मुंबई : भारतीय संघाचा अष्टपैलू खेळाडू हार्दिक पंड्या सध्या कोणत्याही मैदानात खेळताना दिसत नसला, तरी आयपीएलमधील संभाव्य बदलांमुळे तो पुन्हा एकदा चर्चेच्या केंद्रस्थानी आला आहे. आगामी आयपीएल हंगामापूर्वी हार्दिक पांड्या मुंबई इंडियन्सची साथ सोडून चेन्नई सुपर किंग्ज (सीएसके) संघात सामील होण्याची शक्यता वर्तवली जात आहे. मात्र, या केवळ प्राथमिक चर्चा असून, मुंबई इंडियन्स किंवा चेन्नई सुपर किंग्ज या दोन्ही फ्रँचायझींकडून अद्याप कोणतेही अधिकृत वक्तव्य समोर आलेले नाही.
आयपीएल २०२६ चा हंगाम मुंबई इंडियन्ससाठी अत्यंत निराशाजनक ठरला होता. सलग खराब कामगिरीमुळे संघाला पहिल्याच फेरीत स्पर्धेतून बाहेर पडावे लागले होते. या दारुण पराभवानंतर मुंबई इंडियन्सच्या गोटात सर्व काही अलबेल नसल्याच्या बातम्या समोर आल्या होत्या, जरी त्याची अधिकृत पुष्टी होऊ शकली नव्हती. आता हार्दिक पंड्या सीएसकेमध्ये जाणार असल्याच्या चर्चांना उधाण आले आहे. यापूर्वी सीएसकेने राजस्थान रॉयल्सकडून संजू सॅमसनला ट्रेड करून क्रिकेट जगतात मोठी खळबळ उडवून दिली होती. आता जर हार्दिक पंड्या देखील सीएसकेमध्ये दाखल झाला, तर संघाला फलंदाजी आणि गोलंदाजी दोन्ही आघाड्यांवर बळकट करणारा एक तगडा अष्टपैलू खेळाडू मिळेल.
हार्दिक पंड्याच्या संभाव्य ट्रेडबाबत सध्या दोन मुख्य पर्यायांवर विचार केला जात असल्याचे मीडिया रिपोर्ट्समध्ये म्हटले आहे. पहिल्या पर्यायानुसार, हार्दिक पंड्या सीएसकेमध्ये समाविष्ट होईल आणि त्याच्या बदल्यात शिवम दुबे व आयुष म्हात्रे हे दोन खेळाडू मुंबई इंडियन्सच्या ताफ्यात जातील. तर दुसऱ्या पर्यायानुसार, हार्दिकच्या बदल्यात सीएसके शिवम दुबे आणि डेवाल्ड ब्रेव्हिस यांना मुंबई इंडियन्सकडे सोपवू शकते. अर्थात, या चर्चेत ज्या खेळाडूंची नावे समोर येत आहेत, ते सर्वच अत्यंत प्रभावी आणि सामने जिंकवून देण्याची क्षमता असणारे खेळाडू आहेत.
दुसरीकडे, चेन्नई सुपर किंग्जमध्ये आता एमएस धोनीच्या युगाचा अस्त होताना दिसत आहे. गेल्या हंगामात धोनी संघासोबत उपस्थित असला, तरी तो एकही सामना खेळू शकला नव्हता, ज्याचा परिणाम संघाच्या एकूण कामगिरीवर स्पष्टपणे दिसून आला. अशा परिस्थितीत आधी संजू सॅमसन आणि आता हार्दिक पांड्याला संघात आणणे ही सीएसकेची एक मोठी रणनीती (मास्टर स्ट्रोक) ठरू शकते.
तथापि, या चर्चा प्रत्यक्षात किती उतरतील हे दोन्ही फ्रँचायझींच्या अधिकृत घोषणेनंतरच स्पष्ट होईल. तसेच, संघाचे मुख्य प्रशिक्षक स्टीफन फ्लेमिंग यांनीही संघाची साथ सोडल्यामुळे चेन्नई सुपर किंग्ज सध्या एका मोठ्या संक्रमणाच्या आणि बदलाच्या टप्प्यातून जात असल्याचे दिसून येत आहे.
