दुबई : अंडर-१९ वर्ल्ड कपच्या उपांत्य फेरीत भारतीय युवा संघाने आपल्या नावाचा दबदबा निर्माण करत अफगाणिस्तानचा ७ गडी राखून धुव्वा उडवला. ३११ धावांचे विशाल लक्ष्य भारताने अवघ्या ४१.१ षटकांत पूर्ण करत दिमाखात अंतिम फेरीत प्रवेश केला आहे. या विजयाचा शिल्पकार ठरला तो सलामीवीर ॲरॉन जॉर्ज, ज्याने ११५ धावांची मॅरेथॉन खेळी साकारली.
३११ धावांचा पाठलाग करताना भारताला वैभव सूर्यावंशी आणि एरॉन जॉर्ज यांनी तुफानी सुरुवात करून दिली. सूर्यावंशीने केवळ ३३ चेंडूंत ९ चौकार आणि ४ षटकारांच्या मदतीने ६८ धावांची आक्रमक खेळी केली. पहिल्या १० षटकांच्या पॉवरप्लेमध्येच भारताने बिनबाद ९१ धावा कुटल्या होत्या. पहिल्या विकेटसाठी या जोडीने ५७ चेंडूंत ९० धावांची भागीदारी करून विजयाचा पाया रचला.
सूर्यावंशी बाद झाल्यानंतर कर्णधार आयुष म्हात्रेने (६२ धावा) संयमी फलंदाजी करत ॲरॉन जॉर्जला साथ दिली. या दोघांनी दुसऱ्या विकेटसाठी ११४ धावा जोडल्या. एका बाजूने म्हात्रेने खेळपट्टीवर टिकून राहणे पसंत केले, तर दुसऱ्या बाजूने जॉर्जने अफगाण गोलंदाजांचा समाचार घेणे सुरूच ठेवले. जॉर्जने १०४ चेंडूंत १५ चौकार आणि २ षटकारांसह ११५ धावा फटकावून अफगाणिस्तानच्या आशा संपुष्टात आणल्या.
सामना शेवटच्या टप्प्यात असताना विहान मल्होत्राने नाबाद ३८ धावांची खेळी करत भारताला विजया समीप नेले. ३९ व्या षटकात जॉर्ज बाद झाला तेव्हा भारताला विजयासाठी अवघ्या काही धावांची गरज होती. वेदांत त्रिवेदीने मैदानात येत विजयी सोपस्कार पूर्ण केले आणि ४२ व्या षटकाच्या पहिल्याच चेंडूवर भारताने ७ गडी राखून विजय साजरा केला.
भारतीय संघ विजयाच्या उंबरठ्यावर असतानाच एक मोठा धक्का बसला. सलामीवीर आयुष म्हात्रे आणि एरॉन जॉर्ज यांच्यातील शतकी भागीदारी तोडण्यात अफगाणिस्तानला अखेर यश आले. २७ व्या षटकाअखेर भारताने २ बाद २०८ धावा केल्या असून, आता विहान मल्होत्रा आणि एरॉन जॉर्ज ही जोडी मैदानात आहे.
सामन्यावर भारताची पकड मजबूत असताना २७ व्या षटकात अफगाणिस्तानचा वेगवान गोलंदाज नूरिस्तानी ओमरझाई याने भारताला दुसरा धक्का दिला. आयुष म्हात्रेने फ्लिक शॉट मारण्याच्या नादात चेंडू हवेत उडवला. मिड-विकेटच्या दिशेने मागे धावत जात ओस्मान सादातने एका कठीण झेलाचे रूपांतर उत्कृष्ट कॅचमध्ये केले. आयुष म्हात्रे ५९ चेंडूत ६२ धावा (५ चौकार आणि ४ षटकार) काढून बाद झाला. त्याच्या या खेळीने भारताला विजयाच्या अतिशय जवळ नेऊन ठेवले आहे.
या डावाचे मुख्य वैशिष्ट्य म्हणजे एरॉन जॉर्ज आणि आयुष म्हात्रे यांच्यातील १०० धावांची भागीदारी. २४ व्या षटकात वाहिदुल्ला झाद्रानच्या चेंडूवर एक धाव घेत या जोडीने ही महत्वपूर्ण टप्पा गाठला. एरॉन जॉर्ज सध्या ६७ धावांवर खेळत असून त्याने आपला संयम कायम राखला आहे. अफगाणिस्तानच्या खराब क्षेत्ररक्षणामुळे भारताला अनेकदा जीवदान मिळाले, मात्र आयुषच्या विकेटने अफगाण संघात पुन्हा उत्साहाचे वातावरण निर्माण झाले आहे.
२५ वे षटक : भारताने २०० धावांचा टप्पा पार केला.
२४ वे षटक : एरॉन आणि आयुष यांच्यात १०० धावांची भागीदारी पूर्ण.
२७ वे षटक : आयुष म्हात्रे (६२ धावा) बाद, विहान मल्होत्राची मैदानात एन्ट्री.
नूरिस्तानी ओमरझाईने आतापर्यंत ४६ धावा देऊन २ बळी घेतले आहेत आणि तोच अफगाणिस्तानचा सर्वात यशस्वी गोलंदाज ठरला आहे. इतर गोलंदाज मात्र भारतीय फलंदाजांवर दबाव निर्माण करण्यात अपयशी ठरले.
स्कोअर कार्ड (२७ षटकाअखेर):
भारत U19: २०८/२
भारतीय युवा संघाने वर्चस्व गाजवत विजयाच्या दिशेने भक्कम पाऊल टाकले आहे. सलामीवीर वैभव सुर्यवंशीच्या झंझावाती खेळीनंतर आयुष म्हात्रे आणि एरॉन जॉर्ज या जोडीने अफगाण गोलंदाजांचा समाचार घेत भारताची स्थिती मजबूत केली. २३ व्या षटकाअखेर भारताने १ बाद १८९ धावा केल्या असून आयुष आणि एरॉन दोघांनीही आपापली अर्धशतके पूर्ण केली.
भारताचा डाव सावरताना आयुष म्हात्रेने आपल्या आक्रमक शैलीचे प्रदर्शन केले. त्याने अवघ्या ४५ चेंडूंमध्ये ५२ धावांची खेळी साकारली, ज्यात काही उत्कृष्ट षटकारांचा समावेश होता. हे आयुषचे या स्पर्धेतील दुसरे अर्धशतक ठरले. दुसरीकडे, एरॉन जॉर्जने अत्यंत संयमी पण तितकीच प्रभावी फलंदाजी करत ६१ चेंडूत ६० धावा फटकावल्या. २० व्या षटकात खतीर स्तानिकझाईच्या चेंडूवर चौकार लगावत एरॉनने आपले अर्धशतक साजरे केले.
वैभव सुर्यवंशी बाद झाल्यानंतर भारतीय डावाचा वेग थोडा मंदावेल असे वाटले होते, परंतु आयुष आणि एरॉनने अफगाण गोलंदाजांना डोके वर काढण्याची संधीच दिली नाही. १९ व्या षटकात आयुष म्हात्रेने रूहउल्ला अरबला दोन गगनभेदी षटकार खेचत १३ धावा वसूल केल्या. तर २१ व्या षटकात उझैरुल्ला नियाझाईच्या गोलंदाजीवर एरॉन जॉर्जने सलग दोन चौकार मारत १२ धावा कुटल्या. २२ व्या षटकात आयुषने एक धाव घेत आपले अर्धशतक पूर्ण केले.
अफगाणिस्तानच्या गोलंदाजांनी काही प्रसंगी भारतीय फलंदाजांना अडचणीत आणले होते, मात्र क्षेत्ररक्षकांच्या सुमार कामगिरीमुळे त्यांना यश मिळाले नाही. भारताने या जीवनदानाचा पुरेपूर फायदा उठवला. विशेषतः नूरिस्तानी ओमरझाई आणि खतीर स्तानिकझाई या गोलंदाजांनी अनेकदा चेंडू बीट केला, पण नशिबाची साथ भारतीय फलंदाजांना मिळाली.
सामन्याची सध्याची स्थिती (२३ षटकांनंतर) : भारत U19: १८९/१
वैभव सूर्यवंशीने केवळ २४ चेंडूंत तुफानी अर्धशतक ठोकत अफगाण गोलंदाजांची झोप उडवली. मात्र, तो बाद झाल्यानंतर कर्णधार आयुष म्हात्रेने सूत्रे हाती घेत भारताला १०० धावांचा टप्पा पार करून दिला.
सलामीवीर वैभव सूर्यवंशी आज वेगळ्याच मूडमध्ये होता. त्याने मैदानावर चौफेर फटकेबाजी करत केवळ २४ चेंडूंत ५० धावा पूर्ण केल्या. ६८ धावांच्या आपल्या खेळीत त्याने ९ चौकार आणि ४ उत्तुंग षटकार मारले. विशेषतः अब्दुल अझीझच्या षटकात त्याने सलग दोन चौकार आणि एक षटकार ठोकून अफगाणिस्तानला बॅकफूटवर ढकलले. मात्र, १० व्या षटकात नूरीस्तानी ओमरझाईने त्याला शॉर्ट बॉलवर चकवले आणि ओस्मान सादातने त्याचा झेल टिपला.
वैभव बाद झाल्यानंतर मैदानावर आलेल्या कर्णधार आयुष म्हात्रेने सुरुवातीला काही चेंडू चाचपून खेळले. एका वेळी खातीर स्तानिकझाईचा चेंडू उसळला आणि यष्टीरक्षकाच्या चेहऱ्याला लागला, ज्यामुळे खेळ काही काळ थांबला होता. मात्र, त्यानंतर आयुषने आपले 'रुद्र' रूप धारण केले. खाते उघडण्यासाठी ८ चेंडू घेतलेल्या आयुषने थेट षटकाराने आपले खाते उघडले. १२ व्या षटकात ओमरझाईला एक षटकार आणि एक चौकार ठोकत त्याने भारताची धावसंख्या १०० च्या पार नेली.
भारतीय फलंदाजी : वैभवने सुरुवातीला निर्माण केलेल्या दबावाचा फायदा आता आरॉन जॉर्ज आणि आयुष म्हात्रे घेत आहेत. आरॉन जॉर्ज (२३*) अतिशय संयमाने एक बाजू लावून धरून आहे, तर आयुष (१६*) मोठी धावसंख्या उभारण्याच्या तयारीत आहे. ९.०८ च्या धावगतीने भारत सध्या वाटचाल करत आहे.
अफगाण गोलंदाजी : नूरीस्तानी ओमरझाईने ३ षटकांत २० धावा देत वैभवची महत्त्वाची विकेट काढली आणि अफगाणिस्तानला सामन्यात परत आणले. मात्र, खातीर स्तानिकझाई आणि अब्दुल अझीझ यांना भारतीय फलंदाजांनी सातत्याने लक्ष्य केले आहे. अफगाणिस्तानचे क्षेत्ररक्षण आजही सुमार राहिले, ज्यामध्ये आरॉन जॉर्जचा एक सोपा झेल सुटला.
सामन्याचे समीकरण : सध्या भारत १२ षटकांत १ बाद १०९ धावांवर आहे. वैभवने दिलेल्या स्फोटक सुरुवातीनंतर आता मध्यम फळीला ही लय कायम राखण्याचे आव्हान आहे.
अफगाणिस्तानने विजयासाठी दिलेल्या ३११ धावांच्या महाकाय आव्हानाचा पाठलाग करताना भारतीय युवा फलंदाजांनी 'आक्रमकता' हाच आपला मंत्र असल्याचे स्पष्ट केले आहे. सलामीवीर वैभव सूर्यवंशी आणि ॲरॉन जॉर्ज यांनी केवळ ६ षटकांत ५५ धावा कुटत अफगाणिस्तानच्या गोटात घबराट निर्माण केली. विशेषतः वैभव सूर्यवंशीने आपल्या बॅटमधून धावांची जी आतषबाजी केली, त्यासमोर अफगाण गोलंदाज हतबल दिसले.
भारताची सुरुवात ॲरॉन जॉर्जच्या नजाकतदार चौकाराने झाली. मात्र, डावाच्या पाचव्या षटकात भारताला नशिबाची मोठी साथ मिळाली. अब्दुल अझीझच्या चेंडूवर वैभव सूर्यवंशीने एक सोपा झेल पॉईंटला उडवला होता, परंतु उझैरउल्लाने हा 'लॉलीपॉप' झेल सांडला. जीवदान मिळाल्यावर वैभवने मागे वळून पाहिलेच नाही. वाहिदुल्ला झद्रानच्या षटकात त्याने एक उत्तुंग षटकार आणि दोन चौकार ठोकून १५ धावा वसूल केल्या.
मैदानावर फलंदाजीची दोन वेगळी रूपं पाहायला मिळाली. वैभव सूर्यवंशी आपली अफाट ताकद वापरून चेंडू सीमापार धाडत होता, तर आरॉन जॉर्ज आपल्या मनगटाच्या जोरावर नजाकतदार फटके खेळत होता. सहाव्या षटकात वाहिदुल्ला झद्रानला ॲरॉनने सलग दोन चौकार मारले, तर वैभवने एक उत्तुंग षटकार खेचला. या षटकात एकूण १९ धावा आल्या आणि भारताने ५० धावांचा टप्पा पार केला.
भारतीय फलंदाजी : वैभव सूर्यवंशीने केवळ १८ चेंडूंत ३४ धावा (३ चौकार, २ षटकार) कुटल्या आहेत, तर ॲरॉन जॉर्ज १८ चेंडूंत २० धावांवर खेळत आहे. दोघांनीही अफगाण फिरकी आणि वेगवान माऱ्याला पायदळी तुडवले आहे.
अफगाण गोलंदाजी : वाहिदुल्ला झद्रानची गोलंदाजी आज सर्वात महागडी ठरली. त्याने ३ षटकांत ४० धावा दिल्या आहेत. अब्दुल अझीझने थोडा संयम राखण्याचा प्रयत्न केला, पण त्यालाही क्षेत्ररक्षकांनी साथ दिली नाही.
सध्या भारत बिनबाद ५५ धावांवर असून, धावांचा वेग ९ च्या वर आहे. हे वादळ असेच सुरू राहिले, तर ३११ धावांचे लक्ष्य टीम इंडियासाठी सोपे ठरेल यात शंका नाही.
हरारे : १९ वर्षांखालील विश्वचषकाच्या दुसऱ्या उपांत्य फेरीत आज अफगाणिस्तानच्या युवा फलंदाजांनी क्रिकेटच्या मैदानात जणू 'तांडव' रचले. नाणेफेक जिंकून प्रथम फलंदाजीचा धाडसी निर्णय घेणाऱ्या अफगाणिस्तानने भारतीय गोलंदाजीच्या चिंधड्या उडवत निर्धारित ५० षटकांत ४ बाद ३१० धावांचा डोंगर उभा केला. फैसल शिनोझादा आणि उझैरउल्ला नियाझाई या जोडगोळीने हरारेच्या मैदानावर धावांचा असा काही वणवा पेटवला की, त्यात टीम इंडियाची सर्व रणनीती उध्वस्त झाली.
अफगाणिस्तानची सुरुवात तशी संयमी होती. ओस्मान सादात (३९) आणि खालिद अहमदझाई (३१) यांनी पहिल्या विकेटसाठी ५३ धावांची भागीदारी करत पाया रचला. १३ व्या षटकात दीपेश देवेंद्रनने खालिदला बाद करत भारताला पहिले यश मिळवून दिले, तर २५ व्या षटकात कनिष्क चौहानने सादातला माघारी धाडले. ११७ धावांवर २ बळी गेल्यावर असे वाटले होते की भारतीय गोलंदाज आता सामन्यावर पकड मिळवतील, पण इथूनच खऱ्या 'विनाशा'ला सुरुवात झाली.
मैदानावर स्थिरावलेल्या फैसल शिनोझादा आणि उझैरउल्ला नियाझाई यांनी भारतीय गोलंदाजांना अक्षरशः रडकुंडीला आणले. फैसलने ९३ चेंडूंत ११० धावांची स्फोटक खेळी केली, ज्यात १५ चौकार आणि १ गगनचुंबी षटकाराचा समावेश होता. त्याला तोडीस तोड साथ देत उझैरउल्लाने ८६ चेंडूंत नाबाद १०१ धावा कुटल्या. या दोघांनी तिसऱ्या विकेटसाठी अवघ्या १३० चेंडूंत १४८ धावांची भागीदारी करून भारतीय गोलंदाजीचे कंबरडे मोडले.
भारतीय गोलंदाजी विस्कळीत : दीपेश देवेंद्रनने १० षटकांत ६४ धावा देत २ बळी मिळवले, पण त्याला इतर सहकाऱ्यांची साथ लाभली नाही. कनिष्क चौहानने ५५ धावांत २ बळी घेतले, मात्र आर. एस. अंबरीश (९ षटकांत ६५ धावा) आणि कर्णधार आयुष म्हात्रे यांना अफगाण फलंदाजांनी लक्ष्य केले. मधल्या षटकांत भारतीय गोलंदाज 'विकेट टेकिंग' चेंडू टाकण्याऐवजी केवळ धावा रोखण्याच्या बचावात्मक पवित्र्यात दिसले, ज्याचा फायदा अफगाणिस्तानने पुरेपूर घेतला.
अफगाण फलंदाजांचा रणधुमाळी : अफगाण फलंदाजांनी सुरुवातीला २ विकेट्स पडल्यानंतरही आपला नैसर्गिक आक्रमक खेळ सोडला नाही. ६.२ च्या सरासरीने धावा कुटताना त्यांनी भारतीय फिरकी आणि वेगवान अशा दोन्ही माऱ्याचा धुव्वा उडवला. डावाच्या अखेरीस अब्दुल अझीझने ७ चेंडूंत २३ धावांची नाबाद आतिषबाजी करत आगीत तेल ओतण्याचे काम केले.
पॉवरप्लेमध्ये ४२ धावांवर रोखणाऱ्या भारताला शेवटच्या १० षटकांत अफगाण फलंदाजांनी सळो की पळो करून सोडले. अंतिम ४ षटकांत अफगाणिस्तानने तब्बल ४५ धावा वसूल केल्या. आता ३११ धावांचे हे शिखर सर करून फायनलमध्ये प्रवेश करण्याचे मोठे आव्हान भारतीय फलंदाजांसमोर आहे. वैभव सूर्यवंशीच्या बॅटमधून ठिणगी पडणार की कर्णधार आयुष म्हात्रे जबाबदारीने खेळणार, याकडे आता सर्वांचे लक्ष लागले आहे.
