भारत आणि इंग्लंड यांच्यातील पाच सामन्यांच्या कसोटी मालिकेतील पहिला सामना शुक्रवारपासून लीड्स येथील हेडिंग्ले क्रिकेट मैदानावर सुरू झाला. या सामन्यातून भारतीय संघातर्फे साई सुदर्शनला पदार्पणाची संधी मिळाली. चेतेश्वर पुजाराच्या हस्ते सुदर्शनला कसोटी कॅप प्रदान करण्यात आली. भारताकडून कसोटी खेळणारा सुदर्शन 317 वा खेळाडू ठरला आहे.
तथापि, 23 वर्षीय साई सुदर्शनला आपल्या पदार्पणाच्या डावात विशेष प्रभावी कामगिरी करता आली नाही. साईने केवळ 4 चेंडूंचा सामना केला आणि तो शून्यावर तंबूत परतला. डावातील 26 व्या षटकातील चौथ्या चेंडूवर इंग्लंडचा कर्णधार बेन स्टोक्सने यष्टिरक्षक जेमी स्मिथकरवी साई सुदर्शनला झेलबाद केले. सुदर्शनने लेग-स्टंपवरील चेंडूवर फ्लिक शॉट खेळण्याचा प्रयत्न केला होता. मात्र, फटक्याची वेळ अचूक न साधल्याने चेंडू बॅटची कड घेऊन स्मिथच्या उजवीकडे गेला, जिथे त्याने झेल टिपण्यात कोणतीही कसूर केली नाही.
भारतीय कसोटी इतिहासात असे प्रथमच घडले आहे की, पदार्पणाच्या कसोटी डावात तिसऱ्या क्रमांकावर फलंदाजीस उतरलेला एखादा फलंदाज खाते न उघडताच बाद झाला. इतकेच नव्हे तर, कसोटी पदार्पणाच्या डावात पहिल्या तीन क्रमांकावर फलंदाजी करताना शून्यावर बाद होणारा सुदर्शन हा तिसरा भारतीय खेळाडू ठरला आहे.
यापूर्वी कृष्णम्माचारी श्रीकांत आणि देवांग गांधी यांच्या नावावरही अशा लाजिरवाण्या विक्रमाची नोंद आहे. हे दोन्ही खेळाडू त्यांच्या पदार्पणाच्या कसोटी डावात सलामीवीर म्हणून खेळले होते. पदार्पणाच्या कसोटी डावात शून्यावर बाद होणारा सुदर्शन एकूण 29 वा भारतीय खेळाडू आहे.
कृष्णम्माचारी श्रीकांत वि. इंग्लंड, वानखेडे 1981
देवांग गांधी वि. न्यूझीलंड, मोहाली, 1999
साई सुदर्शन वि. इंग्लंड, लीड्स 2025
1. चंदू सरवटे - 1946
2. जेनी इराणी - 1947
3. एस.ए. बॅनर्जी - 1948
4. गुलाम अहमद - 1948
5. सुभाष गुप्ते - 1951
6. गुलाबराय रामचंद्र - 1952
7. जसुभाई पटेल - 1955
8. मनोहर हार्डीकर - 1958
9. वेंकटप्पा मुद्दैया - 1959
10. मन मोहन सूद - 1960
11. भगवत चंद्रशेखर - 1964
12. उमेश कुलकर्णी - 1967
13. एकनाथ सोलकर - 1969
14. गुंडप्पा विश्वनाथ - 1969
15. धीरज परसाना - 1979
16. कृष्णम्माचारी श्रीकांत - 1981
17. मनिंदर सिंग - 1982
18. रशीद पटेल - 1988
19. विवेक राजदान - 1989
20. अॅबी कुरुविला - 1997
21. विजय भारद्वाज - 1999
22. देवांग गांधी - 1999
23. रॉबिन सिंग - 1999
24. अजय रात्रा - 2002
25. पार्थिव पटेल - 2002
26. ऋद्धिमान साहा - 2010
27. आर. अश्विन - 2011
28. उमेश यादव - 2011
29. साई सुदर्शन - 2025
