इंग्लंडविरुद्धच्या तिसऱ्या कसोटी सामन्यात जसप्रीत बुमराहने उत्कृष्ट गोलंदाजीचे प्रदर्शन करत सामन्यात एकूण ७ बळी आपल्या नावावर केले.
जसप्रीत बुमराहची गणना जगातील सर्वोत्तम गोलंदाजांमध्ये केली जाते. त्याच्या भेदक यॉर्करचा सामना करणे कोणत्याही फलंदाजासाठी एक मोठे आव्हान असते. इंग्लंडविरुद्धच्या तिसऱ्या कसोटी सामन्यात त्याने पुन्हा एकदा आपली क्षमता सिद्ध केली. पहिल्या डावात पाच बळी घेतल्यानंतर, दुसऱ्या डावातही त्याने दोन महत्त्वपूर्ण बळी मिळवले. त्याच्या अचूक माऱ्यामुळे इंग्लंडच्या फलंदाजांना दुसऱ्या डावात मोकळेपणाने फटकेबाजी करता आली नाही आणि त्यांच्यावर पूर्णपणे अंकुश राहिला. यामुळेच इंग्लंडचा संघ दुसऱ्या डावात 192 धावांपर्यंतच मजल मारू शकला.
या सामन्यात एकूण 7 बळी घेताच जसप्रीत बुमराह आंतरराष्ट्रीय क्रिकेटमध्ये सेना (SENA) देशांमध्ये सर्वाधिक बळी घेणारा भारतीय गोलंदाज ठरला आहे. त्याने भारताचे महान फिरकीपटू अनिल कुंबळे यांचा विक्रम मोडला. बुमराहने आंतरराष्ट्रीय क्रिकेटमध्ये सेना देशांमध्ये (दक्षिण आफ्रिका, इंग्लंड, न्यूझीलंड आणि ऑस्ट्रेलिया) आतापर्यंत एकूण 223 बळी मिळवले आहेत, तर कुंबळे यांच्या नावावर 222 बळींची नोंद आहे. अशाप्रकारे, बुमराहने सर्व भारतीय गोलंदाजांना मागे टाकत या यादीत अव्वल स्थान पटकावले आहे.
गेल्या काही काळापासून जसप्रीत बुमराह भारतीय कसोटी संघाचा एक अविभाज्य घटक बनला आहे. त्याची गोलंदाजीतील दिशा आणि टप्पा अत्यंत अचूक असतो. इंग्लंडपूर्वी ऑस्ट्रेलिया दौऱ्यावरही त्याने आपल्या गोलंदाजीची छाप पाडली होती. त्याने आतापर्यंत 47 कसोटी सामन्यांमध्ये एकूण 217 बळी घेतले असून, यात 15 वेळा एका डावात पाच बळी घेण्याचा पराक्रम त्याने केला आहे.
तिसऱ्या कसोटी सामन्यात इंग्लंडचा कर्णधार बेन स्टोक्सने नाणेफेक जिंकून प्रथम फलंदाजी करण्याचा निर्णय घेतला होता. यानंतर इंग्लंडच्या संघाने 387 धावा केल्या. प्रत्युत्तरात, के. एल. राहुलच्या शतकाच्या जोरावर भारतानेही 387 धावा केल्या आणि धावसंख्या बरोबरीत सुटली. यानंतर दुसऱ्या डावात इंग्लंडचा संघ 192 धावांवर सर्वबाद झाला. संघासाठी जो रूटने सर्वाधिक 40 धावा केल्या. तर भारताकडून वॉशिंग्टन सुंदर सर्वात यशस्वी गोलंदाज ठरला; त्याने चार बळी मिळवले.
