगिरी केली होती. ज्यामुळे यंदाही त्यांच्याकडून विजेतेपदाची मोठी अपेक्षा आहे.
2010 चा विश्वचषक फ्रेंच फुटबॉलसाठी अत्यंत वादग्रस्त आणि संकटपूर्ण ठरला होता. त्या काळातील संघातील अंतर्गत संघर्ष, व्यवस्थापनातील गोंधळ आणि खेळाडूंच्या वर्तनामुळे फ्रेंच फुटबॉल मोठ्या टीकेचा विषय ठरला. मात्र त्यानंतर 2012 मध्ये प्रशिक्षक डिडिएर डेशॅम्प्स यांच्याकडे संघाची धुरा आली आणि फ्रेंच फुटबॉलचा संपूर्ण चेहरामोहरा बदलला.
गेल्या 12–14 वर्षांत फ्रान्सने तरुण प्रतिभेला संधी देत जगातील सर्वात मजबूत फुटबॉल इकोसिस्टम उभारली आहे. क्लेअरफोंटेन अकादमी, लीग 1 क्लब्सच्या मजबूत अकादमी आणि सतत निर्माण होणारी प्रतिभा यामुळे फ्रान्स हा फुटबॉलचे ‘टॅलेंट हब’ म्हणून ओळखला जाऊ लागला आहे.
युगो लॉरिसच्या निवृत्तीनंतर फ्रान्सच्या गोलकीपिंगची धुरा माईक मिन्यो यशस्वीपणे सांभाळत आहे. एसी मिलानचा हा गोलकीपर उत्कृष्ट शॉट-स्टॉपर असून तो संघाचा मुख्य गोलकीपर असेल. त्याच्या सोबतीला ब्रस सांबा आणि रॉबिन रिसर हे पर्याय उपलब्ध आहेत. बचाव फळीचा विचार केल्यास फ्रान्सकडे जागतिक दर्जाचे खेळाडू आहेत.
दायो उपामेकानो: सध्याच्या घडीला जगातील सर्वोत्तम सेंटर बॅक्सपैकी एक. त्याची अष्टपैलू शैली आणि 'वन-ऑन-वन' डिफेन्स संघासाठी अत्यंत महत्त्वाचा आहे.
विलियम सलीबा: सलीबाच्या पाठीच्या दुखापतीने डेशॅम्प्स यांची चिंता वाढवली आहे. तो वेदनाशामक औषधे (Painkillers) घेऊन खेळण्याची शक्यता असून, विश्वचषकानंतर त्याच्यावर शस्त्रक्रिया होऊ शकते. तो तंदुरुस्त असल्यास उपामेकानो-सलीबा ही या विश्वचषकातील सर्वोत्तम बचावात्मक जोडी ठरेल.
ल्युकास फर्नांडिस: डावा बॅक आणि सेंटर बॅक अशा दोन्ही भूमिका बजावू शकणारा हा खेळाडू संघाला उत्तम संतुलन देतो.
राखीव फळी : इब्राहिमा कोनाटे आणि मॅक्सिन्स लवाक यांच्या रूपाने दर्जेदार बॅकअप उपलब्ध आहेत.
उणिवा : ज्युल्स कुंडे याचा बार्सिलोनासोबतचा फॉर्म चढ-उताराचा राहिला आहे. उजव्या बाजूला मालो गुस्तो 'वन-ऑन-वन' बचावात काहीसा कमकुवत ठरतो. डाव्या बाजूला थिओ हर्नांडिस हा सौदी लीगमध्ये गेल्यानंतर त्याच्या मैदानाबाहेरील जीवनशैलीमुळे चर्चेत आहे, तरीही ९०% तंदुरुस्तीसह तो घातक ठरू शकतो. त्याच्या सोबतीला अॅस्टन व्हिलाचा अनुभवी ल्युका डीन सज्ज आहे.
फ्रान्सची मध्य फळी चेंडूवर ताबा मिळवण्याच्या क्षमतेसाठी ओळखली जाते.
ओरेलियन चुआमेनी आणि एंगोलो कान्ते : ही जोडी मध्य फळीत मुख्य भूमिका बजावेल. चुआमेनी डिफेन्स भेदण्यात आणि गेम डिस्ट्रीब्यूशनमध्ये माहीर आहे, तर अनुभवी कान्ते हा उत्कृष्ट ड्रिबलर आणि प्रेस-रेझिस्टंट खेळाडू आहे. युरो २०२४ मधील त्याचा फॉर्म पाहता तो अजूनही प्रतिस्पर्ध्यांसाठी घातक आहे.
मानू कोने : संघातील सर्वात तांत्रिकदृष्ट्या सक्षम खेळाडू, जो दबावातही चेंडू पुढे नेऊन आक्रमकांना संधी निर्माण करून देतो.
वॉरेन झायर एम्प्री : पीएसजीच्या या तरुण खेळाडूने या मोसमात अफाट प्रगती केली असून, तो संघात शारीरिक ताकद आणि अचूकता आणतो.
आद्रियन राबिओ : प्रशिक्षक डेशॅम्प्स यांचा अत्यंत विश्वासू खेळाडू. बॉक्सच्या बाहेरून अचूक शॉट्स मारण्याची त्याची क्षमता संघाला आक्रमणात नवीन परिमाण देते.
फ्रान्सचे आक्रमण ही त्यांची सर्वात मोठी जमेची बाजू आहे. संघाचा कर्णधार किलियन एम्बाप्पे हा मुख्य कणा आहे. त्याचे विश्वचषकातील आकडे थक्क करणारे आहेत. त्याने विश्वचषकातील १४ सामन्यांत १२ गोल केले आहेत. जर्मनेच्या मिरोस्लाव क्लोझाचा (१६ गोल) विश्वचषकातील सर्वाधिक गोलचा विक्रम मोडण्याच्या तो अतिशय जवळ आहे.
उस्मान डेंबेले : पीएसजीमध्ये खेळताना डेंबेलेच्या भूमिकेत बदल झाला आहे. तो आता मध्यवर्ती स्थानावरून खेळत एम्बाप्पेला साथ देऊ शकतो. आंतरराष्ट्रीय स्तरावर त्याला अजून मोठी छाप पाडायची आहे.
तरुण रक्ताची जोड : मायकेल ओलिसे, डेजरे ड्युए आणि रायन चेर्की या तीन स्फोटक खेळाडूंमुळे फ्रान्सचे आक्रमण अधिक अष्टपैलू झाले आहे. बारकोला आणि अकलश सारखे खेळाडू 'इम्पॅक्ट सबस्टिट्युट' म्हणून प्रतिस्पर्ध्यांची दमछाक करू शकतात.
पर्यायी स्ट्रायकर : हुशाम इकिटीकेच्या अनुपस्थितीत जॉन फिलिप मटेटा आणि मार्कस थुराम यांच्याकडे स्ट्रायकरची जबाबदारी असेल. थुरामची खेळाडूंना एकत्र घेऊन खेळण्याची शैली एम्बाप्पेसाठी फायदेशीर ठरेल.
फ्रान्स हा प्रामुख्याने चेंडूवर ताबा मिळवून वेगाने हल्ला करणारा संघ आहे. प्रतिस्पर्ध्यांनी चेंडू आपल्याकडे ठेवावा आणि त्यांनी चूक करताच एम्बाप्पे व डेंबेलेच्या वेगाचा वापर करून काऊंटर-अॅटॅक करणे ही फ्रान्सची ताकद आहे. मात्र, प्रतिस्पर्धी संघाने त्यांचा बचाव अधिक भक्कम केल्यास सामना कठीण होऊ शकतो. अशा वेळी डेशॅम्प्स यांच्या बचावात्मक मानसिकतेची आणि गोलची आघाडी टिकवण्याच्या रणनीतीची कसोटी लागेल.
या विश्वचषकात फ्रान्सचा समावेश सेनेगल, नॉर्वे आणि इराक यांच्यासोबत एकाच गटात झाला आहे.
नॉर्वे : मार्टिन ओडेगार्डच्या अचूक पासेसवर खेळणारा आणि एर्लिंग हालांडसारखा जागतिक दर्जाचा गोलमशीन असलेला नॉर्वेचा संघ आक्रमणात प्रचंड धोकादायक ठरू शकतो.
सेनेगल : आफ्रिकन चॅम्पियन सेनेगलकडे अफाट शारीरिक ताकद आणि वेगवान फुटबॉलची जोड असल्याने, ते मध्य फळीत फ्रान्सच्या शारीरिक क्षमतेला तोडीस तोड टक्कर देतील.
इराक : इराकविरुद्धचा सामना फ्रान्ससाठी तुलनेने सोपा असेल. या सामन्यात फ्रेंच आक्रमक मोठा विजय नोंदवण्यासाठी प्रयत्न करतील.
माईक मिन्यो (गोलकीपर), ज्युल्स कुंडे, दायो उपामेकानो, मॅक्सिन्स लवाक, थिओ हर्नांडिस, ओरेलियन चुआमेनी, एंगोलो कान्ते, डेजरे ड्युए, मायकेल ओलिसे, उस्मान डेंबेले, किलियन एम्बाप्पे (कर्णधार).
एडुआर्डो कामाव्हिंगा आणि ख्रिस्तोफर एनकुंकू यांसारख्या मोठ्या खेळाडूंना संघात जागा न मिळणे, हीच फ्रान्सच्या संघाची खोली दर्शवते. १९९४ ते २००२ दरम्यान सलग तीन फायनल खेळणाऱ्या ब्राझीलचा इतिहास फ्रान्ससमोर आहे. गेल्या वेळच्या फायनलमधील पराभवाचा वचपा काढून फ्रान्स पुन्हा एकदा जगज्जेतेपदाचा मुकुट परिधान करण्यास सज्ज दिसत आहे.
