FIFA World Cup 2026 England vs Norway
मियामी: ज्युड बेलिंगहॅमच्या अफाट कामगिरीच्या जोरावर इंग्लंडने फिफा विश्वचषक २०२६ च्या उपांत्य फेरीत धडक मारली आहे. मियामी येथील 'हार्ड रॉक स्टेडियम'वर झालेल्या अटीतटीच्या सामन्यात इंग्लंडने अतिरिक्त वेळेत नॉर्वेचा २-१ असा पराभव केला. हाय-व्होल्टेज ड्रामा, तांत्रिक वाद आणि मैदानानावरील रणनीतीचा थरार अशा संपूर्ण वातावरणात बेलिंगहॅम इंग्लंडसाठी तारणहार ठरला.
सामन्यात दोन्ही संघ १-१ अशा बरोबरीत असताना खेळ अतिरिक्त वेळेत गेला. अतिरिक्त वेळेच्या तिसऱ्याच मिनिटाला मॉर्गन रॉजर्सने मारलेला एक वेगवान शॉट नॉर्वेच्या गोलकीपरला नीट अडवता आला नाही. तिथेच दबा धरून बसलेल्या रिअल माद्रिदच्या ज्युड बेलिंगहॅमने रिबाऊंडवर अचूक गोल करत इंग्लंडला २-१ अशी विजयी आघाडी मिळवून दिली. बेलिंगहॅमचा या स्पर्धेतील हा ६ वा गोल असून, त्याने आपला सहकारी हॅरी केनची बरोबरी केली आहे. सध्या तो किलियन एम्बापे आणि लिओनेल मेस्सी यांच्यापेक्षा केवळ दोन गोल मागे आहे.
या स्पर्धेत आपल्या ऐतिहासिक कामगिरीने आणि सोशल मीडिया गाजवणाऱ्या 'वायकिंग रो' सेलिब्रेशनमुळे चर्चेत आलेल्या नॉर्वेने सामन्यात दमदार सुरुवात केली होती. सामन्याच्या ३६ व्या मिनिटाला अँड्रियास श्शेलडेरपने अप्रतिम गोल करत इंग्लंडला पहिला धक्का दिला आणि नॉर्वेला १-० अशी आघाडी मिळवून दिली.
मात्र, पूर्वार्ध संपण्यापूर्वी एक मोठा वाद निर्माण झाला. नॉर्वेच्या एका गोल किकदरम्यान चेंडू हवेतील कॅमेऱ्याच्या केबलला लागून खाली पडल्याचे दिसले. हा चेंडू इलियट अँडरसनकडे गेला, ज्याने लगेचच पास देत बेलिंगहॅमकडून इंग्लंडसाठी १-१ असा बरोबरीचा गोल करून घेतला. नियमानुसार अशा वेळी खेळ थांबवून 'ड्रॉप बॉल' द्यायला हवा होता, मात्र पंचांचे याकडे दुर्लक्ष झाले. यावरून नॉर्वेच्या संघ व्यवस्थापनाने तीव्र आक्षेप नोंदवला.
उत्तरार्धात नॉर्वेचे नशीब आणखी खराब ठरले. ५६ व्या मिनिटाला तोर्बजॉर्न हेगेमने गोल करत नॉर्वेच्या चाहत्यांना जल्लोषाची संधी दिली होती. मात्र, व्हिडिओ असिस्टंट रेफ्रीने पडताळणीअंती स्टार खेळाडू एर्लिंग हालँडने पेनल्टी बॉक्समध्ये फाऊल केल्याचे स्पष्ट करत हा गोल बाद ठरवला, ज्यामुळे नॉर्वेला मोठा धक्का बसला.
इंग्लंडचा गोलकीपर जॉर्डन पिकफोर्डने आज भिंत बनून नॉर्वेचे अनेक प्रयत्न हाणून पाडले. त्याने पहिल्या हाफमध्ये मॅनचेस्टर सिटीचा स्टार स्ट्रायकर एर्लिंग हालँडचा एक अगदी जवळून मारलेला शॉट अडवला. संपूर्ण स्पर्धेत गोलचा पाऊस पाडणाऱ्या हालँडला इंग्लंडच्या बचावफळीने संपूर्ण सामन्यात शांत ठेवले. अतिरिक्त वेळेच्या दुसऱ्या हाफमध्ये थकून गेलेल्या हालँडला मैदानाबाहेर बोलावण्यात आले आणि नॉर्वेचे आव्हान संपुष्टात आले.
इंग्लंडचा संघ आता अटलांटा येथे होणाऱ्या आगामी हाय-प्रोफाइल उपांत्य फेरीच्या सामन्यासाठी सज्ज झाला आहे. बुधवारी होणाऱ्या या महामुकाबल्यात इंग्लंडचा सामना अर्जेंटिना किंवा स्वित्झर्लंड यांच्यातील विजेत्या संघाशी होईल.
दरम्यान, सामना सुरू होण्यापूर्वी दोन्ही संघांच्या खेळाडूंनी २५ वर्षीय दक्षिण आफ्रिकेचा मिडफिल्डर जयडेन ॲडम्स याला भावपूर्ण श्रद्धांजली वाहिली. शनिवारी त्याचे दुःखद निधन झाले होते, ज्याच्या सन्मानार्थ मैदानावर काही काळ शांतता पाळण्यात आली.
