GT vs RR Qualifier 2: IPL 2026 ची स्पर्धा आता निर्णायक टप्प्यावर पोहोचली आहे. आज (29 मे) न्यू चंदीगडमधील मुल्लांपूर येथे गुजरात टायटन्स आणि राजस्थान रॉयल्स यांच्यात क्वालिफायर-2 सामना रंगणार आहे. या सामन्यात विजय मिळवणारा संघ थेट फायनलमध्ये प्रवेश करेल, जिथे त्यांचा सामना रॉयल चॅलेंजर्स बंगळुरूशी होणार आहे. तर पराभूत संघाचे स्पर्धेतील आव्हान संपुष्टात येईल.
महाराजा यादविंद्र सिंह इंटरनॅशनल क्रिकेट स्टेडियम, मुल्लांपूर येथे हा हायव्होल्टेज सामना खेळवला जाणार असून, क्रिकेट चाहत्यांना आणखी एका रनफेस्टची अपेक्षा आहे.
शुभमन गिलच्या नेतृत्वाखालील गुजरात टायटन्सला क्वालिफायर-1 मध्ये RCB कडून तब्बल 92 धावांनी पराभवाचा धक्का बसला होता. त्यामुळे आजच्या सामन्यात गुजरात पुनरागमन करण्याच्या निर्धाराने मैदानात उतरेल.
दुसरीकडे, रियान परागच्या नेतृत्वाखालील राजस्थान रॉयल्सने एलिमिनेटरमध्ये सनरायझर्स हैदराबादचा 47 धावांनी पराभव करत दमदार विजय मिळवला. त्यामुळे राजस्थानचा आत्मविश्वास सध्या उंचावलेला दिसत आहे.
राजस्थानच्या चाहत्यांच्या अपेक्षा पुन्हा एकदा 15 वर्षीय वैभव सूर्यवंशीवर असतील. बिहारमधील समस्तीपूरचा हा युवा फलंदाज एलिमिनेटरमध्ये सनरायझर्सविरुद्ध फक्त 29 चेंडूत 97 धावांची वादळी खेळी करत चर्चेत आला होता. त्याची आक्रमक फलंदाजी गुजरातसाठी मोठं आव्हान ठरू शकते.
गोलंदाजीत जोफ्रा आर्चर राजस्थानच्या वेगवान माऱ्याचं नेतृत्व करणार आहे. एलिमिनेटरमध्ये त्याने तीन महत्त्वाच्या विकेट्स घेतल्या होत्या.
IPL मध्ये गुजरात आणि राजस्थान यांच्यात आतापर्यंत 10 सामने झाले आहेत. त्यात गुजरात टायटन्सने 7 वेळा विजय मिळवला, तर राजस्थानला केवळ 3 सामने जिंकता आले आहेत. त्यामुळे आकडेवारी गुजरातच्या बाजूने झुकलेली दिसते.
मुल्लांपूरची खेळपट्टी फलंदाजांसाठी अनुकूल मानली जात आहे. याच मैदानावर राजस्थानने मागील सामन्यात 243 धावांचा डोंगर उभा केला होता आणि सनरायझर्सला 196 धावांवर रोखलं होतं. त्यामुळे आजच्या सामन्यातही मोठ्या स्कोअरची अपेक्षा व्यक्त केली जात आहे.
साई सुदर्शन, शुभमन गिल (कर्णधार), जोस बटलर (यष्टीरक्षक), वॉशिंग्टन सुंदर, निशांत सिंधू, जेसन होल्डर, राशिद खान, कुलवंत खेजरोलिया, कगिसो रबाडा, मोहम्मद सिराज, प्रसिद्ध कृष्णा.
यशस्वी जयस्वाल, वैभव सूर्यवंशी, ध्रुव जुरेल (यष्टीरक्षक), रियान पराग (कर्णधार), डोनोव्हन फरेरा, रविंद्र जडेजा, दासुन शनाका, जोफ्रा आर्चर, नांद्रे बर्गर, यश राज पुंजा, बृजेश शर्मा.
हा सामना आज (29 मे) संध्याकाळी 7:30 वाजता सुरू होईल. क्रिकेट चाहते हा सामना Jio Hotstar अॅप आणि वेबसाइटवर लाईव्ह स्ट्रीमिंगद्वारे, तसेच Star Sports Network वर पाहू शकतात.
एकूणच, आजचा सामना हा केवळ फायनलचं तिकीट मिळवण्यासाठी नाही, तर प्रतिष्ठेची लढतही असणार आहे. गुजरात पुनरागमन करणार की राजस्थानची युवा फौज आणखी एक कमाल करणार, याकडे सर्वांचं लक्ष लागलं आहे.
