IND vs NZ ODI squad 2027 World Cup : "आता २०२७ च्या विश्वचषकासाठी तयारी अधिक भक्कम करण्याची वेळ आली आहे. नवीन खेळाडूंवर प्रयोग करण्याऐवजी, २०२७ च्या विश्वचषकात विचार केला जाणाऱ्या खेळाडूंनाच जास्तीत जास्त संधी दिली पाहिजे," असे सूचक विधान वेस्ट इंडिजविरुद्धची एकदिवसीय मालिका २-१ ने जिंकल्यानंतर भारतीय क्रिकेट संघाचा कर्णधार शुभमन गिल याने केले. त्यामुळे न्यूझीलंड दौऱ्यासाठी केवळ अशाच खेळाडूंची निवड केली जाईल, ज्यांचा विचार २०२७ च्या विश्वचषकासाठी केला जात असल्याचे स्पष्ट झाले आहे. जाणून घेऊया भारत विरुद्ध न्यूझीलंड एकदिवसीय मालिकेसाठी निवडलेल्या संघाबाबतचे ५ महत्त्वाचे मुद्दे...
भारतीय क्रिकेट नियामक मंडळाने (BCCI) आगामी न्यूझीलंड दौऱ्यासाठी दोन स्वतंत्र एकदिवसीय संघ जाहीर केले आहेत. पहिल्या तीन सामन्यांत नियमित कर्णधार शुभमन गिल संघाचे नेतृत्व करेल. त्यानंतर, गिल आणि इतर काही खेळाडू कसोटी मालिकेच्या तयारीवर लक्ष केंद्रित करतील, यावेळी उपकर्णधार श्रेयस अय्यर संघाची धुरा सांभाळणार आहे.
अष्टपैलू रवींद्र जडेजाची वेस्ट इंडिजविरुद्धच्या तीन सामन्यांच्या मालिकेसाठी निवड झाली होती. ही मालिका त्याची विश्वचषक संघातील स्थान कायम ठेवण्यासाठीची परीक्षाच होती. मात्र तो अपयशी ठरला. याचा परिणाम असा झाला आहे की, त्याला न्यूझीलंड दौऱ्यासाठीच्या एकदिवसीय संघात स्थान मिळाले नाही.
रवींद्र जडेजा याला न्यूझीलंड दौऱ्यासाठीच्या एकदिवसीय संघात स्थान मिळाले नाही. त्यामुळे आता अशी चर्चा सुरू झाली आहे की, २०२७ च्या विश्वचषकात खेळण्याचे जडेजाचे स्वप्नभंग झाले आहे. वेस्ट इंडिजविरुद्धच्या एकदिवसीय मालिकेत, जडेजाने दोन सामन्यांत एकूण २० षटके गोलंदाजी केली, परंतु त्याला केवळ दोन बळी घेता आले; दुसरीकडे, फलंदाजीमध्येही त्याला आपली छाप पाडण्याची संधी मिळाली नाही.
यशस्वी जैस्वालची वेस्ट इंडिजविरुद्धच्या एकदिवसीय मालिकेसाठी निवड झाली होती, परंतु त्याला तीनपैकी एकाही सामन्यात खेळण्याची संधी मिळाली नाही. आता, न्यूझीलंडविरुद्धच्या मालिकेसाठी जाहीर झालेल्या एकदिवसीय संघातही त्याचे नाव नाही. मात्र, कसोटी संघात त्याने आपले स्थान टिकवून ठेवले आहे. एकदिवसीय क्रिकेटमध्ये सातत्याने संधी न मिळाल्यामुळे, या प्रकारात स्वतःचे स्थान पक्के करणे जयस्वालसाठी आव्हानात्मक ठरले आहे. त्यामुळे आता तोही २०२७ विश्वचषक स्पर्धेतून बाहेर गेला असल्याचे मानले जात आहे.
तिलक वर्मा, आकिब नबी, कुमार कुशाग्र आणि यश ठाकूर यांचा शेवटच्या दोन सामन्यांसाठीच्या एकदिवसीय संघात समावेश करण्यात आला आहे. कुमार कुशाग्रची एकदिवसीय संघात निवड होण्याची ही पहिलीच वेळ आहे. अशा परिस्थितीत, हे खेळाडू भारताच्या २०२७ च्या विश्वचषक योजनेचा भाग असू शकतात का? आकिब नबी आणि यश ठाकूर यांना वेगवान गोलंदाजी आक्रमणासाठी पर्यायी खेळाडू म्हणून तयार केले जाऊ शकते, तर तिलक वर्मा श्रेयस अय्यरसाठी पर्यायी खेळाडू म्हणून काम करू शकतो, असेही मानले जात आहे.
जसप्रीत बुमराहवरील अतिरिक्त ताण लक्षात घेता, त्याला वनडे (ODI) संघात स्थान देण्यात आलेले नाही. मात्र रिपोर्टनुसार, त्याच्यासाठी बीसीसीआयने एक विशेष योजना आखली आहे. आता जानेवारी २०२७ पासून तो वनडे सामन्यांवर आपले लक्ष केंद्रित करेल. या वर्षाच्या उत्तरार्धात भारत ऑस्ट्रेलियाविरुद्ध पाच सामन्यांची कसोटी मालिका खेळणार असून, यामध्ये बुमराह महत्त्वाची भूमिका बजावेल. त्यानंतरच तो एकदिवसीय सामन्यांच्या तयारीला सुरुवात करेल.
न्यूझीलंड दौऱ्यावरील पहिल्या तीन एकदिवसीय सामन्यांसाठी भारतीय संघ: शुभमन गिल (कर्णधार), रोहित शर्मा, विराट कोहली, श्रेयस अय्यर (उपकर्णधार), केएल राहुल (यष्टीरक्षक), नितीश कुमार रेड्डी, अक्षर पटेल, नमन धीर, अंशुल कंबोज, गुरनूर ब्रार, ऋतुराज गायकवाड, अर्शदीप सिंग, इशान किशन (यष्टीरक्षक), मोहम्मद सिराज, प्रसिद्ध कृष्णा, कुलदीप यादव.
न्यूझीलंड दौऱ्यावरील चौथ्या आणि पाचव्या एकदिवसीय सामन्यांसाठी भारतीय संघ: श्रेयस अय्यर (कर्णधार), रोहित शर्मा, विराट कोहली, तिलक वर्मा, इशान किशन (यष्टीरक्षक, उपकर्णधार), नितीश कुमार रेड्डी, अक्षर पटेल, नमन धीर, आकिब नबी, गुरनूर ब्रार, ऋतुराज गायकवाड, अर्शदीप सिंग, कुमार कुशाग्र (यष्टीरक्षक), मोहम्मद सिराज, यश ठाकूर, कुलदीप यादव.
