अहमदाबाद : आयसीसी टी-२० विश्वचषक २०२६ च्या 'सुपर-८' फेरीतील पहिल्याच सामन्यात भारतीय चाहत्यांच्या पदरी निराशा पडली. दक्षिण आफ्रिकेने दिलेल्या १८८ धावांच्या आव्हानाचा पाठलाग करताना भारतीय फलंदाजीचा सपशेल फज्जा उडाला. दक्षिण आफ्रिकेने हा सामना ७६ धावांनी जिंकत भारतावर वर्चस्व गाजवले. आफ्रिकेच्या भेदक गोलंदाजीसमोर संपूर्ण भारतीय संघ १८.५ षटकांत अवघ्या १११ धावांत गारद झाला.
नाणेफेक जिंकून प्रथम फलंदाजी करणाऱ्या दक्षिण आफ्रिकेची सुरुवात अत्यंत खराब झाली होती. भारताच्या जसप्रीत बुमराहने (३/१५) आणि अर्शदीपने पॉवरप्लेमध्येच आफ्रिकेची अवस्था ३ बाद २० अशी केली होती. मात्र, त्यानंतर अनुभवी डेव्हिड मिलर (३५ चेंडूंत ६३ धावा) आणि तरुण तुर्क डेवाल्ड ब्रेविस (२९ चेंडूंत ४५ धावा) यांनी मैदानावर तुफान फटकेबाजी केली. या जोडीने रचलेल्या पायावर ट्रिस्टन स्टब्सने (नाबाद ४४) कळस चढवत दक्षिण आफ्रिकेला ७ बाद १८७ या आव्हानात्मक धावसंख्येपर्यंत पोहोचवले.
१८८ धावांच्या लक्ष्याचा पाठलाग करताना भारताची सुरुवात एखाद्या भयानक स्वप्नासारखी झाली. सलामीवीर इशान किशन खातेही न उघडता बाद झाला, तर टिळक वर्मा (१) अवघ्या ५ धावांवर माघारी परतला. अभिषेक शर्माने (१५) काही काळ प्रतिकार करण्याचा प्रयत्न केला, पण मार्को यान्सेनच्या उसळत्या चेंडूंसमोर त्यानेही नांगी टाकली.
मध्य फळीत कर्णधार सूर्यकुमार यादव (१८) आणि हार्दिक पंड्या (१८) यांनी संथ खेळी केली, मात्र ते आफ्रिकेच्या फिरकी आणि वेगवान माऱ्यासमोर हतबल दिसले. शिवम दुबेने एकाकी झुंज देत सर्वाधिक ४२ धावा केल्या, पण त्याला दुसऱ्या टोकाकडून कोणाचीही साथ मिळाली नाही. रिंकू सिंग आणि अर्शदीप सिंग भोपळाही फोडू शकले नाहीत.
दक्षिण आफ्रिकेच्या विजयात गोलंदाजांनी सिंहाचा वाटा उचलला. मार्को यान्सेनने आपल्या ३.५ षटकांत २२ धावा देत ४ महत्त्वाचे बळी टिपले आणि भारताचे कंबरडे मोडले. त्याला फिरकीपटू केशव महाराजने २४ धावांत ३ बळी घेत मोलाची साथ दिली. कोर्बिन बॉशनेही १० धावांच्या मोबदल्यात २ फलंदाजांना तंबूत धाडले.
दक्षिण आफ्रिका: १८७/७ (२० षटके) - डेव्हिड मिलर ६३, डेवाल्ड ब्रेविस ४५; जसप्रीत बुमराह ३/१५, अर्शदीप सिंग २/२८.
भारत: १११/१० (१८.५ षटके) - शिवम दुबे ४२, सूर्यकुमार यादव १८; मार्को यान्सेन ४/२२, केशव महाराज ३/२४.
निकाल: दक्षिण आफ्रिका ७६ धावांनी विजयी.
आयसीसी पुरुष टी-२० विश्वचषक २०२६ च्या सुपर ८ फेरीतील अत्यंत महत्त्वाच्या सामन्यात दक्षिण आफ्रिकेने भारतासमोर विजयासाठी १८८ धावांचे तगडे आव्हान ठेवले आहे. डेवाल्ड ब्रेविस आणि डेव्हिड मिलर यांच्या आक्रमक खेळीच्या जोरावर दक्षिण आफ्रिकेने निर्धारित २० षटकांत ७ बाद १८७ धावांपर्यंत मजल मारली.
नाणेफेक जिंकून प्रथम फलंदाजी करण्याचा दक्षिण आफ्रिकेचा निर्णय सुरुवातीला फसला असे वाटत होते. भारताचा प्रमुख वेगवान गोलंदाज जसप्रीत बुमराहने आपल्या भेदक माऱ्याने आफ्रिकेच्या फलंदाजीची दाणादाण उडवली. त्याने सलामीवीर क्विंटन डी कॉक (६) आणि रायन रिकलटन (७) यांना स्वस्तात बाद करत भारताला जबरदस्त सुरुवात करून दिली. कर्णधार एडन मार्करमदेखील अवघ्या ४ धावा करून अर्शदीपचा बळी ठरला, ज्यामुळे आफ्रिकेची अवस्था ३ बाद २० अशी बिकट झाली होती.
सुरुवातीच्या धक्क्यातून सावरत युवा फलंदाज डेवाल्ड ब्रेविस (४५ धावा, २९ चेंडू) आणि अनुभवी डेव्हिड मिलर (६३ धावा, ३५ चेंडू) यांनी खेळाचे चित्र पालटले. या दोघांनी चौथ्या विकेटसाठी ५० चेंडूत तब्बल ९७ धावांची स्फोटक भागीदारी केली. मिलरने आपल्या खेळीत ७ चौकार आणि ३ उत्तुंग षटकार खेचत भारतीय फिरकीपटूंचा समाचार घेतला.
डेथ ओव्हर्समध्ये ट्रिस्टन स्टब्सने २४ चेंडूत ४४ धावांची नाबाद खेळी करत संघाला १८० चा टप्पा ओलांडून दिला. भारताकडून गोलंदाजीत पुन्हा एकदा जसप्रीत बुमराह चमकला. त्याने ४ षटकांत केवळ १५ धावा देत ३ बळी टिपले आणि आफ्रिकेच्या धावसंख्येला लगाम घातला. अर्शदीप सिंगने २ बळी घेतले, तर शिवम दुबे आणि वरुण चक्रवर्ती यांना प्रत्येकी १ यश मिळाले.
मैदानात धावांचा पाऊस पाडणाऱ्या दक्षिण आफ्रिकेच्या फलंदाजांना १४ व्या षटकात वॉशिंग्टन सुंदरने आपल्या फिरकीने जखडून ठेवले. सलग मोठ्या षटकांनंतर सुंदरने या षटकात प्रत्येक चेंडूवर एक धाव देत केवळ ६ धावा खर्च केल्या. १४ षटकांच्या अखेरीस दक्षिण आफ्रिकेची धावसंख्या ४ बाद १३४ अशी आहे.
दक्षिण आफ्रिकेचा संकटमोचक डेव्हिड मिलरने केवळ २६ चेंडूंत आपले झंझावाती अर्धशतक पूर्ण केले आहे. विशेष म्हणजे, विश्वचषकाच्या इतिहासात भारता विरुद्ध मिलरची बॅट नेहमीच तळपली आहे. अहमदाबादच्या या मैदानावर मिलरची सरासरी ५० च्या वर असून, आज त्याने ३१ चेंडूंत ५७ धावा कुटल्या आहेत. जर मिलर १८ व्या षटकापर्यंत खेळला, तर दक्षिण आफ्रिका १९० धावांचा टप्पा सहज ओलांडू शकते.
७ ते १३ षटके: या टप्प्यात आफ्रिकेने तुफानी फलंदाजी करत ८७ धावा लुटल्या आणि १ बळी गमावला.
ब्रेविसचा तडाखा: डेवाल्ड ब्रेविसने शिवम दुबे आणि वरुण चक्रवर्तीवर हल्ला चढवत आफ्रिकेला सावरले, मात्र ४५ धावांवर तो बाद झाला.
भारतीय गोलंदाजी: वरुण चक्रवर्तीच्या दुसऱ्या षटकात १७ धावा गेल्या, तर हार्दिक पंड्या आणि वॉशिंग्टन सुंदरने मधल्या षटकांत धावगती रोखण्याचा प्रयत्न केला.
सध्या खेळपट्टीवर डेव्हिड मिलर (५७) आणि ट्रिस्टन स्टब्स (५) यांची जोडी असून, अखेरच्या ६ षटकांत भारतीय गोलंदाज मिलरला रोखण्यात यशस्वी ठरतात का, यावर सामन्याचा निकाल अवलंबून असेल.
गेल्या काही षटकांपासून भारतीय गोलंदाजांची डोकेदुखी ठरलेली डेवाल्ड ब्रेविस आणि डेव्हिड मिलरची जोडी अखेर फुटली. पहिल्या षटकात १५ धावा देणाऱ्या शिवम दुबेने दुसऱ्याच षटकात शानदार पुनरागमन करत आक्रमक खेळणाऱ्या डेवाल्ड ब्रेविसला बाद केले.
१२.२ षटकांत शिवम दुबेने चेंडूची लांबी बदलली आणि अत्यंत चपळाईने एक 'स्लोअर बॅक ऑफ लेंथ' चेंडू टाकला. ब्रेविसने या चेंडूवर खेचून 'पुल' मारण्याचा प्रयत्न केला, मात्र चेंडू बॅटच्या वरच्या कडेला लागून हवेत उडाला. सीमारेषेवर तैनात असलेल्या अभिषेक शर्माने कोणतीही चूक न करता हा महत्त्वाचा झेल टिपला.
'बेबी एबी' म्हणून ओळखला जाणारा डेवाल्ड ब्रेविस २९ चेंडूंत ४५ धावा (३ चौकार, ३ षटकार) करून माघारी परतला. ब्रेविस बाद झाल्याने दक्षिण आफ्रिकेच्या धावगतीला ब्रेक लागला असून भारतीय संघाने पुन्हा एकदा सामन्यात वर्चस्व निर्माण केले आहे.
मैदानात जम बसलेल्या डेवाल्ड ब्रेविस आणि डेव्हिड मिलर या जोडीने आता भारतीय गोलंदाजांची लय बिघडवण्यास सुरुवात केली आहे. ११ व्या षटकात गोलंदाजीला आलेल्या शिवम दुबेला या जोडीने चांगलेच धारेवर धरले. या एकाच षटकात तब्बल १५ धावा लुटत दक्षिण आफ्रिकेने ११ षटकांत ३ बाद ९९ धावांपर्यंत मजल मारली असून त्यांचे शतक अवघ्या एक धाव दूर आहे.
ब्रेविसची 'हॉकी' स्टाईल फटकेबाजी : १०.४ षटकात शिवम दुबेने टाकलेला चेंडू ब्रेविसने एखाद्या हॉकी खेळाडूच्या ताकदीने सरळ रेषेत टोलावला. 'बॉटम हँड'चा वापर करून मारलेला हा चौकार इतका वेगवान होता की क्षेत्ररक्षकाला हलण्याची संधीही मिळाली नाही.
फुल टॉसवर षटकार : १०.५ षटकात दुबेने टाकलेला 'फुल टॉस' चेंडू ब्रेविसने लाँग-ऑनच्या डोक्यावरून ८३ मीटर लांब सीमारेषेबाहेर फेकून दिला.
अतिरिक्त धावांची भेट : या षटकात शिवम दुबेने दोन वाईड चेंडू टाकले, ज्याचा फायदा आफ्रिकेच्या फलंदाजांना मिळाला.
११ षटकांचा खेळ संपला असून आफ्रिका आता मोठ्या धावसंख्येकडे कूच करत आहे.
सुरुवातीच्या धक्क्यातून सावरत दक्षिण आफ्रिकेच्या फलंदाजांनी आता भारतीय गोलंदाजांवर प्रतिहल्ला चढवण्यास सुरुवात केली आहे. भारताचा हुकमी एक्का मानल्या जाणाऱ्या वरुण चक्रवर्तीच्या दुसऱ्या षटकात डेव्हिड मिलर आणि डेवाल्ड ब्रेविस यांनी तुफान फटकेबाजी करत तब्बल १७ धावा वसूल केल्या. ९ षटकांच्या अखेरीस दक्षिण आफ्रिकेने ३ बाद ७३ धावांपर्यंत मजल मारली आहे.
मिलरचा ९५ मीटरचा षटकार : ८.२ षटकात वरुणने टाकलेला चेंडू डेव्हिड मिलरने लाँग-ऑन सीमापार धाडला. हा ९५ मीटर लांब षटकार पाहून स्टेडियममधील प्रेक्षक थक्क झाले.
ब्रेविसचा 'नो-लूक' शॉट : ८.५ षटकात 'बेबी एबी' डेवाल्ड ब्रेविसने आपली चुणूक दाखवली. त्याने गुडघा टेकवून सरळ रेषेत ८२ मीटर लांब 'नो-लूक' षटकार ठोकत चेंडू प्रेक्षकांत भिरकावला.
चतुराईने मिळवलेला चौकार : ८.४ षटकात वरुणने वेगाने टाकलेल्या चेंडूवर ब्रेविसने अत्यंत उशिरा 'लेट कट' मारून कव्हरच्या क्षेत्ररक्षकाला चकवत चौकार मिळवला.
वरुण चक्रवर्तीची आतापर्यंतची आकडेवारी २ षटकांत २८ धावा अशी राहिली असून त्याला अद्याप यश मिळालेले नाही. दुसरीकडे, मिलर (३२) आणि ब्रेविस (२२) यांची जोडी जमू लागल्याने भारतीय गोटात चिंतेचे वातावरण निर्माण झाले आहे.
सुरुवातीच्या तीन धक्क्यांनंतर बॅकफूटवर गेलेल्या दक्षिण आफ्रिकेला सावरण्यासाठी अनुभवी डेव्हिड मिलर मैदानात उतरला आहे. फिरकीपटू वरुण चक्रवर्तीच्या पहिल्याच षटकात मिलरने दोन चौकारांसह ११ धावा वसूल करत भारतीय गोलंदाजांवर प्रतिहल्ला चढवला आहे. ५ षटकांच्या अखेरीस दक्षिण आफ्रिकेची धावसंख्या ३ बाद ३१ अशी आहे.
वरुण चक्रवर्तीने पाचव्या षटकाच्या दुस-या चेंडूवर मिलरला आपल्या फिरकीने चकवले होते, मात्र त्यानंतर मिलरने आपला आक्रमक पवित्रा स्वीकारला. त्याने चौथ्या चेंडूवर चेंडू सीमारेषेबाहेर पाठवला. त्यानंतर पुढचाही चेंडू ताकदीने टोलावला. दरम्यान, तिलक वर्मा आणि अर्शदीप सिंग यांनी धावून घेतलेल्या उत्तम क्षेत्ररक्षणामुळे मिलरला चौकारापासून रोखले, ज्यामुळे दोन धावांवर समाधान मानावे लागले. मिलर सध्या १० धावांवर खेळत असून त्याला 'बेबी एबीडी' डेवाल्ड ब्रेविस (३) साथ देत आहे.
नरेंद्र मोदी स्टेडियमवर जसप्रीत बुमराहच्या गोलंदाजीचे वादळ घोंघावत आहे. क्विंटन डी कॉकला बाद केल्यानंतर बुमराहने आता फॉर्मात असलेल्या रायन रिकलटनला आपल्या जाळ्यात ओढून दक्षिण आफ्रिकेची अवस्था दयनीय केली आहे. अवघ्या ४ षटकांच्या आत आफ्रिकेचे ३ प्रमुख फलंदाज तंबूत परतले आहेत.
पहिल्या स्पेलमध्ये बुमराहने आपल्या अनुभवाचा वापर करत डावाच्या ३.६ षटकांत एक 'स्लोअर डिलिव्हरी' (गती कमी केलेला चेंडू) टाकला. चेंडू लेग स्टंपच्या बाहेर पडून मध्यम यष्टीच्या दिशेने आत आला. रिकलटनने चेंडूची गती ओळखण्यात चूक केली आणि मोठा फटका मारण्याच्या नादात मिड-ऑफला उभ्या असलेल्या शिवम दुबेच्या हातात सोपा झेल दिला.
अहमदाबादची खेळपट्टी संथ असून चेंडू थांबून येत आहे. बुमराहच्या या भेदक माऱ्यामुळे दक्षिण आफ्रिकेचा संघ बॅकफूटवर गेला आहे. रिकलटन ७ धावा करून बाद झाला असून, आता १६० धावांचे लक्ष्य गाठणेही आफ्रिकेसाठी जिकिरीचे ठरणार असे चित्र दिसत आहे.
दक्षिण आफ्रिकेविरुद्धच्या सुपर-८ सामन्यात भारतीय गोलंदाजांनी सुरुवातीपासूनच वर्चस्व गाजवायला सुरुवात केली आहे. जसप्रीत बुमराहने क्विंटन डी कॉकला बाद केल्यानंतर, आता अर्शदीप सिंहने दक्षिण आफ्रिकेचा कर्णधार एडन मार्करमचा अडसर दूर करून प्रतिस्पर्धी संघाला दुसरा मोठा धक्का दिला आहे.
डावाच्या २.४ व्या षटकांत अर्शदीपने १३५ किमी वेगाने 'ओव्हरपिच' चेंडू फेकला. मार्करमने चेंडू थेट मिड-ऑफच्या डोक्यावरून मारण्याचा प्रयत्न केला, मात्र चेंडू बॅटच्या खालच्या टोकाला लागल्याने त्याला हवी तशी उंची मिळाली नाही. मिड-ऑफला तैनात असलेल्या हार्दिक पंड्याने कोणतीही चूक न करता हा सोपा झेल टिपला.
मार्करम अवघ्या ४ धावा करून बाद झाल्याने दक्षिण आफ्रिकेचे दोन्ही सलामीवीर आता माघारी परतले आहेत. यामुळे भारतीय संघाने सामन्यावर आपली पकड अधिक मजबूत केली आहे.
बुमराहने आपल्या लौकिकाला साजेसा स्पेल टाकत दक्षिण आफ्रिकेला पहिला आणि मोठा धक्का दिला. डावाच्या दुसऱ्याच षटकात बुमराहने आफ्रिकेचा स्फोटक सलामीवीर क्विंटन डी कॉकचा त्रिफळा उडवला.
१.५ व्या षटकांत १३७ किमी वेगाने आलेल्या बुमराहच्या एका 'इन-स्विंगर' चेंडूवर डी कॉकने मोठा फटका मारण्याचा प्रयत्न केला. मात्र, चेंडूने थोडा टप्पा खाऊन आत वळण घेतले आणि डी कॉकच्या पायांच्या फटीतून थेट लेग स्टंपवर जाऊन आदळला. बुमराहच्या या अचूक अँगलमुळे डी कॉक पूर्णपणे चकवा खाल्ला आणि अवघ्या ६ धावांवर माघारी परतला. बुमराहच्या या भेदक गोलंदाजीमुळे भारतीय चाहत्यांमध्ये उत्साहाचे वातावरण असून, दक्षिण आफ्रिकेची सुरुवात खडतर झाली आहे.
भारतीय संघ :
अभिषेक शर्मा, इशान किशन (यष्टीरक्षक), मध्य फळी: तिलक वर्मा, सूर्यकुमार यादव (कर्णधार), हार्दिक पंड्या, शिवम दुबे, रिंकू सिंह, वॉशिंग्टन सुंदर, अर्शदीप सिंह, जसप्रीत बुमराह, वरुण चक्रवर्ती
दक्षिण आफ्रिका संघ :
एडन मार्करम (कर्णधार), क्विंटन डी कॉक (यष्टीरक्षक), रायन रिकलटन, डेवाल्ड ब्रेविस, डेव्हिड मिलर, ट्रिस्टन स्टब्स, मार्को यान्सेन, कॉर्बिन बॉश, केशव महाराज, कागिसो रबाडा, लुंगी एनगिडी
अहमदाबाद : टी-२० विश्वचषक २०२६ च्या 'सुपर-८' फेरीतील हायव्होल्टेज लढतीत आज भारत आणि दक्षिण आफ्रिका हे दोन दिग्गज संघ आमनेसामने उभे ठाकले आहेत. अहमदाबादच्या नरेंद्र मोदी स्टेडियमवर होत असलेल्या या सामन्यात दक्षिण आफ्रिकेचा कर्णधार एडन मार्करमने टॉस जिंकून प्रथम फलंदाजी करण्याचा निर्णय घेतला आहे. दरम्यान, भारतीय संघाने आपल्या अंतिम अकरामध्ये (Playing XI) एक धाडसी निर्णय घेतला असून, अक्षर पटेलला पुन्हा एकदा राखीव बाकावर बसवून वाशिंग्टन सुंदरवर विश्वास दर्शवला आहे.
दोन्ही संघांसाठी सुपर-८ फेरीतील हा पहिलाच सामना आहे. ज्या गटात 'नेट रन रेट' निर्णायक ठरू शकतो, तिथे सुरुवातीचा विजय आणि लय मिळवणे दोन्ही संघांसाठी अत्यंत महत्त्वाचे आहे.
टीम इंडियाची आतापर्यंतची कामगिरी सांख्यिकीयदृष्ट्या अत्यंत प्रभावी राहिली आहे. भारताच्या तीन मुख्य आधारस्तंभ आहेत.
इशान किशन : पॉवरप्लेमध्ये प्रतिस्पर्धी गोलंदाजांवर तुटून पडत त्याने ४ सामन्यांत २०२.२९ च्या स्ट्राइक रेटने १७६ धावा कुटल्या आहेत.
सूर्यकुमार यादव : 'मिस्टर ३६०' ने ५४ च्या सरासरीने १६२ धावा केल्या असून, नाबाद ८४ ही त्याची सर्वोत्तम धावसंख्या आहे. त्याने स्थिरता आणि आक्रमकता यांचा सुरेख संगम साधला आहे.
वरुण चक्रवर्ती : मधल्या षटकांमध्ये वरुणने आपली जादू चालवत १२ षटकांत ५.१६ च्या इकॉनॉमीने ९ बळी घेतले आहेत.
प्रोटीज संघ देखील तितक्याच ताकदीनिशी मैदानात उतरला आहे. कर्णधार एडन मार्करमने १७८ धावा (स्ट्राइक रेट १९०) करून संघाचे नेतृत्व केले आहे, तर रायन रिकलटनने देखील १९० पेक्षा जास्त स्ट्राइक रेटने १४५ धावा जमवल्या आहेत. गोलंदाजीमध्ये लुंगी एनगिडी (८ बळी) आणि मार्को यान्सेन (७ बळी) भारताच्या फलंदाजीची परीक्षा पाहण्यास सज्ज आहेत.
दोन्ही संघ जेव्हा शेवटच्या वेळी टी-२० विश्वचषकात भिडले होते, तेव्हा क्रिकेट जगताने एक थरारक अंतिम सामना अनुभवला होता. ब्रिजटाउन (२०२४) येथील त्या सामन्यात भारताने १७६ धावा केल्या होत्या. विजयासाठी अखेरच्या ५ षटकांत ३० धावांची गरज असताना दक्षिण आफ्रिका सुस्थितीत होती, मात्र जसप्रीत बुमराह आणि हार्दिक पंड्या यांनी सामन्याचे पारडे फिरवले. भारताने ७ धावांनी विजय मिळवत विश्वविजेतेपदावर नाव कोरले होते. आज पुन्हा एकदा त्याच जिद्दीने दोन्ही संघ भिडणार आहेत.
