FIFA World Cup 2026 Controversy : हद्दच झाली..! फिफा विश्वचषकात गोंधळ सुरूच; सामन्यापूर्वीच इंग्लंडच्या संघाचे साहित्य चोरीला!

FIFA World Cup 2026 Controversy : सुरक्षेच्या कारणावरून व्हिसा नाकारणे आणि तिकिटांच्या गगनाला भिडलेल्या दरांमुळे फिफा विश्वचषक २०२६ (FIFA World Cup 2026) ची सुरुवात प्रचंड गोंधळाने झाली आहे. सर्व वाद हे सामने सुरू झाल्यावर हळूहळू शांत होतील अशी अपेक्षा होती; परंतु परिस्थिती आणखीच बिघडत चालली आहे. शुक्रवारी संध्याकाळी घानाचा मिडफिल्डर थॉमस पार्ते याला कॅनडाचा व्हिसा नाकारण्यात आल्यामुळे तो स्पर्धेतील पहिल्या सामन्याला मुकणार आहे. अशातच आपल्या पहिल्या सामन्यापूर्वी कॅन्सस सिटीचा प्रवास करत असताना इंग्लंडच्या संघाचे ट्रेनिंग किट आणि इतर साहित्य चोरीला गेले आहे. याप्रकरणी स्थानिक पोलिसांनी दोन जणांना ताब्यात घेतले आहे.

ट्रेनिंग किट्सचे साहित्य गेले चोरीला

मीडिया रिपोर्ट्सनुसार, इंग्लंडच्या संघाचे साहित्य घेऊन जाणारी व्हॅन कॅन्सस सिटीमध्ये पोहोचली. त्यातील सामान उतरवले जात असताना चोरी उघडकीस आली. चोरीला गेलेले साहित्य इंग्लंडच्या विश्वचषक प्रतिनिधी मंडळाचे होते, ज्यामध्ये ट्रेनिंग किट्सचा समावेश आहे. याशिवाय आणखी कोणते सामान चोरीला गेले आहे, याचा शोध अधिकारी घेत आहेत.

दोन संशयित ताब्यात?

कॅन्सस सिटी मिसूरी पोलीस विभागाने या प्रकरणाचा तपास सुरू केल्याची आणि पुढील चौकशीसाठी दोन संशयितांना ताब्यात घेतल्याची पुष्टी केली आहे. कॅन्सस सिटीमध्ये पोहोचलेल्या टीम वाहनातून साहित्य चोरीला गेल्याच्या संभाव्य प्रकरणाचा आम्ही तपास करत आहोत. या प्रकरणी ताब्यात घेतलेल्या दोन व्यक्तींच्या ओळखीबद्दल पोलिसांनी सध्या कोणतीही सविस्तर माहिती दिलेली नाही.

इंग्लंडचे फ्लोरिडामधील प्रशिक्षण शिबिर पूर्ण

इंग्लंडचा संघ फ्लोरिडामधील 'पाम बीच गार्डन्स' येथील स्पर्धापूर्व प्रशिक्षण शिबिर संपवून कॅन्सस सिटीमध्ये दाखल होत होता. रिपोर्टनुसार, फुटबॉल असोसिएशनच्या (FA) लॉजिस्टिक्स टीमचे सदस्य 'स्वोप सॉकर व्हिलेज' येथे तयारी करत असताना सामान चोरीला गेल्‍याचे त्यांच्या लक्षात आले. फुटबॉल असोसिएशन सध्या या नुकसानीचा अंदाज घेत असून नक्की कोणते साहित्य बेपत्ता आहे, याचा शोध घेत आहे. दुसरीकडे, खेळाडूंना एक दिवसाची सुट्टी देण्यापूर्वी इंग्लंडने गुरुवारी फ्लोरिडामधील आपले प्रशिक्षण शिबिर पूर्ण केले होते. त्यानंतर विश्वचषकाच्या अंतिम टप्प्यातील तयारीसाठी शनिवारी संपूर्ण संघ कॅन्सस सिटीला रवाना झाला.

इंग्लंडचा पहिला सामना क्रोएशियाविरुद्ध

इंग्लंडचा विश्वचषकातील पहिला सामना अवघ्या काही दिवसांवर आलेला असताना ही घटना घडली आहे. गुरुवारी डॅलस येथे क्रोएशियाविरुद्ध 'ग्रुप एल' मधील आपल्या मोहिमेची सुरुवात करण्यापूर्वी, इंग्लंडचा संघ शनिवारी दुपारी एका कम्युनिटी ट्रेनिंग सेशनमध्ये भाग घेणार आहे. यानंतर २४ जून आणि २८ जून रोजी इंग्लंडचे सामने अनुक्रमे घाना आणि पनामा विरुद्ध होतील.