दुबई : आयसीसीने जाहीर केलेल्या ताज्या मानांकन यादीत जगज्जेत्या भारतीय क्रिकेट संघाने आपले अव्वल स्थान यशस्वीरीत्या कायम राखले आहे. या क्रमवारीत इंग्लंड दुसऱ्या, तर ऑस्ट्रेलिया तिसऱ्या क्रमांकावर आहे. यापूर्वी, मार्च महिन्यात टी-20 विश्वचषकात टीम इंडियाने नवा इतिहास रचला होता. त्याचे प्रतिबिंब या मानांकनात उमटले.
आयसीसीने स्पष्ट केल्यानुसार, या ताज्या क्रमवारीत मे 2025 पासून खेळल्या गेलेल्या सर्व सामन्यांना 100 टक्के महत्त्व, तर मागील दोन वर्षांतील सामन्यांना 50 टक्के महत्त्व देण्यात आले आहे. भारताचे सध्या 275 रेटिंग पॉईंटस् असून, दुसऱ्या क्रमांकावर असलेल्या इंग्लंडपेक्षा (262 पॉईंटस्) भारतीय संघ 13 पॉईंटस्ने आघाडीवर आहे. ऑस्ट्रेलिया 258 पॉईंटस्सह तिसऱ्या स्थानी असून इंग्लंडच्या अगदी जवळ पोहोचली आहे.
उत्तर अमेरिकेतील क्रिकेटची नवी ताकद म्हणून ओळखल्या जाणाऱ्या अमेरिकेने 6 गुणांची कमाई करत थेट 13 व्या स्थानावर झेप घेतली आहे. त्यांनी नेदरलँड (14 वे) आणि स्कॉटलंड (15 वे) या संघांना मागे टाकले आहे. नामिबिया 16 व्या स्थानी स्थिर असून, नेपाळ (17 वे) आणि ओमानने (19 वे) प्रत्येकी एका स्थानाची प्रगती केली आहे.
भारत : 275 गुण
इंग्लंड : 262 गुण
ऑस्ट्रेलिया : 258 गुण
न्यूझीलंड : 247 गुण
द. आफ्रिका : 244 गुण
पाकिस्तान : 240 गुण
वेस्ट इंडिज : 233 गुण
बांगला देश : 225 गुण
श्रीलंका : 221 गुण
अफगाण : 220 गुण
आयसीसीने दिलेल्या माहितीनुसार, क्रमवारीत सहभागी असलेल्या संघांची संख्या आता 102 वरून 98 वर आली आहे. मागील तीन वर्षांत किमान 8 टी-20 सामने खेळण्याच्या अटीची पूर्तता करू न शकलेल्या फिजी, गॅम्बिया, ग्रीस आणि इस्रायल या संघांना रँकिंगमधून वगळण्यात आले आहे.
आशियाई देशांच्या कामगिरीत मात्र उलथापालथ पाहायला मिळाली आहे. श्रीलंका संघाला 6 रेटिंग पॉईंटस्चे नुकसान सोसावे लागल्याने त्यांची 9 व्या क्रमांकावर घसरण झाली आहे. याचा फायदा बांगलादेशला मिळाला असून त्यांनी एका स्थानाची झेप घेत 8 वे स्थान पटकावले आहे. अफगाणिस्तान 220 गुणांसह 10 व्या स्थानावर असून श्रीलंकेच्या अगदी जवळ आहे. झिम्बाब्वे 11 व्या आणि आयर्लंड 12 व्या क्रमांकावर आहे.
