नवी दिल्ली : आयसीसी (ICC) महिला एकदिवसीय विश्वचषक २०२५ मध्ये उत्कृष्ट प्रदर्शन करणाऱ्या ऑस्ट्रेलियन संघाला मोठा धक्का बसला आहे. संघाची कर्णधार आणि स्टार यष्टिरक्षक-फलंदाज एलिसा हीली ही इंग्लंडविरुद्धच्या महत्त्वाच्या सामन्यातून बाहेर झाली आहे. ती पिंडरीच्या स्नायूतील दुखापतीने त्रस्त आहे. बुधवारी २२ ऑक्टोबर रोजी हा महत्त्वपूर्ण सामना इंदूरच्या होळकर स्टेडियमवर खेळला जाणार आहे.
एलिसा हीलीला ही दुखापत मागील शनिवारी सराव सत्रादरम्यान झाली. संघ व्यवस्थापनाने पुढील सामन्यात ती खेळणार नसल्याची पुष्टी केली आहे आणि तिच्या शारीरिक तंदुरुस्तीवर सातत्याने लक्ष ठेवले जात आहे. ती २५ ऑक्टोबर रोजी दक्षिण आफ्रिकेविरुद्धच्या अंतिम लीग सामन्यापूर्वी तंदुरुस्त होईल अशी अपेक्षा व्यक्त केली गेली आहे.
हीलीच्या अनुपस्थितीत ताहलिया मॅक्ग्रा संघाचे नेतृत्व करेल, तर बेथ मूनी यष्टिरक्षणाची जबाबदारी सांभाळेल. २२ वर्षीय युवा सलामीवीर जॉर्जिया वोल हिला आघाडीच्या फळीत फलंदाजीची संधी मिळेल अशी शक्यता आहे.
हीली संपूर्ण स्पर्धेत उत्कृष्ट फॉर्ममध्ये राहिली आहे. तिने चार सामन्यांमध्ये २९४ धावा केल्या आहेत. त्यात सलग दोन शतकांचा समावेश आहे. भारताविरुद्धच्या सामन्यात तिने कर्णधार म्हणून पहिले शतक (१४२ धावा) झळकावले, ज्यामुळे ऑस्ट्रेलियाने महिला एकदिवसीय क्रिकेटच्या इतिहासातील सर्वात मोठ्या यशस्वी धावसंख्येचा पाठलाग केला. त्यानंतर बांगलादेशविरुद्ध तिने नाबाद ११३ धावा करत संघाला १० गडी राखून विजय मिळवून दिला होता.
ऑस्ट्रेलियाने आधीच उपांत्य फेरीसाठी पात्रता मिळवली आहे. मात्र, तरीही संघाला हीलीच्या दुखापत म्हणजे मोठा धक्का असल्याचे मानले जात आहे. त्यामुळे ती लवकरात लवकर पूर्णपणे तंदुरुस्त होऊन बाद फेरीच्या सामन्यांमध्ये पुनरागमन करेल अशी आशा आहे. इंग्लंड आणि ऑस्ट्रेलिया हे दोन्ही संघ उपांत्य फेरीत पोहोचले आहेत, परंतु २२ ऑक्टोबरचा हा सामना गुणतालिकेतील अव्वल स्थानासाठी महत्त्वपूर्ण ठरणार आहे.
एलिसा हीली पुढील सामना खेळू शकणार नसली तरी, तिच्या उत्कृष्ट कामगिरीचा तिला मोठा फायदा झाला आहे. आयसीसी एकदिवसीय क्रमवारीत हीलीने एक स्थानाची झेप घेत तिसरे स्थान पटकावले आहे. तिचे रेटिंग ७१८ आहे. भारताची स्टार फलंदाज स्मृती मानधना अव्वल स्थानी कायम आहे. मानधनाच्या रेटिंगमध्ये वाढ झाली असून, इंग्लंडची कर्णधार नॅट सिव्हर-ब्रंट दुसऱ्या स्थानावर आहे, तिचे रेटिंग ७२६ आहे.
